ފަލަސްތީނުގެ ގާޒާގައި ނުސައިރަތު ރެފިއުޖީ ކޭމްޕުގައި ޔޫއެން އިން ހިންގާ ސްކޫލަކަށް އިޒްރޭލުން ހަމަލާދީ، އެތަނުގައި ހިޔާވަހިކަން ހޯދަމުން އައި މީހުންގެ ތެރެއިން 32 މީހުން މަރާލައިފި އެވެ.
އަލްޖަޒީރާއިން ރިޕޯޓްކުރި ގޮތުގައި އެތައް ހާސް މީހުންނެއް ހިޔާވެހިކަން ހޯދަމުންއައި ރެފިއުޖީ ކޭމްޕުގެ ސްކޫލަށް ދިން އެ ހަމަލާގައި މަރުވި މީހުންގެ ތެރޭގައި ގިނައީ ކުޑަކުދިންނާއި އަންހެނުންނެވެ.
އެ ހަމަލާ އިޒްރޭލުން ދީފައި ވަނީ ހަނގުރާމަ މަތީ މަތިންދާ ބޯޓު ބޭނުންކޮށްގެން ބޮން އަޅައިގެންނެވެ.
ހަމަލާގައި ޒަހަމްވި ގިނަ އަދަދެއްގެ މީހުން ވަނީ އަލްއަގްސާ ހޮސްޕިޓަލަށް ފަރުވާއަށް ގެންގޮސްފަ އެވެ. އަދި މަރުވި މީހުން ވެސް ގެންދިޔައީ އެ ހޮސްޕިޓަލަށެވެ.
އިޒްރޭލުން ބުނީ މި ހަމަލާ ދިނީ ހަމާސްގެ ހަނގުރާމަވެރިން އެތަނުގެ ތެރޭގައި ތިބުމުން، އެމީހުންނަށް އަމާޒުކޮށް ކަމަށެވެ. މިއީ މީގެ ކުރިން ވެސް އިޒްރޭލުން ގާޒާގެ އާއްމުންނަށް ހަމަލާ ދޭ ކޮންމެ ފަހަރަކު ހަދަމުން އަންނަ ދޮގެކެވެ.
ނަމަވެސް ގާޒާ ފަލަސްތީނުގެ މީޑިއާ އޮފީހުގެ ތަރުޖަމާން ވަނީ އިޒްރޭލުގެ ތުހުމަތުތައް ދޮގުކޮށް، ނުސައިރަތު ކޭމްޕުގައި ހަމާސްގެ އެއްވެސް މީހަކު ނެތް ކަމަށް ވިދާޅުވެފަ އެވެ.
އޮކްޓޯބަރު 7، އިން ފެށިގެން ފަލަސްތީނަށް އިޒްރޭލުން ދެމުން އަންނަ ހަމަލާތަކުގައި މަރުވި މީހުންގެ އަދަދު 36،000 އަށްވުރެ ވަނީ އިތުރުވެފަ އެވެ. މަރުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.
