ބާސެލޯނާ (ޖޫން 5) - ފްރާންސްގެ ތަރި ކީލިއަން އެމްބާޕޭ އައުމާ އެކު, ރެއާލްގެ ކުޅުންތެރިންގެ މެދުގައި މައްސަލަ ޖެހުމުގެ ފުރުސަތު ބޮޑު ކަމަށާއި, އޭގެ ފައިދާ ކުރާނީ ބާސެލޯނާ އަށް ކަމަށް އެ ކުލަބްގެ ރައީސް ޖޮއާން ލަޕޯޓާ ވިދާޅުވެއްޖެ އެވެ.
ބާސެލޯނާގެ ރައީސް ލަޕޯޓާ ވިދާޅުވީ, އެ ކުލަބުން މި ޓްރާންސްފާ މާކެޓުގައި އަގުބޮޑު ކުޅުންތެރިއެއް ހޯދުމުގެ ވިސްނުމެއް ނެތް ކަމަށެވެ. އަދި ކުލަބްގެ މިސްރާބު މިހާރު ހުރީ ހަރަދުތައް ކުޑަކޮށް, މާލީ ފައިދާ ހޯދާނެ މަގުތައް ހޯދުމަށް ކަމަށްވެސް ލަޕޯޓާ ވިދާޅުވި އެވެ.
ބާސެލޯނާގެ ވާދަވެރި ކުލަބް ރެއާލުން އަންނަނީ ކުލަބްގެ ސްކޮޑު އިތުރަށް ވަރުގަދަ ކުރަން މަސައްކަތް ކުރަމުންނެވެ. އެ ގޮތުން އެމްބާޕޭގެ ސޮއި ހޯދާފައިވާކަން ރެއާލުން އިއުލާން ކޮށްފައިވާއިރު, ލަޕޯޓާ ދެކޭ ގޮތުގައި އެއީ ބާސާ އަށް އޮތް އެޑުވާންޓޭޖެކެވެ.
"އަހަރެން ދެކެނީ އެއީ އެޑުވާންޓޭޖެއްގެ ގޮތުގައި. ރެއާލްގައި އެބަތިބި އެއް ފެންވަރެއްގެ ކުޅުންތެރިން. ކޮންމެ ކުޅުންތެރިއަކުވެސް ބޭނުންވާނެ ފުރަތަމަ އެގާރައިގައި ކުޅެން. އެ ފުރުސަތު އެ ކުލަބުގައި ނުލިބޭނެ. ފެންނާނީ މައްސަލަ ޖެހޭތަން. އެއީ ބާސާ އަށް ލިބޭނެ އެޑްވާންޓޭޖެއް" ލަޕޯޓާ ބުންޏެވެ.
ރެއާލުން އެމްބާޕޭއާ އެކު ހަދާފައިވަނީ ފަސް އަހަރު ދުވަހުގެ އެއްބަސްވުމެކެވެ. އެމްބާޕޭ ހޯދަން ރެއާލުން މިދިޔަ ތިން އަހަރު ވެސް މަސައްކަތް ކޮށްފައިވެ އެވެ.
ޕީއެސްޖީ އަށް ކުޅެދިން 306 މެޗުގައި އެމްބާޕޭ ވަނީ 256 ގޯލު ޖަހާ 96 ގޯލު ޖަހަން އެހީތެރިވެދީފަ އެވެ. އަދި ޕީއެސްޖީއާ އެކު ހަތް ފަހަރު ފްރެންޗް ލީގު ވަނީ ކާމިޔާބު ކޮށްފަ އެވެ. އެ ޓީމުގައި އޭނާ އެންމެ ބޭނުންވީ ޗެމްޕިއަންސް ލީގެއް ކާމިޔާބު ކުރާށެވެ. އެކަމަކު، އެކަން ހާސިލްނުވެ، އެމްބާޕޭ މި ސޮއިކުރި ރެއާލް އަކީ، ޗެމްޕިއަންސް ލީގު 15 ފަހަރު ކާމިޔާބުކޮށްފައިވާ، އެ މުބާރާތުގެ އެންމެ ކާމިޔާބު ޓީމެވެ.
