އިންޑިއާގެ ވެރިކަންކުރާ ބީޖޭޕީ ލީޑުކުރާ އެންޑީއޭ ކޯލިޝަނުން އެ ގައުމުގެ ބަރުލަމާނީ އިންތިހާބު ކާމިޔާބުކޮށް، ނަރެންދުރާ މޯދީ ބޮޑުވަޒީރުކަމުގެ ތިންވަނަ ދައުރެއް ކަށަވަރުކުރެއްވުމުން، އެމްޑީޕީގެ ޗެއާޕާސަން ފައްޔާޒު އިސްމާއިލް މަރުހަބާ ވިދާޅުވެއްޖެ އެވެ.
ސޯޝަލް މީޑިއާގައި މިރޭ ކުރެއްވި ޕޯސްޓެއްގައިމޯދީއަށް މަރުހަބާ ވިދާޅުވެ، ފައްޔާޒް ފާހަގަކުރެއްވީ ރާއްޖެއާއި އިންޑިއާއާ ދެމެދު އޮތް ގާތް ގުޅުމެވެ. މޯދީގެ ބޮޑުވަޒީރުކަމުގެ ތިންވަނަ ދައުރުގައި ދެ ގައުމުގެ ދެމެދު އޮތް ގުޅުން އިތުރަށް ބަދަހިވެ އެކުގައި ގިނަ މަސައްކަތްތަކެއް ކުރެވިގެންދާނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވި އެވެ.
އެމްޑީޕީގެ ވެރިކަމުގައި އިންޑިއާއާ ގާތްގުޅުމެއް ބޭއްވި އިރު ފައްޔާޒަކީ އިކޮނޮމިކް މިނިސްޓަރެވެ.
މޯދީ ތިންވަނަ ދައުރަކަށް އިންތިހާބުވި ނަމަވެސް އޭނާގެ ބީޖޭޕީ އަށް ވަނީ ޕާލިމެންޓުގެ ސާފު މެޖޯރިޓީ ގެއްލިފަ އެވެ.
ޕާޓީއަކަށް މެޖޯރިޓީ ލިބޭނީ ލޮކްޝަބާގެ 543 ގޮނޑީގެ ތެރެއިން 272 ގޮނޑި ކާމިޔާބުކޮށްގެންނެވެ. ނާތީޖާ ދައްކާ ގޮތުން މިފަހަރުގެ އިންތިހާބުގައި ބީޖޭޕީއަށް ލިބޭނީ 240 ގޮނޑި އެވެ. ބީޖޭޕީއަށް ލޮކްޝަބާގެ މެޖޯރިޓީ ގެއްލިފައި މިވަނީ ދަހަރެއް ފަހުންނެވެ.
ބީޖޭޕީގެ އިތުރުން ދެން އެ ކޯލިޝަނުގައި ހިމެނޭ އެހެން ޕާޓީތަކާ އެކު އެންޑީއޭއިން ލޮކްޝަބާގެ 292 ގޮނޑި ކާމިޔާބު ކުރާނެ ކަމަށް އިންޑިއާގެ ބައެއް މީޑިއާތަކުން ދަނީ ރިޕޯޓުކުރަމުންނެވެ.
ސާފު މެޖޯރިޓީ ގެއްލުނު ނަމަވެސް، މޯދީ ވަނީ ބީޖޭޕީގެ މައި ހަރުގެއަށް ވަޑައިގެން ޕާޓީގެ އިސްވެރިންނާއެކު އިންތިހާބުގެ ކާމިޔާބީ އިއުލާނުކުރައްވާފަ އެވެ. އެގޮތުން ކާމިޔާބީގެ ހިތާބުގައި މޯދީ ވަނީ އިންޑިއާގެ ރައްޔިތުންގެ އިތުބާރު އޭނާގެ ޕާޓީއަށް އެބައޮތް ކަމަށާއި މިއަދުގެ ނަތީޖާއަކީ ރައްޔިތުންނަށް ލިބުނު ކާމިޔާބީއެއް ކަމަށް ވިދާޅުވެފަ އެވެ.
