ރިޔާދު، ސައުދީ އަރަބިއްޔާ (ޖޫން 4) - ސައުދީ އަރަބިއްޔާގެ ޕްރޮފެޝަނަލް ލީގުގެ ކްލަބް އަލް އިއްތިފާގުގެ ކޯޗަކަށް އޭނާ ހުރީ ހަމައެކަނި ފައިސާ ބޭނުންވާތީ ނޫން ކަމަށް އެ ޓީމާ ހަވާލުވެހުރި އިނގިރޭސި ކޯޗު ސްޓީވެން ޖެރާޑް ބުނެފި އެވެ.
ޖެރާޑް، 43، ޕްރޮފެޝަނަލް ކޯޗިން ކެރިއަރު ފެށީ، 2018 ވަނަ އަހަރު ސްކޮޓްލެންޑްގެ ރޭންޖާސް އިންނެވެ. އެ ޓީމާ އެކު ސްކޮޓްލެންޑްގެ ޕްރިމިއާ ލީގު ކާމިޔާބުކުރި ޖެރާޑް، ވަނީ 2021 ވަނަ އަހަރުގެ ނޮވެމްބަރު މަހު، އިނގިރޭސި ޕްރިމިއާ ލީގުގެ އެސްޓަން ވިލާއާ ހަވާލުވެފަ އެވެ. އެ ޓީމުގެ ކޯޗުކަމުން، 2022 ވަނަ އަހަރުގެ އޮކްޓޫބަރު މަހު ވަކިކުރި ޖެރާޑް ވަނީ، މިދިޔަ އަހަރު ޖުލައި، މަހު އަލް އިއްތިފާގުގެ ކޯޗުކަމާ ހަވާލުވެފަ އެެވެ.
"މާލީ ގޮތުން އަހަންނަށް ލިބެންޖެހޭ ފައިސާއާ ދިރިއުޅުން ހަމަޖެހިލައިގެން އުޅެވޭ ވަރު ވިތާ ވަރަށް ގިނަ އަހަރުތަކެއްވެއްޖެ،" ޖެރާޑް، ދާދި ފަހުން ދިން އިންޓަވިއުއެއްގައި ބުންޏެވެ. "ސައުދީ އަށް އައީ ފައިސާގެ ކަންކަން ރަނގަޅުވުމުންތަ؟ އެއީ އެ ކަމުގެ އެއްބައި. އެކަމަކު، ސައުދީ އަށް އައި ހަމައެކަނި ފައިސާއާ ހެދިއެއް ނޫން. އެތައް މިލިއަން ފަހަރަކު އެހިޔަސް އެއީ ހަގީގަތެއް ނޫން،"
މިދިޔަ ޖެނުއަރީ މަހު، ޖެރާޑް ވަނީ އަލް އިއްތިފާގާ އެކު ހަދާފައިވާ ކޮންޓްރެކްޓް، 2027ގެ ސީޒަނުގެ ނިޔަލަށް އާކޮށްފަ އެވެ. ޖެރާޑް ބުނީ ދާދި ފަހުން ވެސް އޭނާ އަށް ޕްރިމިއާ ލީގުގެ ކްލަބްތަކުން ހުށަހެޅުން ލިބުނު ކަމަށާއި އެކަމަކު، ސައުދީގައި ކުރިއަށްގެންދާ ޕްރޮޖެކްޓް މެދުތެރެއިން ދޫކޮށްލައިފައިދާން ބޭނުންނުވީ ކަމަށެވެ.
"ސައުދީގައި މި ހުރީ ފައިސާއާ ހެދިއެއް ނޫން. ޝައުގުވެރިވާ މަސައްކަތްތަކެއް ކުރަން،" ލިވަޕޫލް އެކެޑަމީގައި ކޯޗިންގެ މަސައްކަތް ފެށި ޖެރާޑް ބުންޏެވެ.
ޖެރާޑް ބުނީ، އެސްޓަން ވިލާގެ ތަޖުރިބާ އަށް ފަހު، އަލުން ޕްރިމިއާ ލީގަށް އެނބުރި އަންނާނީ ވަރަށް ފުރިހަމަ އަށް ތައްޔާރުވެގެން ކަމަށެވެ.
