އިސްތަންބޫލް (ޖޫން 3) - ތުރުކީގެ ފެނަބާޗޭގެ ކޯޗުކަމާ މި ހަފުތާގައި ހަވާލުވި ހޯސޭ މޮރީނިއޯ އެ ކުލަބަށް އޭނާގެ ކުރީގެ ކުލަބް ރޯމާ އިން އެއްވެސް ކުޅުންތެރިއެއް ގެނައުމުގެ ޝައުގެއް ނެތް ކަމަށް ބުނެފި އެވެ.
އިޓަލީގެ ރޯމާގެ ކޯޗުކަމުން މޮރީނިއޯ ވަކިކުރީ މިދިޔަ ޖެނުއަރީ މަހުގަ އެވެ. އޭނާ ރޯމާގެ ކޯޗުކަމުން ވަކިކުރުމުން އެ ކުލަބްގެ ބައެއް ސަޕޯޓަރުން ވަނީ އެކަމަށް ފާޑުވެސް ކިޔައިފަ އެވެ. ފެނަބާޗޭ އަށް މޮރީނިއޯ ބަދަލުވިއިރު, ދާދި ފަހުން، ބެސިކްޓާސްގެ ނައިބު ރައީސް، ހުސެއިން ޔުޝެލް ވަނީ މޮރީނިއޯ އެ ކުލަބަށް ގެންދިޔުމަށް މަޝްވަރާ ކުރަމުން އަންނަ ކަމަށް ވިދާޅުވެފަ އެވެ. މީގެ އިތުރުން ސައުދީގެ ކުލަބުތަކުން ވެސް ވަނީ މޮރީނިއޯ ގެންދިޔުމަށް ބޮޑެތި ހުށަހެޅުންތައް ހުށަހަޅާފަ އެވެ.
ފެނަބާޗޭ އަށް ބަދަލުވުމަށްފަހު ދިން އިންޓަވިއުއެއްގައި މޮރީނިއޯއާ އަމާޒުވި އެއް ސުވާލަކީ އޭނާގެ ކުރީގެ ކުލަބް ރޯމާގެ ބައެއް ކުޅުންތެރިން ފެނަބާޗޭ އަށް ގެންދިޔުމަށް އެ ކުލަބުން ނިނާމާފައިވޭތޯ އެވެ. އެ ސުވާލަށް ޖަވާބު ދެމުން މޮރީނިއޯ ބުނީ, އޭނާގެ ކުރީގެ ކުލަބުން ކުޅުންތެެރިއަކު ފެނަބާޗޭ އަށް ގެންދިޔުމުގެ ޝައުގެއް އޭނާގެ ނެތް ކަމަށެވެ.
"އަހަރެން ރޯމާގެ ކުޅުންތެރި އެއް ފެނަބާޗޭ އަށް ގެނައުމުގެ ޝައުގުވެރިކަމެއް ނެތް. ޓްރާންސްފާ މާކެޓުގައި އަދި ވަރަށް ދުވަސް އެބައޮތް. ރަނގަޅު ކުޅުންތެރިން ފެނަބާޗޭއާ ގުޅޭނެ ކަމުގެ ޔަގީންކަން އަހަރެން އަށް އެބައޮތް" މޮރީނިއޯ ބުންޏެވެ.
މީގެ ކުރިން މޮރީނިއޯ ވަނީ ޔޫރަޕްގެ ހަތަރު ގައުމެއްގައި ކޯޗިންގެ މަސައްކަތްކޮށްފަ އެވެ. ޕޯޗުގަލްގައި ޕޯޓޯއާ އެކު ފެނުުނުއިރު، އިނގިރޭސި ޕްރިމިއާ ލީގުގައި ޗެލްސީ، މެންޗެސްޓާ ޔުނައިޓެޑް އަދި ޓޮޓެންހަމް އަށް ކޯޗުކޮށްދިނެވެ. ސްޕެއިނުގެ ރެއާލް މެޑްރިޑާއި އިޓަލީގެ އިންޓަ މިލާނަށް ވެސް މޮރީނިއޯ ވަނީ ކޯޗުކަން ކޮށްދީފަ އެވެ. ތުރުކީ ވެގެންދާނީ، ޕްރޮފެޝަނަލް ކޯޗިންގައި މޮރީނިއޯ މަސައްކަތްކުރާނެ ފަސް ވަނަ ގައުމަށެވެ
