އިސްތަންބޫލް، ތުރުކީ (ޖޫން 3) - އޭނާ ވާނީ ފެނަބާޗޭ ތަމްސީލުުކުރާ އެންމެންގެ ކޯޗަކަށް ކަމަށާއި އެ ޓީމުގައި ތާރީހީ މަސައްކަތެއް ކުރަން ބޭނުންވާ ކަމަށް ފެނަބާޗޭގެ ކޯޗުކަމާ ހަވާލުވި ހޯސޭ މޮރީނިއޯ ބުނެފި އެވެ.
މިދިޔަ ޖެނުއަރީ މަހު ރޯމާގެ ކޯޗުކަމުން ވަކިކުރި މޮރީނިއޯ، 61، ވަނީ ތުރުކީގެ ގަދަބާރު ފެނަބާޗޭއާ އެކު، ދެ އަހަރުގެ ކޮންޓްރެކްޓެއްގައި ސޮއިކޮށްފަ އެވެ.
ފެނަބާޗޭގެ ކޯޗެއްގެ ގޮތުގައި މޮރީނިއޯ ތައާރަފްކުރަން، ބޭއްވި އިވެންޓަށް ގިނަ އަދަދެއްގެ ސަޕޯޓަރުން ވަނީ ދަނޑަށް ގޮސްފަ އެވެ. މޮރީނިއޯ ބުނީ، އާންމު ގޮތެއްގައި ކޯޗަކަށް ސަޕޯޓަރުންގެ ލޯބި އެހާ ބޮޑަށް ލިބިގެންދަނީ، ކާމިޔާބީތަކެއް ހޯދުމުން ކަމަށެވެ. އެހެން ނަމަވެސް، ފެނަބާޗޭގެ ސަޕޯޓަރުން، އޭނާ އަށް ފުރަތަމަ ދުވަހު ވެސް އެ ލޯބި ދިނުމުން ވަރަށް ބޮޑަށް ހިތްހަމަޖެހި، މަސައްކަތް ކުރުމުގެ ޝައުގުވެރިކަން ބޮޑުވެފައިވާ ކަމަށް މޮރީނިއޯ ވަނީ ބުނެފަ އެވެ.
"މި ވަގުތުން ފެށިގެން އަހަރެން ވައުދުވަން. އަހަރެން ނިސްބަތްވަނީ މި ކްލަބްގެ މި އާއިލާ އަށް. މި ކްލަބްގެ ޖޯޒީ އަކީ އަހަރެންގެ ގައިގެ ހަންގަނޑު. ފުޓްބޯޅައިގެ ޕެޝަން ނެތި ކުރިއަށް ނުދެވޭނެ. މި ކްލަބްގައި މި އޮތް ޕެޝަނާ އެއްވަރުގެ އެހެން ތަނެއް ނެތް. އަހަރެން ބޭނުންވަނީ މުޅި ކްލަބްގެ ކޯޗަކަށް ވާން، ތި އެންމެންގެ ކޯޗަކަށް ވާން،" މޮރީނިއޯ ބުންޏެވެ.
މީގެ ކުރިން މޮރީނިއޯ ވަނީ ޔޫރަޕްގެ ހަތަރު ގައުމެއްގައި ކޯޗިންގެ މަސައްކަތްކޮށްފަ އެވެ. ޕޯޗުގަލްގައި ޕޯޓޯއާ އެކު ފެނުުނުއިރު، އިނގިރޭސި ޕްރިމިއާ ލީގުގައި ޗެލްސީ، މެންޗެސްޓާ ޔުނައިޓެޑް އަދި ޓޮޓެންހަމް އަށް ކޯޗުކޮށްދިނެވެ. ސްޕެއިނުގެ ރެއާލް މެޑްރިޑާއި އިޓަލީގެ އިންޓަ މިލާނަށް ވެސް މޮރީނިއޯ ވަނީ ކޯޗުކަން ކޮށްދީފަ އެވެ. ފެނަބާޗޭ އަށް ބަދަލުވެއްޖެނަމަ، ތުރުކީ ވެގެންދާނީ، ޕްރޮފެޝަނަލް ކޯޗިންގައި މޮރީނިއޯ މަސައްކަތްކުރާނެ ފަސް ވަނަ ގައުމަށެވެ.
"ތުރުކީ ފުޓްބޯޅަ އަށް އެހީތެރިވާން އަހަރެން ބޭނުން. އެކަމަކު، އެންމެ މުހިންމު ކަމަކީ، ފެނަބާޗޭ އަށް ކާމިޔާބު ހޯދައިދިނުން. އަހަރެން ފެނަބާޗޭގެ ކޮންޓްރެކްޓްގައި ސޮއިކުރުމާ އެކު، ތި އެންމެންގެ ހުވަފެނަކީ އަހަރެންގެ ވެސް ހުވަފެން،" މޮރީނިއޯ ބުންޏެވެ.
ތުރުކީގެ ޗެމްޕިއަންކަން 19 ފަހަރު ހޯދާފައިވާ ފެނަބާޗޭ އިން އެންމެ ފަހުން ލީިގު ކާމިޔާބުކުރީ، މީގެ 10 އަހަރު ކުރިންނެވެ.
