ފަލަސްތީނުގެ ރައްޔިތުންނާ ދެކޮޅަށް ގަތުލުއާންމެއް ހިންގަމުންދާ އިޒްރޭލުން ގާޒާގެ ބުރެއިޖް ރެފިއުޖީ ކޭމްޕަކަށް ހަމަލާދީ ހަ މީހަކު މަރާލައިފި އެވެ.
އިޒްރޭލުން ގާޒާގެ މެދަށްވާ ގޮތަށް ގާއިމުކޮށްފައިވާ މި ރެފިއުޖީ ކޭމްޕަށް ވައިގެ ހަމަލާދީ މަރާލި ހަ މީހުންގެ ތެރޭގައި ހިމެނެނީ ކުޑަކުދިންގެ އިތުރުން އަންހެނުންނެވެ.
ނުސެއިރާތު ރެފިއުޖީ ކޭމްޕަށް އިޒްރޭލުން ދިން ހަމަލާގައި ހަތަރު މީހުން ވަނީ މަރުވެފައިވާއިރު، ޖަބަލިއާ ރެފިއުޖީ ކޭމޕުން އިޒްރޭލުން ދިން ހަމަލާތަކުގައި މަރުވެފައިވާ 50 މީހުންގެ ހަށިގަނޑު ވަނީ ފެނިފަ އެވެ.
އޭގެއިތުރުން ރެސްކިއު ޓީމުތަކުން އަންނަނީ މިދިޔަ މުއްދަތުގައި ގާޒާގެ އެކި ތަންތަނަށް ދީފައިވާ ހަމަލާތަކުގައި ބަޔަކު ސަލާމަތްވިތޯ ބަލަމުންނެވެ.
އިޒްރޭލުން އަންނަނީ ގާޒާގެ ރެފިއުޖީ ކޭމްޕުތަކަށް އަމާޒުކޮށް ގިނަ ހަމަލާތައް ދެމުންނެވެ. މިގޮތުން "ސޭފް ޒޯން" ކަމަށް ކަނޑައަޅާފައިވާ ރަފަހުއަށް ވެސް ހަމަލާދީ ގިނަ ބަޔަކު ވަނީ މަރާލާފަ އެވެ.
އޮކްޓޯބަރު 7، އިން ފެށިގެން އިޒްރޭލުން ހިންގަމުންދާ ގަތުލްއާންމުގައި މިހާތަނަށް ފަލަސްތީނުގެ 36،439 މީހުން ވަނީ މަރުވެފަ އެވެ. އަދި 82،627 މީހުން ވަނީ ހަމަލާތަކުގައި ޒަހަމްވެފަ އެވެ.
