އިޒްރޭލުގެ ޕާސްޕޯޓު މަނާކުރުމަށްޓަކައި ރާއްޖޭގެ ރައްޔިތުންގެ މަޖިލީހަށް ހުށަހަޅަން ރައީސް ޑރ. މުހައްމަދު މުއިއްޒުގެ ސަރުކާރުން އިއްޔެ ނިންމުމާއެކު، މި ވަގުތު ރާއްޖޭގައި ތިބި އިޒްރޭލުގެ އެންމެން މިތަން ދޫކޮށް ދިޔުމަށާއި، ރާއްޖެއަށް ޒިޔާރަތް ނުކުރުމަށް އެ ގައުމުން އިލްތިމާސްކޮށްފި އެވެ.
އިޒްރޭލުގެ ފޮރިން މިނިސްޓްރީއާ ހަވާލާދީ ދަ ޓައިމްސް އޮފް އިޒްރޭލްގައި ބުނެފައި ވަނީ މި ވަގުތު ރާއްޖޭގައި ތިބި އިޒްރޭލު މީހުން ފުރައިގެން ދިޔުމަށް އެދެނީ ނުރައްކަލެއް ކުރިމަތިވެދާނެ ހާލަތެއްގައި އެހީތެރިވުމަށް ދަތިވާނެތީ ކަމަށެވެ.
ނިމިގެން ދިޔަ 2023 ވަނަ އަހަރު އިޒްރޭލުން ގާތްގަނޑަކަށް 10،966 ޓޫރިސްޓުން ރާއްޖެ ޒިޔާރަތްކުރި އެވެ. އެއީ ރާއްޖެ ޒިޔާރަތްކުރި ޖުމުލަ ޓޫރިސްޓުންގެ 0.58 ޕަސެންޓެވެ. މި އަހަރުގެ ފުރަތަމަ ހަތަރު މަހު 500 އަށް ވުރެ ގިނަ ޓޫރިސްޓުން އެ ގައުމުން ރާއްޖެއަށް ޒިޔާރަތް ކުރި އެވެ.
އިޒްރޭލުގެ ޕާސްޕޯޓު މަނާކުރަން ރާއްޖޭން ނިންމުމާއެކު އިޒްރޭލުން އިލްތިމާސްކޮށްފައި ވަނީ، އެހެން ގައުމެއްގެ ޕާސްޕޯޓު އޮންނަ އިޒްރޭލްގެ ރައްޔިތަކު ވިޔަސް ރާއްޖެ އަށް ޒިޔާރާތް ނުކުރުމަށެވެ.
އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާ ކުރަން ގާނޫނުތަކަށް ގެންނަން ޖެހޭ އިސްލާހުތައް ގެނައުމަށް ވަޒީރުންގެ މަޖިލީހުން ނިންމީ އިއްޔެ އެވެ. އެ މަރުހަލާ ކުރިއަށް ގެންދަން ވަޒީރުންގެ މަޖިލީހުން ވަނީ ކޮމިޓީއެއް އެކުލަވައިލާފަ އެވެ.
އިޒްރޭލުގެ ޕާސްޕޯޓު މަނާކުރުމަށް ގޮވާލައި 19 ވަނަ ރައްޔިތުންގެ މަޖިލީހުން ގަރާރެއް ފާސް ކޮށްފައި ވާއިރު، އަލަށް ހުވާކުރި 20 ވަނަ މަޖިލީހަށް ގަލޮޅު ދެކުނު ދާއިރާގެ މެންބަރު މީކާއީލް ނަސީމް ވަނީ އިމިގްރޭޝަން ގާނޫނު އިސްލާހުކޮށް އެ ގައުމުގެ ޕާސްޕޯޓު މަނާކުރަން ބިލެއް ހުށަހަޅުއްވާފަ އެވެ.
އެ ބިލަށް ސުޕަ މެޖޯރިޓީ އޮތް މަޖިލީހުން ތާއިދު ކުރާކަން ބުނެފައެއް ނެތެވެ.
އޮކްޓޯބަރު 7، 2023، ގައި އިޒްރޭލުން ފެށި ގަތުލުއާންމުގައި 36،000 އަށް ވުރެ ގިނަ ފަލަސްތީނު މީހުން ވަނީ މަރާލައިފަ އެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ. މި ގަތުލުއާންމާ ގުޅިގެން އިޒްރޭލް ޕާސްޕޯޓު މަނާކުރަން ދިވެހިން ދަނީ ގޮވަމުންނެވެ.
އިސްރޭލުގެ ޕާސްޕޯޓް މަނާކޮށްފައިވާ ގައުމުތަކުގެ ތެރޭގައި އަލްޖީރިއާ، ބަންގްލަދޭޝް، ބްރޫނާއީ، އީރާން، އިރާގު، ކުވައިތު، ލުބުނާން، ލީބިޔާ، ޕާކިސްތާން، ސައުދީ އަރަބިއްޔާ، ސީރިއާ، އަދި ޔަމަން ހިމެނެ އެވެ.
ރާއްޖެއަށް ޒިޔާރަތް ކުރި އިޒްރޭލް ޓޫރިސްޓުންގެ އަދަދު
- 2004 - 747 ޓޫރިސްޓުން
- 2005 - 567 ޓޫރިސްޓުން
- 2006 - 846 ޓޫރިސްޓުން
- 2007 - 1308 ޓޫރިސްޓުން
- 2008 - 1588 ޓޫރިސްޓުން
- 2009 - 1380 ޓޫރިސްޓުން
- 2010 - 2113 ޓޫރިސްޓުން
- 2011 - 2433 ޓޫރިސްޓުން
- 2012 - 2569 ޓޫރިސްޓުން
- 2013 - 3253 ޓޫރިސްޓުން
- 2014 - 3299 ޓޫރިސްޓުން
- 2015 - 3567 ޓޫރިސްޓުން
- 2016 - 5072 ޓޫރިސްޓުން
- 2017 - 5949 ޓޫރިސްޓުން
- 2018 - 7748 ޓޫރިސްޓުން
- 2019 - 10424 ޓޫރިސްޓުން
- 2020 - 1782 ޓޫރިސްޓުން
- 2021 - 10785 ޓޫރިސްޓުން
- 2022 - 15748 ޓޫރިސްޓުން
- 2023 - 10966 ޓޫރިސްޓުން
