ރައީސް ޑރ.މުހައްމަދު މުއިއްޒުގެ ކެބިނެޓްގައި ހިމެނިވަޑައިގަންނަވާ ވަޒީރުންގެ ތެރެއިން ރައްޔިތުންގެ މަޖިލީހުގެ ރުހުން ލިބިވަޑައިނުގެން ތިއްބެވި ތިން ވަޒީރުންނަށް ރުހުން ދިނުމުގެ މައްސަލަ، ރައްޔިތުންގެ މަޖިލީހުގެ މާދަމާގެ ޖަލްސާއަށް އެޖެންޑާކޮށްފި އެވެ.
ރައީސް މުއިއްޒު ކެބިނެޓް އެކުލަވައިލެއްވި އިރު ރައްޔިތުންގެ މަޖިލީހުގެ މެޖޯރިޓީ އޮތީ އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގަ އެވެ. އެ މަޖިލީހުން ވަޒީރުންނަށް ރުހުން ދިން އިރު އިސްިތިސްނާކުރީ ބަންޑާރަނައިބު އަހުމަދު އުޝާމް އާއި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު އަދި ހައުސިން މިނިސްޓަރު ޑރ.އަލީ ހައިދަރު އަހުމަދެވެ.
އެ ތިން ބޭފުޅުންނަށް ރުހުން ދިނުމުގެ މައްސަލަަ، ރައްޔިތުންގެ މަޖިލީހުގެ މާދަމާގެ ޖަލްސާގެ އެޖެންޑާގެ 5.1 ގައި ހިމަނާފައި އެބަ އޮތެވެ.
މާދަމާގެ އެޖެންޑާގައި ދެން އޮތީ ރައްޔިތުންގެ މަޖިލީހުގެ މެންބަރުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ) ގައި އިންނަވާނެ މެންބަރެއް ކަނޑައެޅުމުގެ މައްސަލައާއި މަޖިލީހުގެ ކޮމިޓީތަކަށް މެންބަރުން ކަނޑައެޅުމެވެ.
ޖޭއެސްސީއަށް މަޖިލީހުން ކަނޑައަޅަނީ ކޮން މެންބަރެއް ކަމެއް އަދި ނޭނގެ އެވެ.
މިހާރު އޮތް މަޖިލީހުގައި 93 މެންބަރުން ތިއްބަވާއިރު ޕީއެންސީ ތަމްސީލްކުރައްވާ 75 މެންބަރުން ތިއްބަވަ އެވެ. އެމްޑީއޭގެ ދެ މެންބަރަކާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުހައްމަދު ނާޒިމް ވެސް ސަރުކާރާ އެކު މަސައްކަތް ކުރައްވާނެ އެވެ.
ސަރުކާރުން ބޭނުންވާ ގޮތަށް މި މަޖިލީހުގައި ވޯޓު ދެއްވާނެ މެންބަރުންގެ އަދަދު 79 އަށް އަރަ އެވެ. ރިޔާސަތު ނުހިމަނާ އެއީ 78 އެވެ. އިދިކޮޅު އެމްޑީޕީގެ 12 މެންބަރުންނާއި އެއްވެސް ޕާޓީއަކަށް ނިސްބަތްވާ ނުވަ ދެ މެންބަރަކު މަޖިލީހުގައި ތިއްބަވަ އެވެ.
