މެޑްރިޑް (މެއި 31) - މި ވަގުތު ބާސެލޯނާއާ ދުރުވުމަކީ ކޯޗު ޒަވީ ހެނާންޑޭޒަށް ރަނގަޅަށް ދިމާވި ކަމެއް ކަމަށް ރެއާލް މެޑްރިޑްގެ ކޯޗު ކާލޯ އަންޗެލޮޓީ ބުނެފި އެވެ.
މިދިޔަ ޖެނުއަރީ މަހު ޒަވީ، ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފަ އެވެ. އެކަމަކު، ތަކުރާރުކޮށް ބާސެލޯނާ އިން ކުރިއަށްގެންދިޔަ މަޝްވަރާތަކަށް ފަހު، ޒަވީ އެ ނިންމުން ބަދަލުކުރި އެވެ. މީގެ މަހެއްހާ ދުވަސްކުރިން ޒަވީ، އިއުލާނުކުރީ އިތުރު އެއް އަހަރު ބާސެލޯނާގައި މަޑުކުރަން އެއްބަސްވެވިފައިވާ ކަމަށެވެ. އެހެން ނަމަވެސް، ޒަވީ، ނޫސްވެރިންގެ ބައްދަލުވުމެއްގައި ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެމްބަރުން ވަނީ ހުށަހަޅައިފަ އެވެ. އެއާ އެކު، ބާސެލޯނާ އިން ޒަވީ މަގާމުން ވަކިކުރި އެވެ.
ޒަވީއާ މެދު ބާސެލޯނާ އިން ކަންތައް ކުރީ އިހުތިރާމްކުޑަކޮށް ކަމަށް ސްޕެއިނުގެ ގިނަ ކޯޗުން އަންނަނީ ބުނަމުންނެވެ. އެ ސުވާލު، ރެއާލްގެ ކޯޗު އަންޗެލޮޓީއާ އަމާޒުވުމުން، އޭނާ ބުނީ މިއީ ޒަވީ އަށް ފައިދާކުރާނެ ކަމެއް ކަމަށެވެ.
"މިއީ ކޯޗުންގެ ވަޒީފާގައި ހިމެނޭ ބައެއް. ޒަވީ އަށް ވެސް އެކަން ވިސްނޭނެ. ކްލަބާ (މެނޭޖްމަންޓް) އާއި ކޯޗާ މެދު އެންމެ ރަނގަޅު ގުޅުމެއް ނެތިއްޔާ، އެންމެ ރަނގަޅު ހައްލަކީ ވަކިވުން. އަހަރެން އެކަން ތަޖުރިބާކުރިން، ނަޕޯލީ، ބަޔާން އަދި ޗެލްސީގައި. ބާސެލޯނާއާ މި ވަގުތު ވަކިވުމަކީ ޒަވީ އަށް ވެސް ކްލަބަށް ވެސް ރަނގަޅެއް،" އަންޗެލޮޓީ ބުންޏެވެ.
އަންޗެލޮޓީ ބުނީ، ބާސެލޯނާ އިން ގެނައި އާ ކޯޗު ހަންސީ ފްލިކާ އެކު، ކަންކަން ރަނގަޅުވެގެންދާނެ ކަމަށް ބެެލެވޭ ކަމަށެވެ.
