ކުރިން ނުދައްކާ ހުރި ފައިސާއާއެކު ޖޫން 14، ގައި ފަށާ ޔޫރޯ ފުޓުބޯޅަ މުބާރާތް ދައްކަން ޕަބްލިކް ސާވިސް މީޑިއާ (ޕީއެސްއެމް) އިން 11.8 މިލިއަން ރުފިޔާ ހޭދަކުރަން ޖެހިއްޖެ އެވެ.
"އަދަދު" އަށް އެނގިފައިވާ ގޮތުގައި ޕީއެސްއެމްއިން ޔޫރޯ ދައްކަން ބޭނުންވާ ރައިޓްސް އިންޑިއާގެ "ސޮނީ" ކުންފުނިން ގަނެފައި ވަނީ 250،000 ޑޮލަރު (3.8 މިލިއަން ރުފިޔާ) އަށެވެ.
ޕީއެސްއެމްއިން ބޭއްވި ނޫސްވެރިންގެ އެ ކުންފުނީގެ އެމްޑީ ޒީނާ ޒާހިރު ވިދާޅުވީ އެ ކުންފުނިން ސޮނީއަށް އޮތީ އަށް މިލިއަން ރުފިޔާއިން ދަރާފައި ކަމަށާއި، ޕޭމަންޓް ޕްލޭނެއްގެ ދަށުން އެ ފައިސާ ދެއްކުން ކުރިއަށް ގެންދާނެ ކަމަށެވެ.
އެހެންކަމުން، ޔޫރޯ ދައްކަން ބޭނުންވާ ރައިޓްސް ގަންނަ 3.8 މިލިއަން ރުފިޔާ އާއި ކުރީގެ މެނޭޖްމަންޓުން ނުދައްކާ އަށް މިލިއަން ރުފިޔާއާއެކު ޖުމްލަ 11.8 މިލިއަން ރުފިޔާ ސޮނީއަށް ދައްކަން ޖެހޭނެ އެވެ.
"ޔޫރޯ ގެނެސްދިނުމަށް އަޅުގަނޑުމެންނަށް ދިމާވި އެންމެ ބޮޑު ގޮންޖެހުމަކީ ޔޫރޯގެ ރައިޓްސް މިފަހަރު ދޫކުރާ އިންޑިއާގެ ސޮނީ ޗެނަލްއަށް އަޅުގަނޑުމެން ހުރީ އަށް މިލިއަން ރުފިޔާ ދަރާފައި،" ޒީނާ ބުންޏެވެ.
މިކަމާ ގުޅޭގޮތުން ޕީއެސްއެމްގެ ތަރުޖަމާން ޒީކް އަހުމަދު ރިޒާ "އަދަދު" އަށް ވިދާޅުވީ އެ އަށް މިލިއަން ރުފިޔާ ޕީއެސްއެމްއިން ސޮނީއަށް ދައްކަން އެ ކުންފުންޏާއެކު އެއްބަސްވެފައި ވަނީ އެއް އަހަރު ދުވަހުގެ ޕްލޭނެއްގެ ދަށުން ކަމަށެވެ.
"ގާތްގަނޑަކަށް އަޅުގަނޑުމެންނަށް ސަޕޯޓު އެބަ ލިބޭ އެރައުންޑް 10 ވަރަކަށް ކުންފުނިން. އެސްއޯއީތަކުން ސަޕޯޓު ލިބިފައި އޮތީ،" ޒީކް ވިދާޅުވި އެވެ.
ޕީއެސްއެމްގެ ޔޫރޯ ލޯންޗިން އަންނަ ހަފްތާގައި ބޭއްވުމަށް ހަމަޖެހިފައިވާއިރު، ލޯންޗިންގައި ޔޫރޯ ދައްކަން ޕީއެސްއެމްއަށް އެހީވި ކުންފުނިތައް ހާމަކުރާނެ ކަމަށް ޒީނާ ވަނީ ވިދާޅުވެފަ އެވެ.
