ފަލަސްތީނުގައި "ސޭފް ޒޯން" އެއް ގޮތަށް ކަނޑައަޅާފައިވާ ރަފާ ސިޓީއަށް އިޒްރޭލުން ހަމަލާދެނީ އެމެރިކާއިން އުފައްދާ ބޮން ބޭނުންކޮށްގެން ކަމަށް ރިޕޯޓްތައް ބުނެފި އެވެ.
ނިއުޔޯކް ޓައިމްސްއިން ބުނީ ރަފާއަށް އެންމެ ފަހުން އިޒްރޭލުން ވަރުގަދަ ހަމަލާ ދީފައި ވަނީ އެމެރިކާއިން އުފައްދާފައިވާ ބޮންތައް ބޭނުންކޮށްގެން ކަމަށާއި، އެކަން ސާބިތުވަނީ ރަފާއިން ފެނުނު ބޮމުގެ ބައިތަކުން ކަމަށެވެ.
އެ ބޮންތަކަކީ އިޒްރޭލަށް އެމެރިކާއިން ދީފައިވާ ބޮންތަކެއް ކަމަށް ވެސް ރިޕޯޓްތައް އަންނަނީ ބުނަމުންނެވެ.
"ރަފާއަށް ބޮން އަޅާފައި ވަނީ ޖީބީޔޫ-39 ބޭނުންކޮށްގެން. އެއީ އެމެރިކާގައި ޑިޒައިންކޮށްގެން އުފައްދާ ބޮމެއް،" ނިއުޔޯކް ޓައިމްސްއިން ބުނެ އެވެ.
މިކަމާ ގުޅޭ ގޮތުން އެމެރިކާގެ ސެކްރެޓަރީ އޮފް ސްޓޭޓް އެންތޮނީ ބްލިންކެން ވިދާޅުވީ ރަފާއަށް ހަމަލާދީފައި ވަނީ ކޮން ހަތިޔާރެއް ބޭނުންކޮށްގެންކަން ބުނަން ނޭނގޭ ކަމަށާއި، ނަމަވެސް އެކަން ބަލަމުން އަންނަ ކަމަށެވެ.
ރަފާއަށް އިޒްރޭލުން މިދިޔަ ދެ ދުވަސް ތެރޭގައި ދިން ހަމަލާތަކުގައި ގިނަ ބަޔަކު ވަނީ މަރުވެފަ އެވެ. އިޒްރޭލުގެ މި ހަމަލާތައް ރަފާއަށް އަމާޒުވެފައި ވަނީ އައިސީޖޭއިން ހަނގުރާމަ ހުއްޓާލަން އަމުރުކޮށްފައި ވަނިކޮށެވެ.
އޮކްޓޯބަރު 2023، ގައި ފެށި ހަނގުރާމައިގައި މިހާތަނަށް އިޒްރޭލުން ފަލަސްތީނު 36،000 މީހުން ވަނީ މަރާލައިފަ އެވެ. އޭގެ ތެރޭގައި ގިނައިން ހިމެނެނީ ކުޑަކުދިންނާއި އަންހެނުންނެވެ.
