ނަވާރަ އަހަރުން ދަށުގެ ޔޫތު ޗެމްޕިއަންޝިޕް އަންނަ މަހުގެ ފަށަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.
އެފްއޭއެމް އިން ބުނީ، މިހާރު ރޭވިފައި އޮތްގޮތުން، އަންނަ މަހުގެ ނުވަ ވަނަ ދުވަހު ޔޫތު ޗެމްޕިއަންޝިޕް ފަށަން މަސައްކަތް ކުރަމުން އަންނަ ކަމަށެވެ.
އެ ގޮތުން، އެފްއޭއެމް އިން ހާމަކުރީ މި ފަހަރުގެ މުބާރާތުގައި ކްލަބް ވެލެންސިއާ އާއި ވިކްޓަރީ ސްޕޯޓްސް ކްލަބް ނޫން، ފުރަތަމަ ޑިވިޝަނުގެ އަށް ކްލަބް ބައިވެރިވެފައިވާ ކަމަށެވެ. އެ ގޮތުން، އެންމެ ފަހުގެ ޗެމްޕިއަން، ކްލަބް އީގަލްސް އާއި ރަނަރަޕް، ސުޕަ ޔުނައިޓެޑް ސްޕޯޓްސް (ސަސް)ގެ އިތުރުން، މާޒިޔާ ސްޕޯޓްސް އެންޑް ރެކްރިއޭޝަން، ބުރު ސްޕޯޓްސް ކްލަބާއި އޮޑި ސްޕޯޓްސް ކްލަބް، ކްލަބް ގްރީން ސްޓްރީޓްސް، ޓީސީ ސްޕޯޓްސް ކްލަބް އަދި ޔުނައިޓެޑް ވިކްޓަރީ އެވެ.
މުބާރާތުގެ ފޯމެޓް ރޭވިފައި އޮތީ ދެ ގްރޫޕަށް ބަހާލައިގެން ކުޅުމަށް ފަހު، ކޮންމެ ގްރޫޕަކުން ދެ ޓީމެއް ސެމީ އަށް ދަތުރުކޮށް، އެ އަށް ފަހު ފައިނަލް ކުޅޭ ގޮތަށެވެ.
މިިއީ، އެފްއޭއެމް އިން 19 އަހަރުން ދަށަށް ހާއްސަކޮށް މުބާރާތެއް ބާއްވާ ތިން ވަނަ ފަހަރެވެ. އެންމެ ފުރަތަމަ 2018 ވަނަ އަހަރު ބޭއްވި މުބާރާތް ކްލަބް ގްރީން ސްޓްރީޓްސް އިން ކާމިޔާބުކުރިއިރު، އޭގެ ފަހުން، 2022 ވަނަ އަހަރު ބޭއްވި މުބާރާތް ކާމިޔާބުކުރީ އީގަލްސް އިންނެވެ. އީގަލްސް އިން އެ ފަހަރު ތަށި އުފުލާލީ، ފ. ނިލަންދޫ ޓާފް ދަނޑުގައި ކުޅުނު ފައިނަލް މެޗުގައި، ސަސް އަތުން 1-0 އިން މޮޅުވެގެންނެވެ.
އީގަލްސް އާއި ބުރު ސްޕޯޓްސް ކްލަބަށް ކޯޗުކޮށްދީފައިވާ ނިމާ: އޭނާ ވަނީ ޔޫތު ޗެމްޕިއަންޝިޕް ފަސްކުރަން ޖެހޭތީ ކަންބޮޑުވުންފާޅުކޮށްފައި.-- ފޮޓޯ: އަދަދު ފައިލް ފޮޓޯ
މުބާރާތް ފަސްކުރަން ޖެހޭތީ ކޯޗުންގެ ކަންބޮޑުވުން
މި ފަަހަރުގެ ޔޫތު ޗެމްޕިއަންޝިޕް ބާއްވަން ފުރަތަމަ ޝެޑިއުލްކުރީ މި މަހުގެ 20 ވަނަ ދުވަހަށެވެ. އެ އަށް ފަހު، އަންނަ މަހުގެ އެއް ވަނަ ދުވަހު ބާއްވަން ތާވަލުކުރުމަށް ފަހު، އަނެއްކާ ވެސް މި ވަނީ ނުވަ ވަނަ ދުވަހަށް ފަސްކޮށްފަ އެވެ.
އެނގިފައިވާ ގޮތުގައި، މުބާރާތް ފަސްކުރަން ޖެހިފައިވަނީ، ގަލޮޅު ދަނޑުގެ ލައިޓްގެ މަސައްކަތް އެއްކޮށް ނިމެންދެނެވެ. ގަލޮޅު ދަނޑުގެ ލައިޓްތަކަށް ދިމާވެފައިވާ މައްސަލަ ހައްލުކުރަން، ސިފައިންގެ ވެލްފެއާ ޕްރައިވެޓް ލިމިޓެޑް (ސިވެކް)އާ ހަވާލުކޮށްފައިވަނީ، ޖެނުއަރީ މަހު ފަހުކޮޅުގަ އެވެ.
އެ ގޮތުން، 3.9 މިލިއަން ރުފިޔާ އަށް، ސިވެކްއާ ހަވާލުކުރި މި މަސައްކަތް، ފަށާތާ 30 ދުވަހުގެ ތެރޭގައި ނިންމަން އޭރު ވަނީ ހާވަލުކޮށްފަ އެވެ.
މިދިޔަ އާދިއްތަ ދުވަހު، ސްޕޯޓްސް މިނިސްޓްރީން ހާމަކޮށްފައިވާ ގޮތުގައި، އަންނަ މަހުގެ ކުރީކޮޅު މަސައްކަތް ނިންމާލެވޭނެ އެވެ.
އެންމެ ފަހުން މި މުބާރާތް ބޭއްވި ފަހަރު އީގަލްސް އަށް ތަށި ހޯދައިދިން ކޯޗު، އަހުމަދު ނިމާދު (ނިމާ) ވަނީ މުބާރާތް ފަސްވާތީ ކަންބޮޑުވުން ފާޅުކޮށްފަ އެވެ. އެ ގޮތުން، ނިމާ ބުނީ، އެފްއޭއެމް އިން ރާވާ ހިންގާ މުބާރާތްތަކަށް ސަރުކާރުން އަހައްމިއްޔަތުކަން ދޭން ޖެހޭ ވަރަށް ނުދޭ ކަމަށެވެ. އަދި މި ކަމުގެ ގެއްލުން ލިބެނީ، މުބާރާތުގައި ބައިވެރިވާ ކްލަބްތަކާއި އެ ކްލަބްތަކުގައި ތިބި ކުޅުންތެރިން ކަމަށް ނިމާ ބުނެފައިވެ އެވެ.
"މިހެން މުބާރާތް ވާނުވާ ނޭނގި ދިގުލައިގެންދާ ކޮންމެ ފަހަރަކު އެތައް ހަރަދެއް ބޮޑުވޭ. އަދި ކުުޅުންތެރިންނަށް ވެސް އެތައް ދަތިތަކެއް ކުރިމަތިވޭ. މިހެން ކިޔާނެ ކަމެއް ނެތް، މިއީ ވަރަށް ވާހަކަ. ތި ބަޔަކު ހިތުން ތިކުރަނީ އެފްއޭއެމް އަށް ޖެއްސުން، އެކަމަކު ހަނާވަނީ ކްލަބްތަކާއި މި ގައުމުގެ ޒުވާނުން، ޝުކުރިއްޔާ،" ޒުވާން ކުޅުންތެރިން ފުޓްބޯޅަ އަށް ނެރުމުގައި ހިންގުންތެރި މަސައްކަތްތަކެއް ކުރަމުން އަންނަ ނިމާ، އޭނާގެ ފޭސްބުކް އެކައުންޓް މެދުވެރިކޮށް، ހާމަކޮށްފައިވެ އެވެ.
