ލަންޑަން (މެއި 28) - ލެސްޓާ ސިޓީގެ ކޯޗު އެންޒޯ މަރެސްކާގެ ޑީލް ނިންމަން ޗެލްސީން 10 މިލިއަން ޑޮލަރު ހަރަދުކުރާ ކަމަށް ރިޕޯޓްތައް ބުނެފި އެވެ.
މިދިޔަ ސީޒަނުގައި ލެސްޓާ ސިޓީ އަށް އިނގިރޭސި ދެ ވަނަ ޑިވިޝަނުގެ ޗެމްޕިއަންކަން ހޯދައިދިން ކޯޗު މަރެސްކާ ގެންނަން ޗެލްސީން އަންނަނީ މަޝްވަރާ ކުރަމުންނެވެ. އެ ގޮތުން، ލެސްޓާއާ އެކު، މަރެސްކާ ހަދާފައިވާ އެއްބަސްވުން އުވާލަން ދައްކަން ޖެހޭ 10 މިލިއަން ޑޮލަރު ދޭން ޗެލްސީ ވަނީ އެއްބަސްވެފަ އެވެ.
ޗެލްސީގެ ދެ ސްޕޯޓިން ޑިރެކްޓަރުން ކަމަށްވާ، ޕޯލް ވިންސްޓަންލީ އާއި ލޯރެންސް ސްޓެވާޓް، މި ދެ ދުވަހު، މަރެސްކާ އާއި އޭނާގެ އޭޖެންޓާ އެކު ބައްދަލުވުންތަކެއް ބާއްވާނެ އެވެ.
މަރެސްކާ އަށް ޗެލްސީން ހުށަހަޅަނީ ދެ އަހަރުގެ ކޮންޓްރެކްޓެއް ކަމަށް ރިޕޯޓްތައް ބުނެ އެވެ. އެ އެއްބަސްވުމުގައި، އިތުރު އެއް އަހަރަށް ކޮންޓްރެކްޓް އާ ކުރަން ހިމަނާނެ ކަމަށް ވެސް އެ ރިޕޯޓްގައިވެ އެވެ.
އިޓަލީ އަށް އުފަން މަރެސްކާ, ކޯޗިން ކެރިއަރު ފެށީ މެންޗެސްޓާ ސިޓީންނެވެ. ޕެޕް ގާޑިއޯލާގެ ކޯޗިން ސްޓާފުންގެ ތެރޭގައި މަަަސައްކަތްކުރުމަށް ފަހު މަރެސްކާ ވަނީ 2021 ވަނަ އަހަރު ޕާމާ އަށް ކޯޗުކޮށްދީފަ އެވެ. އޭނާ, މިހާރުގެ ކްލަބް ލެސްޓާއާ ހަވާލުވީ, މިދިޔަ އަހަރު އެވެ. އެއީ, ތިން އަހަރުގެ ކޮންޓްރެކްޓެއްގަ އެވެ.
މަރެސްކާ ވެގެންދާނީ, ޗެލްސީ ހިންގުމާ ޓޮޑް ބޯލީ ހަވާލުވި ފަހުން އެ ޓީމަށް އިރުޝާދުދޭނެ ހަ ވަނަ ކޯޗަށެވެ. އެ ގޮތުން، ބޯލީ ހަވާލުވިއިރު، ހުރި ޖަރުމަނުގެ ކޯޗު ތޯމަސް ޓުޗެލް ވަކިކޮށް، އޭނާ ވަނީ ބްރައިޓަންގެ ކޯޗަކަށް ހުރި ގްރަހަމް ޕޮޓާ ގެނެސްފަ އެވެ. އެ ފަހުން، ޕޮޓާ ވަކިކުރުމަށް ފަހު، ވަގުތީ ގޮތުން ޗެލްސީ އަށް ބްރޫނޯ ސޯލްޓާ އާއި ފްރޭންކް ލަމްޕާޑް ކޯޗުކޮށްދިނެވެ.
މި ސީޒަން ފެއްޓުމުގެ ކުރިން ދެ އަހަރުގެ ކޮންޓްރެކްޓެއްގައި ޗެލްސީއާ ހަވާލުވި މައުރީސިއޯ ޕޮޗެޓީނޯ ވަނީ އެއް އަހަރަށް ފަހު އެ ޓީމު ދޫކޮށްލައިފަ އެވެ.
