ޣައްޒާގެ ރަފަހުގައި މީހުންނަށް ސަލާމަތުން ތިބެވޭނެ "ސޭފް ޒޯނެއް" ކަމަށް އިޒްރޭލުން ބުނި ސަރަހައްދަށް ވެސް އިޒްރޭލުން ހަމަލާދީ ގިނަ ބަޔަކު މަރާލައިފި އެވެ.
ރައްކާތެރި ސަރަހައްދެއް ކަމަށް ބުނެ، މީހުން ފޮނުވުމަށް ފަހު ހަމަލާ ދިނުމަކީ އިޒްރޭލުން ޣައްޒާގައި ހިންގަމުން އަންނަ ގަތުލުއާއްމުގައި މީގެ ކުރިން ވެސް އެތައް ފަހަރަކު ތަކުރާރުކޮށްފައިވާ ޖަރީމާ އެކެވެ.
ރަފަހުގައި ތިބި އޮފިޝަލުންނާ ހަވާލާދީ އަލްޖަޒީރާ ބުނީ ޓެންޓަކަށް އަމާޒުކޮށްދިން ހަމަލާގައި 35 ފަސްލަތީން މީހުން މަރުވެފައިވާއިރު، އޭގެ ތެރޭގައި ގިނައީ ކުޑަކުދިންނާއި އަންހެނުން ކަމަށެވެ.
ޣައްޒާގައި ހިންގަމުން އަންނަ ބޮޑު ގަތުލު އާއްމުގެ އިތުރުން ހުޅަނގުއައްސޭރީގައި ވެސް އިޒްރޭލުން އަންނަނީ ފަލަސްތީނުމީހުންނާ ދެކޮޅަށް ޖަރީމާތައް ހިންގަމުންނެވެ. އެތަނުގައި ބައެއް ވެހިކަލްތައް ގޮއްވައިލުމުގެ އިތުރުން ބައެއް ގެތަކަށް ވަދެގަނެ، ބައެއް ގެތަކުގައި ހުޅު ވެސް ޖެހި އެވެ.
ފާއިތުވެދިޔަ 24 ގަޑިއިރު ތެރޭގައި އިޒްރޭލުން ޣައްޒާގެ އެކި ސަރަހައްދުތަކަށް ދިން ހަމަލާތަކުގައި 160 އަށްވުރެ ގިނަ މީހުން މަރުވެފައިވާ ކަމަށް ވެސް އަލްޖަޒީރާއިން ބުނެ އެވެ.
ތަނެއް ދޮރެއް ނުބަލައި އާއްމުންގެ ބޮލަށް ބޮންއެޅުމަށް ފަހު އާދައިގެ މަތިން އިޒްރޭލުން ބުނީ ހަަމަލާތަކުގައި ހަމާސްގެ އިސް ބަޔަކު މަރުވެފައިވާ ކަަމަށެވެ. ނަމަވެސް މިކަމާ ގުޅިގެން ހަމާސްއިން އަދި އެއްވެސް އެއްޗެއް ބުނެފައެއް ނުވެ އެވެ.
ރަފަހުއަށް ދޭ ހަމަލާތައް ހުއްޓައިލުމަށް އައިސީޖޭއިން އަމުރުކުރީ މެއި، 24 ގަ އެވެ. އެ އަމަރުގައި ބުނެފައި ވަނީ ފަަލަސްތީނުގެ ރައްޔިތުންނަށް ގެއްލުން ލިބޭ ގޮތަށް އިޒްރޭލުން ހިންގާ މިލިޓަރީ ހަރަކާތްތައް ހުއްޓާލުމަށެވެ.
އޮކްޓޯބަރު، 2023، ގައި އިޒްރޭލުން ފަލަސްތީނާ ދެކޮޅަށް ފެށި ގަތުލުއާންމުގައި 35،000 އަށް ވުރެ ގިނަ މީހުން ވަނީ މަރާލައިފަ އެވެ. އޭގެ ތެރޭގައި 15،000 އަށް ވުރެ ގިނަ ކުޑަކުދިން ހިމެނެ އެވެ.
