އަންގާރަ ދުވަހު ހުވާ ކުރާ 20 ވަނަ މަޖިލީހުގެ މެންބަރުންނަށް މަޖިލީހުގެ އިދާރާއަށް އަހުލުވެރިކުރުވުމުގެ ސެޝަނެއް މިއަދު ކުރިއަށް ގެންގޮސްފި އެވެ.
މަޖިލިސް އިދާރާއިން މިއަދު ސޯޝަލް މީޑިއާގައި ހިއްސާކޮށްފައިވާ ވީޑިއޯ އަދި ވެބްސައިޓުގައި ހިއްސާކޮށްފައިވާ ފޮޓޯތަކުން ފެންނަ ގޮތުގައި މިއަދު މި ސެޝަނުގައި 20 ވަނަ މަޖިލީހުގައި ތިއްބަވާ 93 މެންބަރުންގެ ތެރެއިން ގިނަ މެންބަރުން ބައިވެރިވެވަޑައިގެންނެވި އެވެ.
ދައުރު ނިިމިފައިވާ 19 ވަނަ މަޖިލީހުގެ ރައީސް، ހިތަދޫ މެދު ދާއިރާގެ މެންބަރު މުހައްމަދު އަސްލަމްވެސް މިއަދުގެ ސެޝަންގައި ބައިވެރިވެވަޑައިގެން ކުރިއަށް އޮތް މަޖިލީހުގެ މެންބަރުންނާ މުހާތަބުކުރައްވައި ވާހަކަދެއްކެވި އެވެ. 20 ވަނަ މަޖިލީހަށް އަސްލަމް އިންތިހާބުވެވަޑައިގެންފައެއް ނުވެ އެވެ.
އަސްލަމްގެ އިތުރުން އެކި ދާއިރާތަކުން މަޖިލީހުގެ އިދާރާގައި މަސައްކަތް ކުރާ މުވައްޒަފުން މިއަދުގެ ސެޝަނުގައި ބައިވެރިވެ ދެ ދުވަސް ތެރޭ މަޖިލީހަށް ވަންނަވާ މެންބަރުންނަށް އެހީތެރެވެދީފައިވެ އެވެ.
އެޕްރީލް 21، ގައި ބޭއްވި މަޖިލިސް އިންތިހާބުގައި ޕީއެންސީއިން 66 ގޮނޑި ކާމިޔާބު ކުރި އިރު، އަމިއްލަ ގޮތުން ވާދަކޮށް އިންތިހާބު ކާމިޔާބު ކުރި އަށް މެންބަރަކު ވަނީ ޕީއެންސީއާ ގުޅިފަ އެވެ. އޭގެ ތެރޭގައި ސަރުކާރުގެ ތާއީދު އޮވެގެން ވާދަކުރި މީހުން ވެސް ހިމެނެ އެވެ. މި މެންބަރުންނާއެކު އެކު ޖުމްލަ މިވަގުތު ޕީއެންސީގެ 75 މެންބަރަކު މަޖިލީހުގައި އެބަތިއްބެވެ.
ހަމައެހެންމެ ޖޭޕީގެ ލީޑަރު ގާސިމް އިބްރާހިމް އާއި އެމްއެންޕީގެ ލީޑަރު މުހައްމަދު ނާޒިމްގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދުގެ އިތުރުން އެ ޕާޓީއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް ވެސް މަސައްކަތް ކުރައްވަނީ ސަރުކާރާ އެކީގަ އެވެ.
މިއާއެކު 20 ވަނަ މަޖިލީހުގައި ސަރުކާރުން ބޭނުންވާ ގޮތަށް ވޯޓު ދޭން މަޖިލީހުގައި ތިބޭނެ މެމްބަރުންގެ އަދަދު ވަނީ 79 އަށް އަރަ އެވެ. މިއީ މިދިޔަ މަޖިލީހުގައި އެމްޑީޕީއަށް ލިބުނު ވަރަށް ވުރެ ވެސް ބޮޑު އަގުލަބިއްޔަތެކެވެ. އިދިކޮޅު އެމްޑީޕީއަށް މިފަހަރުގެ މަޖިލިސް އިންތިހާބުގައި ކާމިޔާބު ކުރެވިފައިވަނީ އެންމެ 12 ގޮނޑި އެވެ.
