އެކުގައި ޓީމެއްގެ ގޮތުގައި މަސައްކަތްކޮށްގެން، ކޮންމެ ޓާގެޓަކަށް ވެސް ވާސިލްވެވޭނެ ކަމަށް އެތުލެޓިކްސް އެސޯސިއޭޝަންގެ އާ ރައީސް، މުސްތަފާ މުހައްމަދު (މުސްތޮ) ވިދާޅުވެއްޖެ އެވެ.
އެތުލެޓިކްސް އެސޯސިއޭޝަންގެ ރައީސްކަމަށް މުސްތަފާ، އިންތިހާބުވެވަޑައިގަތީ، ވާދަވެރިއަކު ނެތުމުން، ނެގި ފެންނަ ނުފެންނަ ވޯޓުގެ ވެސް ބައިވެރިވި ހުރިހާ މެމްބަރުންގެ ފުރިހަމަ ތާއީދާ އެކު އެވެ.
މުސްތަފާއާ އެކު، އެތުލެޓިކްސް ހިންގާ ކޮމިޓީގައި ހިމެނޭ ކޮންމެ މަގާމަކަށް ވެސް މެމްބަރުން އިންތިހާބުވީ ވާދަވެރިއަކު ނެތި އެވެ.
ރައީސްގެ މަގާމަށް އިންތިހާބު ވުމަށް ފަހު ދިން އިންޓަވިއުގައި، މުސްތަފާ ވިދާޅުވީ އެތުލެޓިކްސް އެސޯސިއޭޝަންގެ އެކްސްކޯ (ހިންގާ ކޮމިޓީ) ތެރޭގައި އުޅުނު 12 ވަރަކަށް އަހަރުތެރޭ އޭނާގެ މަސައްކަތް މީހުން ބަލައިގަނެފައިވާ ކަމަށެވެ.
"އެތުލެޓިކްސްގައި މި އުޅެވުނު ދުވަސްތަކުގެ ތެރޭގައި، ފާހަގަވާ ކަމަކީ، އިންޑިވިޖުއަލް މީހަކަށް ވުރެ ބޮޑަށް އޭޒް އަ ޓީމު އެތުލެޓިކްސްގައި މި މަސައްކަތް ކުރެވެނީ، މުބާރާތެއް ބޭއްވިޔަސް، ޓްރެއިން ކުރިޔަސް، ކުރިއަށް އޮތްތަނުގައި ވެސް އެ ޓީމު ބްރޭކް ނުކޮށް އިތުރަށް ވަރުގަަދަ ކުރެވޭތޯ މި ބަލަނީ،" މުސްތަފާ ވިދާޅުވި އެވެ.
އޭނާ ވިދާޅުވީ، އެތުލެޓިކްސް އެސޯސިއޭޝަންގެ ހިންގާ ކޮމިޓީގައި އުޅެނީ، ވަރަށް އެކުވެރިކޮށް އުޅޭ ފަރާތްތަކެއް ކަމަށާއި އޭގެ ފައިދާ ވެސް އެބައޮތް ކަމަށެވެ.
"އެއްކޮށް އުޅޭ ބައެއް މި އުޅެނީ މީގެ ތެރޭގައި، އެސްކޯގައި ވިޔަސް، އެކްސްކޯ އިން ބޭރުގައި ވިޔަސް. ގާތްގަނޑަކަށް ހަމަ ފެމިލީއެއް ގޮތަށް މި މަސައްކަތް ކުރެވެނީ ހަމަ. ކޮންމެ ޓާގެޓެއް އެޗީވްކުރަން ވެސް އެންމެން އެއްކޮށް މި މަސައްކަތް ކުރެވެނީ. އެހެންވީމަ ފުދޭ ވަރަަކަށް ޔަގީންކަން އެބައޮތް. އެންމެ އުނދަގޫވާ ގަޑީގައި ވެސް. އެންމެންގެ ބެކިން (އެއްބާރުލުން) ލިބޭނެކަން،" މުސްތަފާ ވިދާޅުވި އެވެ.
"(ރައީސް ކަމަށް) ކުރިމަތިލި އެއް ސަބަބަކީ ވެސް ހަގީގަތުގައި ޓީމެއްގެ ގޮތުގައި މަސައްކަތް ކުރާތީވެ،"
ޔޫތު މިނިސްޓްރީގައި މީގެ ކުރިން ވަޒީފާ އަދާކުރެއްވި މުސްތަފާ އަކީ، މި ފަހުން އެތުލެޓިކްސްގެ އިސް ފަރާތެއްގެ ގޮތުގައި ވެސް މަސައްކަތް ކުރައްވަމުން އަންނަ ހިންގާ ކޮމިޓީގެ މެމްބަރެކެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ) އިން އެންމެ ފަހުން، ބޭއްވި އަހަރީ އާންމު ޖަލްސާގައި އެސޯސިއޭޝަންގެ ފަރާތުން ބައިވެރިވެވަޑައިގެންނެވީ މުސްތަފާ އެވެ. ބައިނަލްއަގުވާމީ ކުޅިވަރު މުބާރާތްތަކުގައި މިދިޔަ އަހަރު އެތުލެޓިކްސް އިން ވާދަކުރިއިރު، އެތުލީޓުންނާ ގާތުން މުސްތަފާ ވަނީ މަސައްކަތް ކުރައްވައިފަ އެވެ. އެ ގޮތުން، މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ޓީމުގެ މެނޭޖަރެއްގެ ގޮތުގައި ވެސް މަސައްކަތް ކުރެއްވި އެވެ.
މުސްތަފާ ވިދާޅުވީ، ކޮންމެ ކުޅިވަރެއްގައި ވެސް ތަރައްގީ ކުރެވޭނެ ކަންތައްތަކެއް ހުންނަ ގޮތަށް އެތުލެޓިކްސް ތެރޭގައި ވެސް ކުރެވޭނެ މުހިންމު ކަންތައްތަކެއް އެބަހުރި ކަމަށެވެ. އެ ގޮތުން، މުބާރާތްތައް މިހާރަށް ވުރެ ފުޅާކޮށް ފެންވަރު ރަނގަޅުކޮށް ބޭއްވުމަކީ މުސްތަފާގެ އަމާޒެކެވެ.
"މުބާރާތްތައް ވެސް މި ބޭއްވިގެންދަނީ ވަކި ސަރަހައްދުތަކެއްގައި އަދި. އެ މުބާރާތްތައް މުޅި ރާއްޖެ އަށް ފުޅާކުރެވޭތޯ މަސައްކަތް ކުރާނަން. އެ ކަންތައްތަކަށް ވިސްނާއިރު ގޮންޖެހުންތަކެއް ވެސް އެބަހުރި. ކެޕޭސިޓީ އިތުރުކުރަން، ފައިނޭންޝިއަލީ ޕްލަސް، މީހުން ވެސް ތަރައްގީ ކުރެވެން އެބަޖެހޭ. އެ ކަންތައްތަކާ އެއްކޮށް ދިގު މުއްދަތެއްގެ ތެރޭގައި ވިޔަސް، އިންޓަނޭޝަނަލީ ރަނގަޅު ހިސާބަކަށް ދިއުން، މުޅި އެސޯސިއޭޝަންގެ ވެސް އުންމީދަކީ،" މުސްތަފާ ވިދާޅުވި އެވެ.
އެތުލެޓިކްސް އެސޯސިއޭޝަންގެ ރައީސްކަން މިދިޔަ 12 ވަރަކަށް އަހަރު ފުރުއްވި މުހައްމަދު ތޮލާލް އަކީ، މިހާރު ކޮމިޝަނާ އޮފް ސްޕޯޓްސް އެވެ. ތޮލާލް، އެ މަގާމުގެ ޒިންމާއާ ހަވާލުވާން އެތުލެޓިކްސް ރައީސް ކަމުން އިސްތިއުފާ ދެއްވުމުން، މިދިޔަ ފަސް ވަރަކަށް މަހު އެތުލެޓިކްސް ރައީސްގެ ޒިންމާ ނެންގެވީ، ނައިބު ރައީސް، އަހުމަދު އަޒީލް އެެވެ.
