އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް މުސްތަފާ މުހައްމަދު (މުސްތޮ) އިންތިހާބުވެވަޑައިގެންފި އެވެ.
މީރުމާ ހޮޓަލުގައި ރޭ ބޭއްވި އެތުލެޓިކްސް އެސޯސިއޭޝަންގެ އިންތިހާބުގައި، ކޮންމެ މަގާމަކަށް ކުރިމަތިލެއްވީ އެންމެ ފަރާތެކެވެ. އެހެންވެ، ކޮންމެ މަގާމަކަށް ވެސް ނެގި ފެންނަ ނުފެންނަ ވޯޓުގައި ކޮންމެ މެމްބަރަކު ވެސް ހޮވުނީ، ބައިވެރިވި، 15 މެމްބަރުންގެ ވޯޓާ އެކު، ފުރިހަމަ ތާއީދު ލިބިގެންނެވެ.
ކުރިއަށް އޮތް ދައުރަށް، 2024- 2028 އެތުލެޓިކްސް އެސޯސިއޭޝަންގެ ރައީސަކަށް ހޮވުނު މުސްތަފާ އަކީ، އެތުލެޓިކްސްގެ ހިންގާ ކޮމިޓީގައި ދެ ދައުރެއް ފުރިހަމަކޮށްފައިވާ ފަރާތެކެވެ.
ޔޫތު މިނިސްޓްރީގައި މީގެ ކުރިން ވަޒީފާ އަދާކުރެއްވި މުސްތަފާ އަކީ، މި ފަހުން އެތުލެޓިކްސްގެ އިސް ފަރާތެއްގެ ގޮތުގައި ވެސް މަސައްކަތް ކުރައްވަމުން އަންނަ ހިންގާ ކޮމިޓީގެ މެމްބަރެކެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ) އިން އެންމެ ފަހުން، ބޭއްވި އަހަރީ އާންމު ޖަލްސާގައި އެސޯސިއޭޝަންގެ ފަރާތުން ބައިވެރިވެވަޑައިގެންނެވީ މުސްތަފާ އެވެ. ބައިނަލްއަގުވާމީ ކުޅިވަރު މުބާރާތްތަކުގައި މިދިޔަ އަހަރު އެތުލެޓިކްސް އިން ވާދަކުރިއިރު، އެތުލީޓުންނާ ގާތުން މުސްތަފާ ވަނީ މަސައްކަތް ކުރައްވައިފަ އެވެ. އެ ގޮތުން، މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ޓީމުގެ މެނޭޖަރެއްގެ ގޮތުގައި ވެސް މަސައްކަތް ކުރެއްވި އެވެ.
އެތުލެޓިކްސް އެސޯސިއޭޝަންގެ ރައީސްކަން މިދިޔަ 12 ވަރަކަށް އަހަރު ފުރުއްވީ، މިހާރުގެ ކޮމިޝަނާ އޮފް ސްޕޯޓްސް މުހައްމަދު ތޮލާލް އެވެ. ކޮމިޝަނަރުގެ މަގާމަށް އައްޔަނުކުރެއްވުމާ އެކު، ތޮލާލް ވަނީ އެތުލެޓިކްސް ރައީސްގެ މަގާމުން އިސްތިއުފާ ދެއްވައިފަ އެވެ.
ތޮލާލް އަށް ފަހު، އެތުލެޓިކްސްގެ ރައީސްގެ ޒިންމާ ނެންގެވީ، މިހާރުގެ ނައިބު ރައީސް، އަހުމަދު އަޒީލް އެވެ. އަޒީލް ވަނީ، ކުރިއަށް އޮތް ދައުރަށް ވެސް ނައިބު ރައީސަކަށް އިންތިހާބުވެފަ އެވެ.
ހިންގާ ކޮމިޓީގެ އެހެން މަގާމުތަކަށް ހޮވިފައިވާ ފަރާތްތަކަށް ބަލާއިރު، ހަޒާންދާރުގެ މަގާމަށް ހަސްނާއު ރަޝީދު ހުސައިން، އާންމު މެންބަރުންގެ ގޮތުގައި މިހާރު ވެސް އެ މަގާމު ފުރުއްވަމުން އަންނަ ހުސެއިން އަމީންގެ އިތުރުން، ކުރިން އެ މަގާމުގެ މަސްއޫލިއްޔަތު އަދާކުރެއްވި ދެ މެންބަރުން ކަމަށްވާ މުޙައްމަދު ޝާހިދު (ޝާޑު) އާއި މުޙައްމަދު ޝުޖާއު (ސުޖާ) ވަނީ އިންތިހާބުވެފަ އެވެ. އަދި އަންހެން މެންބަރަކަށް އިންތިހާބުވީ ކުރީގެ އެއް ވަނަ ދުވުންތެރިޔާ، އަދި ކޯޗެއްގެ ގޮތުގައި މަސައްކަތް ކުރަމުން އަންނަ ޔަޒުނީ ނަޝީދާ (ޔަޒޫ) އެވެ.
