މެޑްރިޑް (މެއި 23) - ޓޯނީ ކްރޫސް މި ފަހަރުގެ ޔޫރޯ ފުޓްބޯޅަ މުބާރާތަށް ފަހު ރިޓަޔާކުރަން ނިންމާފައިވުމާ އެކު، އޭނާ ކުޅެމުން އަންނަ ރެއާލް މެޑްރިޑުން އެ ޓީމުގެ ތަޖުރިބާކާރު މިޑްފީލްޑަރު، ލޫކަ މޮޑްރިޗްގެ ކޮންޓްރެކްޓް އާ ކުރަން ނިންމައިފި އެވެ.
ރެއާލުން ވަނީ ކްރޫސްގެ ކޮންޓްރެކްޓް އަންނަ ސީޒަނަށް އާ ކޮށްފަ އެވެ. އެކަމަކު، މިހާތަނަށް މޮޑްރިޗް، 38، ގެ ކޮންޓްރެކްޓް އާ ކުރުމުގެ ވާހަކަ ދެކެވިފައިނުވާއިރު، އޭނާ އެ ޓީމު ދޫކޮށްލާނެ ކަމަށް އޮތީ ބެލެވިފަ އެވެ.
އެކަމަކު، ކްރޫސް ރިޓަޔާކުރަން ނިންމުމާ އެކު، ރެއާލުން އަވަސްވެ، މިހާރު ވަނީ މޮޑްރިޗަށް އާ ކޮންޓްރެކްޓެއް ދޭން ނިންމައިފަ އެވެ.
އަންނަ ސެޕްޓެމްބަރު މަހު 39 އަހަރު ފުރޭ މޮޑްރިޗް، ރެއާލާ އެކު، އާ ކޮންޓްރެކްޓެއްގައި ސޮއިކޮށްފިނަމަ، އޭނާ އަށް އެ ކްލަބްގެ ރެކޯޑެއް މުގުރާލުމުގެ ފުރުސަތު ލިބޭނެ އެެވެ. އެއީ، ރެއާލަށް ކުޅޭ އެންމެ ދުވަސްވީ ކުޅުންތެރިޔާގެ ރެކޯޑެެވެ. ރެއާލްގެ ތާރީހުގައި، އެ ޓީމަށް ކުޅުނު އެންމެ ދުވަސްވީ ކުޅުންތެރިއަކީ، ފެރެންކް ޕުސްކަސް އެވެ.
ޕުސްކަސް، 1966 ވަނަ އަހަރު ރެއާލަށް ކުޅުނުއިރު އުމުރަކީ 39 އަހަރާއި އެއް މަސް ދުވަހެވެ.
ދާދި ފަހުން މޮޑްރިޗް ދިން އިންޓަވިއުއެއްގައި ވަނީ އެ ކްލަބްގައި މަޑުކުރަން ބޭނުންވާ ކަމަށް ބުނެފަ އެވެ. ރެއާލުން މޮޑްރިޗަށް ދޭން މަޝްވަރާ ކުރަނީ، އެއް އަހަރުގެ ކޮންޓްރެކްޓެކެވެ.
ކްރޫސް ނެތްތަނަށް ރެއާލުން ހޯދަން މަސައްކަތްކުރާ އެއް މިޑްފީލްޑަރަކީ، ލިވަޕޫލަށް ކުޅޭ އާޖެންޓީނާގެ އަލެކްސިސް މެކް އަލިސްޓާ އެވެ.
ޓޮޓެންހަމް ހޮޓްސްޕާސް ދޫކޮށް، 35 މިލިއަން ޑޮލަރުގެ ފީ އަކަށް، މޮޑްރިޗް، 2012 ވަނަ އަހަރު ރެއާލަށް ސޮއިކުރިއިރު، އޭނާ އަކީ އެ ކްލަބާ އެކު، އެންމެ ގިނަ މުބާރާތް ކާމިޔާބުކުރި އެއް ކުޅުންތެރިޔާ އެވެ. މޮޑްރިޗް ވަނީ ރެއާލާ އެކު، 25 ތަށި އުފުލާލައިފަ އެވެ.
