އަންނަ މަހު 15 ވަނަ ދުވަހު ފަށަން ނިންމާފައިވާ ރާއްޖޭގެ ފުޓްބޯޅަ ސީޒަން ފެށުން ފަސްކުރަން ރަސްމީކޮށް އެއްވެސް ކްލަބަކުން އެދިފައިނުވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހާމަކޮށްފި އެވެ.
ކްލަބްތަކާ މަޝްވަރާކުރުމަށް ފަހު، އެފްއޭއެމް އިން ފުޓްބޯޅަ ސީޒަނުގެ ކަލަންޑަރު ފައިނަލް ކުރިއިރު، އަންނަ މަހުގެ 15 ވަނަ ދުވަހު ސީޒަން ހުޅުވާ ޗެރިޓީ ޝީލްޑް މެޗު ކުޅެން ވަނީ ޝެޑިއުލްކޮށްފަ އެވެ.
މާޒިޔާ ސްޕޯޓްސް އެންޑް ރެކްރިއޭޝަނާއި ކްލަބް އީގަލްސްއާ، މި ފަހަރު ވެސް ޗެރިޓީ ޝީލްޑް މެޗުގައި ވާދަކުރާއިރު، އެ ދެ ޓީމުގެ އިތުރުން އަދި އެއްވެސް ޓީމެއް ފުރަތަމަ ޑިވިޝަނަށް ޕްރެކްޓިސް ފަށާފައިނުވެ އެވެ.
މި ފަހަރުގެ ފުޓްބޯޅަ ސީޒަން ފެށުމުގެ ކުރިން ޓްރާންސްފާ ބާޒާރުގެ ކަންކަން ވެސް ފެންނަނީ އެހެން ސީޒަނަށް ވުރެ ދަށްކޮށެވެ. އެނގިފައިވާ ގޮތުގައި، މިދިޔަ ސީޒަނުގައި ޓީމުތަކަށް ލިބެން ޖެހޭ ފައިސާގެ ކަންކަން ހަމަނުޖެހޭތީ، ކުރިއަށް އޮތް ސީޒަނަށް ތައްޔާރުވާން ގިނަ ޓީމުތަކުގައި ފައިސާއެއް ނެތެވެ.
މި ހާލަތުގައި ފުޓްބޯޅައިގެ ކަންކަން އޮތްއިރު، އެފްއޭއެމް އިން މި މަހުގެ 10 ވަނަ ދުވަހު، "އަދަދު" އިން ކުރި ސުވާލެއްގެ ޖަވާބުގައި ބުނެފައިވަނީ، ސީޒަން ފަށަން ކަނޑައެޅި ތާރީހުގައި އެކަން ކުރެވޭތޯ މަސައްކަތް ކުރަމުން އަންނަ ކަމަށެވެ.
"އަދަދު" އިން މިއަދު ކުރި ސުވާލަކަށް ޖަވާބު ދެއްވަމުން، އެފްއޭއެމްގެ ޖެނެރަލް ސެކްރެޓަރީ، ޖައުޝަން ޝަރީފް (ޖައު) ވިދާޅުވީ، ފުޓްބޯޅަ ސީޒަން ފެށުން ފަސްކުރަން އެއްވެސް ކްލަބެއްގެ ފަރާތުން ރަސްމީކޮށް ހުށަހެޅުން ލިބިފައިނުވާ ކަމަށެވެ.
ފުރަތަމަ ޑިވިޝަންގެ ގިނަ ކްލަބްތަކުން އަންނަނީ ޓްރަޔަލްތައް ބާއްވައިގެން، 19 އަހަރުން ދަށުގެ ޔޫތު ޗެމްޕިއަންޝިޕަށް ތައްޔާރުވާން މަސައްކަތް ކުރަމުންނެވެ. އެ މުބާރާތް ފަށަން އެންމެ ފުރަތަމަ ތާވަލުކޮށްފައި އޮތީ، މި މަހު 20 ވަނަ ދުވަހު އެވެ.
މިހާރު ޝެޑިއުލްކޮށްފައި އޮތްގޮތުން ފުރަތަަމަ ޑިވިޝަން ކްލަބްތަަށް އޮތް ފުރަތަމަ މުބާރާތަކީ، ޕްރެޒިޑެންޓްސް ކަޕް އެވެ. އެ މުބާރާތް ފަށަން ކަނޑައަޅާފައި އޮތް ތާރީހަކީ، ޖޫން 22 އެވެ. ދިވެހި ޕްރިމިއާ ލީގު ފަށަން ތާވަލުކޮށްފައި އޮތީ، އޮގަސްޓް އެއް ވަނަ ދުވަހު އެވެ.
