ރިވައިވަލް ސްޕޯޓްސް ބެޑްމިންޓަން ޗެލެންޖް, 200 އަށްވުރެ ގިނަ ކުޅުންތެރިންނާ އެކު, މާދަމާ ފަށަން ތައްޔާރުވެއްޖެ އެވެ.
މި މަހު 20-24 އަށް އޭދަފުށީ ބެޑްމިންޓަން ކޯޓުގައި ކުރިއަށްދާ މި މުބާރާތުގައި އޭދަފުށީ ކުޅުންތެރިންގެ އިތުރުން, މާލޭގެ އެކަޑަމީތަކުގެ ކުޅުންތެރިންނާއި, ޅ. ނައިފަރު, ނ. ހޮޅުދޫ, އއ. ތޮއްޑޫގެ ކުޅުންތެރިން ވާދަކުރާނެ އެވެ. އަދި މި މުބާރާތުގައި ކުރިން ގައުމީ މުބާރާތް ކުޅުން ބައެއް ކުޅުންތެރިން ފެނިގެންދާނެ އެވެ.
މީގެ އިތުރުން ރިވައިވަލް ސްޕޯޓްސް އާއި ސްޕެޝަލް އޮލިމްޕިކްސް މޯލްޑިވްސް ގުޅިގެން, މި ފަހަރުގެ މުބާރާތުގައި ހަތަރު އަންހެން އަދި ހަތަރު ފިރިހެން ކުޅުންތެރިންނާއެކު, ހާއްސަ ކެޓަގަރީ އެއްގެ ކުޅުން ކުރިއަށްދާނެ އެވެ.
ރިވައިވަލްގެ މި ޗެލެންޖް މުބާރާތް ކުރިއަށް ދާނީ ދެ ޑިވިޝަނަކަށް ބަހާލައިގެންނެވެ. އެއީ ޖޫނިއާ އަދި މާސްޓާސް އެވެ. ޖޫނިއާ ބައިގައި ކުރިއަށް ދާނީ 10, 12, 14, 16 އަދި 18 އަހަރުން ދަށުގެ ކެޓަގަރީ ތަކެވެ. ދެން އޮތް، މާސްޓާސް ޑިވިޝަނުގައި ކުރިއަށް ދާނީ 35 އަދި 45 އަހަރުން މަތީގެ ކުޅުންތެރިންނަށް ހުޅުވާލައިގެން އަންހެން އަދި ފިރިހެން ސިންގަލްސް އަދި ޑަބަލްސްގެ މެޗުތަކެވެ.
ރިވައިވަލް އިން ވަނީ މި މުބާރާތުގެ ޗެމްޕިއަން އަދި ރަނަރަޕަށް ފައިސާގެ އިނާމު ދިނުމަށް ނިންމާފަ އެވެ. އެގޮތުން އިނާމުތަކުގެ ޖުމްލަ 60,000 ރުފިޔާ އަށް އަރާނެ އެވެ.
މިއީ، ރިވައިވަލް އިން މި އަހަރު ބާއްވާ ތިން ވަނަ މުބާރާތެވެ. މީގެ ކުރިން އެ ކްލަބުން ވަނީ، ޖޫނިއާ އޯޕަން މުބާރާތަކާއި އިންޓަ ރިސޯޓް މުބާރާތެއް ކާމިޔާބުކަމާ އެކު ނިންމައިލައިފަ އެވެ.
