މެޑްރިޑް (މެއި 18) - ސްޕެއިންގެ ރެއާލް މެޑްރިޑަށް ކުޅެމުން އަންނަ ކްރޮއޭޝިއާގެ ތަރި ލޫކަ މޮޑްްރިޗް އަންނަ ސީޒަނުގައި ވެސް ރެއާލުގައި މަޑުކުރަން ބޭނުންވާ ކަމަށް އޭނާ ބުނެފި އެވެ.
ރިޕޯޓުތައް ބުނާ ގޮތުން ރެއާލް މެޑްރިޑްގައި މޮޑްރިޗް މަޑުކުރަން ބޭނުންވާކަން އޭނާ ވަނީ ކުލަބްގެ މެނޭޖްމަންޓަށް އަންގާފަ އެވެ. އަދި ކުލަބުގައި އޭނާ މަޑުކުރެވެން އޮތީ މުސާރަ އުނިކުރާ ގޮތައް ކަމުގައި ވަނީނަމަ އެކަން ކުރަން ވެސް މޮޑްރިޗް ހުރީ ތައްޔާރަށް ކަމަށްވެސް ރިޕޯޓްތައް ބުނެ އެވެ.
ރެއާލުން 2012 ވަނަ އަހަރު މޮޑްރިޗްގެ ސޮއި ހޯދިއިރު, އެ ފަހުން މޮޑްރިޗް އަންނަނީ ރެއާލާއެކު ތަފާތު މޮޅަށް ކުޅެ ގިނަ ކާމިޔާބީތަކެއް ހޯދަމުންނެވެ. އެކަމަކު، އެ އަަހަރުގެ އެންމެ ގޯސް "ސޮޔެއްގެ" ގޮތުގައި ގިނަ ބަޔަކު ފާހަގަކުރީ މޮޑްރިޗްގެ ސޮއެވެ.
ދާދި ފަހުން މީޑިއާ އަށް ދިން އިންޓަވިއުގައި އޭރު މޮޑްރިޗް ރެއާލަށް ގެންދިޔަ ކޯޗު ހޯސޭ މޮރީނިއޯ ވަނީ މޮޑްރިޗް އަކީ އޭނާގެ ފަހުރު ކަމަށް ބުނެފަ އެވެ.
"އަހަރެންގެ ފަހުރަކީ މޮޑްރިޗް. މޮޑްރިޗް އޭރު ރެއާލަށް ގެންދިޔުމުން ގިނަ ބަޔެއް އަހަންނަށް ފާޑުކީ. މިއަދު 11،12،13 އަހަރުވީއިރު, ވެސް އެއް ކޮލެޓީ އެއްގައި މޮޑްރިޗް އެ އަންނަނީ ކުޅެމުން." މޮރީނިއޯ ބުންޏެވެ.
ރެއާލާ އެކު, ފަސް ޗެމްޕިއަންސް ލީގު މޮޑްރިޗް ކާމިޔާބުކުރިއިރު, އެ ޓީމާ އެކު, މޮޑްރިޗް ވަނީ ސްޕެނިޝް ލީގު ތިން ފަހަރު, ކާމިޔާބު ކޮށްފަ އެވެ.
މޮޑްރިޗަކީ ރެއާލްގެ ތާރީހުގައި އެންމެ ގިނަ ތަށި ހޯދި ކުޅުންތެރިޔާ ވެސް މެ އެވެ. މީގެ އިތުރުން 2018 ވަނަ އަހަރުގެ ބެލޮންޑިއޯ ވެސް މޮޑްރިޗް ވަނީ ހޯދައިފަ އެވެ.
