ބެންކޮކް، ތައިލެންޑް (މެއި 17) - ފަލަސްތީނަށް އަރައި، އިޒްރޭލުން ކުރަމުން އަންނަ ލާއިންސާނީ ހަނގުރާމައިގެ ސަބަބުން، އިޒްރޭލް ފުޓްބޯޅައިން ސަސްޕެންޑްކުރުމާ މެދު ގޮތެއް ނިންމުމުގައި ގާނޫނީ ލަފާ ހޯދަމުން އަންނަ ކަމަށް ފީފާ އިން ހާމަކޮށްފި އެވެ.
މިދިޔަ އޭޕްރީލް މަހު، ފަލަސްތީނު އެފްއޭ އިން ވަނީ އިޒްރޭލް ސަސްޕެންޑް ކުރަން ފީފާ އަށް ހުށަހަޅައިފަ އެވެ. މިއަދު، ތައިލެންޑްގެ ބެންކޮކްގައި ކުރިއަށްދާ ފީފާ ކޮންގްރެސްގައި، ޖޯޑަންގެ ފުޓްބޯޅަ އެސޯސިއޭޝަނުން ވަނީ ފަލަސްތީނުން އިޒްރޭލު ސަސްޕެންޑް ކުރަން ހުށަހަޅާފައިވާ ޕްރޮޕޯސަލަށް ތާއީދުކޮށްފަ އެވެ.
މި ކަމާ ގުޅޭ ގޮތުން، ފީފާގެ ރައީސް ޖިއާނީ އިންފަންޓީނޯ ވިދާޅުވީ، ފީފާ ކައުންސިލުން ގޮތެއް ނިންމާނީ، ގާނޫނީ ލަފާ ހޯދުމަށް ފަހު ކަމަށެެވެ.
ފަލަސްތީނުގެ ފުޓްބޯޅަ ފެޑެރޭޝަންގެ ރައީސް، ޖިބްރީލް ރަޖޫބް ވިދާޅުވީ، ފަލަސްތީނުގެ ފުޓްބޯޅަ އާއި އެ ގައުމުގެ ރައްޔިތުން އިންތިހާ އަށް ދަށުދަރަޖައިގެ ކަންކަން ތަހައްމަލު ކުރާއިރު ވެސް ފީފާ އިން މިކަމާ އަމަލެއް ނުކުރާތީ ކަންބޮޑުވާ ކަމަށެވެ.
"ފީފާ އިން ނިންމަނީތޯ ބައެއް ހަނގުރާމަ މާ މުހިންމު ކަމަށް. ނޫނީ ބައެއް މީހުންނަށް ލިބޭ އަނިޔާތޯ މުހިންމުވަނީ،" ރަޖޫބް ވިދާޅުވި އެވެ.
"އަހަރެން އެދެނީ، ތާރީހު ބުނާ ރަނގަޅު ފަޅީގައި ތިބުމަށް. އެތަން މިލިއަން މީހުންނަށް އެ ލިބެމުންދާ އަނިޔާ، ފުޓްބޯޅަ ކުޅުންތެރިން ވެސް ހިމެނޭ ގޮތަށް މި ޖެހޭ ދަތި ހާލު، ފީފާ އަށް ފެންނަން ޖެހޭ. މިކަމުގައި ބޯޅަ އޮތީ ފީފާގެ ކޮޮޅުގައި، ފީފާ ރައީސް މިިކަމާ ވިސްނަން ޖެހޭ،"
އިޒްރޭލް ފުޓްބޯޅަ އެސޯސިއޭޝަނުން ވެސް ވަނީ މި ކަމުގައި ފީފާ އިން ރަނގަޅަށް ވިސްނާފައި ކަންކަން ނިންމަން ޖެހޭ ކަމަށް ބުނެފަ އެވެ.
