މެޑްރިޑް (މެއި 15) - ސްޕެނިޝް ލީގުގައި ޗެމްޕިއަން ރެއާލް މެޑްރިޑުން އަމިއްލަ ދަނޑުގައި ކުޅުނު މެޗުގައި ޑިޕާޓިވޯ އަލަވޭސް އަތުން، 5-0 އޮމް ފަސޭހަ މޮޅެއް ހޯދައިފި އެވެ.
ރޭގެ މެޗުގެ ކުރިން ރެއާލުން ވަނީ އެ ޓީމުން ކާމިޔާބުކުރި 36 ސްޕެނިޝް ލީގު ތަށި ސަޕޯޓަރުންނަށް ދައްކާލައިފަ އެވެ.
މި މެޗުގެ 10 ވަނަ މިނެޓުގައި ރެއާލުން ވަނީ ގޯލު ޖަހާ ލީޑު ނަގާދީފަ އެވެ. މި ގޯލު އެ ޓީމަށް ޖަހާދިނީ ޖޫޑް ބެލިންހަމް އެވެ. ޓޯނީ ކްރޫސް ދިން ޕާސް, ބެލިންހަމް ފޮނުވާލީ ކީޕަރު ބޯމަތިން ގޯލުުގެ ތެރެއަށެވެ. މިއީ ލީގުގައި އޭނާ ޖެހި 19 ވަނަ ލަނޑެވެ. ލަނޑު ލިސްޓުގެ ކުރީގައި އޮތީ ބެލިންހަމް އެވެ.
ރެއާލުގެ ދެވަނަ ލަނޑު މެޗުގެ 27 ވަނަ މިނެޓުގައި ކާމިޔާބު ކޮށްދިނީ ވިނީޝިއުސް ޖޫނިއާ އެވެ. މިއީ އެޑްވާޑޯ ކަމަވިންގާގެ އެހީތެރިކަމާއެކު, ވިނީޝިއުސް ކާމިޔާބުކުރި ގޯލެކެވެ. ފުރަތަމަ ހާފު ނިމުމުގެ ކުރިން ރެއާލުން ވަނީ އިތުރު ގޯލެއް ޖަހާފަ އެވެ. މި ގޯލު އެ ޓީމަށް ޖަހާދިނީ ވަލްވާޑޭ އެވެ. މިއީ އޭރިއާ ތެރެއިން ފޮނުވާލި ބާރު ހަމަލާއަކުން ވަލްވާޑޭ ކާމިޔާބުކުރި ގޯލެކެވެ.
ރެއާލުން މި މެޗުގަ ޖެހި ފަހު ދެ ގޯލު ޖެހީ ދެ ވަނަ ހާފުގެ ފަހު 20 މިނެޓުގެ ތެރޭގަ އެވެ. އެ ޓީމުގެ ހަތަރުވަނަ ގޯލު ޖެހީ ވެސް ވިނީޝިއުސް އެވެ. އަދި ފަސްވަނަ ގޯލު ޖެހީ އަރްދާ ގުލެއާ އެވެ. މިއީ ގުލެއާ ރެއާލަށް ޖަހާދިން ހަތަރު ވަނަ ގޯލެވެ.
ރޭގެ މެޗަށް ރެއާލުން ނުކުތްއިރު, މި ސީޒަނުގެ ބޮޑުބައިގައި އަނިޔާގައި ތިބި އެޑާ މިލިޓާއޯ އާއި, ކީޕަރު ކޯޓުއާ ވަނީ މި މެޗުގައި ފުލްކޮށް ކުޅެފަ އެވެ.
