ކޯޓުގައި ހިނގަމުންދާ މައްސަލަތަކެއްގައި ހިމެނޭ ފައިސާތަކެއް ދޫނުކޮށްގެން ޕަބްލިކް ސާވިސް މީޑިއާގެ ފައިނޭންސް ހެޑު އަހުމަދު ހަނީފް ސަސްޕެންޑުކޮށްފި އެވެ.
"އަދަދު" އަށް ކަށަވަރުވެފައިވާ ގޮތުގައި ހަނީފަށް އެންގީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެ ކުންފުނިން ކުރުވި މަސައްކަތްތަކެއްގެ ފައިސާ ދޫކުރާށެވެ. މިހާތަނަށް ފައިސާ ދޫކޮށްފައި ނުވަނީ އިންވޮއިސް އަދި ބިލު ފަދަ ތަކެތި ހަމަނުވެގެންނެވެ. އެ މައްސަލަތައް މިހާރު އޮތީ ކޯޓުގަ އެވެ.
ނަމަވެސް ޕީއެސްއެމްއިން ހަނީފަށް އެންގީ ކޯޓުގައި ހިނގަމުންދާ މައްސަލަތަކުގައި ހިމެނޭ ފައިސާތައް ދޫކުރުމަށެވެ. އެކަމަށް އޭނާ އިންކާރު ކުރުމުން މިހާރު ވަނީ މައްސަލައެއް ބަލަމުންދާ ކަމަށް ބުނެ ސަސްޕެންޑުކޮށްފަ އެވެ.
އޭގެ އިތުރުން، ހަނީފުގެ މައްސަލަ ބަލައި ނިމެންދެން އޭނާއަށް ކުންފުނީގެ ފަރާތުން ދީފައިވާ ހުރިހާ އެކްސެސްތަކެއް ބްލޮކް ކުރުމަށް މެނޭޖިން ޑައިރެކްޓަރު ޒީނާ ޒާހިރު ވަނީ އަންގައިފަ އެވެ.
އެ މައްސަލައިގައި ކޮމެންޓެއް ހޯދަން ޕީއެސްއެމްގެ ތަރުޖަމާނު ޒީކް އަހުމަދު ރިޒާއަށް ގުޅުމުން ވިދާޅުވީ، ހަނީފު ސަސްޕެންޑު ކުރިކަން އޭނާއަށް އެނގިފައިނުވާ ކަމަށެވެ. ހަނީފު ސަސްޕެންޑު ކުރީ ކީއްވެތޯ ސާފު ކުރުމަށް އެދުމުން، މެނޭޖްމަންޓާ ވާހަކަ ދެއްކުމަށްފަހު ގުޅާނެ ކަމަށް ބުންޏެވެ. އެކަމަކު ފަހުން ހަބަރެއް ނުވެ އެވެ.
ހަނީފަކީ 2006 ވަނަ އަހަރުން ފެށިގެން ޕީއެސްއެމްގައި މަސައްކަތް ކުރަމުންދާ މުވައްޒަފެކެވެ. އޭނާ ވަނީ އެކައުންޓިން އަދި ފައިނޭންސްގެ ދާއިރާއިން ޑިގްރީއެއް ނަގައިފަ އެވެ.
