އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ފައްޔާޒް އިސްމާއިލްގެ މައްޗަށް އެއްވެސް ޖިނާއީ ކުށެއްގެ ތުހުމަތު ފުލުހުން ނުކުރާ ކަމަށް އިއްޔެ އޭނާ ޕޮލިހަށް ހާޒިރުކޮށްފައި ސާފުކޮށްދިން ކަމަށް އޭނާގެ ވަކީލު މަހްފޫޒް ސައީދު ވިދާޅުވި އެވެ.
ފުލުހުން ފައްޔާޒަށް ފޮނުވި ޗިޓުގައި ބުނެފައި އޮތީ އޭނާ ހާޒިރު ކުރާ ސަބަބަކީ އާރްޑީސީގެ ފައިސާއަށް އެ ކުންފުނީގެ ބައެއް މުވައްޒަފުން ހިޔާނާތްތެރިވެ، އެ ހިޔާނާތްތެރިވި ފައިސާއިން ފައްޔާޒަށް މާލީ މަންފާތަކެއް ލިބިފައިވާ ކަމަށް ބެލެވޭތީ ކަމަށެވެ.
ނަމަވެސް ފުލުހުން އޮފީހުން ނުކުމެ ނޫސްވެރިންނާ ވާހަކަ ދައްކަވަމުން ފައްޔާޒްގެ ވަކީލު މަހްފޫޒް ވިދާޅުވީ ފައްޔާޒަށް ކުރެވޭ ތުހުމަތަކީ އާރްޑީސީއާއެކު ވިޔަފާރީގެ މުއާމަލާތެއް ކުރާ ކުންފުންޏަކަށް ފޮނުވި ޕޭމަންޓަކުން ލިބުމުން އެ ކުންފުނިން ފައްޔާޒްގެ އެކައުންޓަށް ފައިސާ ފޮނުވާފައިވުން ކަމަށެވެ.
"އާރްޑީސީއާ ގުޅިގެން އެ ބަލާ މައްސަލައާ ޗެއާޕާސަންއާ އެއްވެސް ގުޅުމެއް ހުރި ކަމަށް ވެސް މިއަދު ފުލުހުން އަދި މިހާތަނަށް ވިދާޅުވެފައެއް ނެތް،" ވަކީލު ވިދާޅުވި އެވެ. "ޖިނާއީ ކުށެއްގެ ތުހުމަތު ވެސް ނުކުރެވޭ، ހާޒިރު ކުރެވުނީ ވެސް ކުށެއްގެ ތުހުމަތު ކުރެވޭ މީހެއްގެ ހައިސިއްޔަތަކުން ނޫން."
ފައްޔާޒް ހާޒިރު ކުރީ ހަމައެކަނި މައުލޫމާތު ސާފު ކުރަން ކަމަށް ފުލުހުން ބުނި ކަމަށާއި ނަމަވެސް ފުލުހުން ސާފު ކުރަން ބޭނުންވި މައުލޫމާތަކީ އާންމުކޮށްފައިވާ މައުލޫމާތު ކަމަށް ވެސް ވަކީލު ވިދާޅުވި އެވެ. އެއީ މިނިސްޓަރުންގެ މާލީ ބަޔާންތަކުގައި މީގެ ކުރިން އާންމުކޮށްފައިވާ މައުލޫމާތު ކަމަށް ވެސް މަހްފޫޒް ވިދާޅުވި އެވެ.
"މިއީ ހަމަ ފުރައްސާ ކުރުން. ޑިމޮކްރަސީއެއްގައި، މިއީ އަޅުގަނޑު ކޮށްފައި އޮތް ކަމެއް ވިޔަސް މިއަދަކު ނޫން ހާޒިރު ކުރާނީ. އެއީ ރައްޔިތުންގެ މަޖިލީހުގެ އިންތިހާބު ބޯމަތިވެފައި އޮއްވާ އިދިކޮޅު ޕާޓީއެއްގެ ޗެއާޕާސަން ގެނެސްގެން މި ސަކަރާތް މި ޖަހަނީ ހަމަ ބިރުދައްކަން. ދެން ތަންދޮރު ވެސް ނޭނގެނީ، އިނގޭތޯ،" ފައްޔާޒް ވިދާޅުވި އެވެ.
އާރްޑީސީގެ ތެރޭގައި ހިންގި ކަމަށް ބުނާ ހިޔާނާތަކީ މީގެ ދޮޅު އަހަރު ކުރިން ސެޕްޓެމްބަރު، 2022، ގައި އެ އިދާރާއަށް ހުށަހެޅި މައްސަލައެކެވެ.
އެމްޑީޕީގެ ރައީސް އަބްދުﷲ ޝާހިދު ވިދާޅުވީ ފައްޔާޒު ޕޮލިހަށް ހާޒިރު ކުރީ، އޭޕްރީލް 21 ގައި ބާއްވާ 20 ވަނަ ރައްޔިތުންގެ މަޖިލީހުގެ އިންތިހާބުގެ މެޖޯރިޓީ ސަރުކާރަށް ނުލިބޭނެތީ، ގޮތް ހޮސްވެގެން ކަމަށެވެ.
އެ ޕާޓީގެ ޗެއާޕާސަން ފައްޔާޒު އިސްމާއިލް މިއަދު ފުލުހަށް ހާޒިރުކުރުން ކުށްވެރިކޮށް އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ފައްޔާޒު ފުލުހަށް ހާޒިރުކޮށްފައިވަނީ އެއްވެސް އަސާސެއް ނެތް ތުހުމަތެއްގައި ކަމަށެވެ.
"ސަރުކާރުން އިދިކޮޅު ސިޔާސީ ލީޑަރުންނަށް ބިރުދެއްކުމަށް ކުރަމުން ގެންދާ މަސައްކަތްތައް، ސަރުކާރު ހިންގުމުގައި މި ސަރުކާރުގެ އަމަލުތައް ހުރި ބީދައިން ކާމިޔާބެއް ނުވާނެ،" ޝާހިދު ވިދާޅުވި އެވެ.
އެމްޑީޕީގެ މަސައްކަތްތައް މަޑުޖައްސައިނުލާނެ ކަމަށާއި ޒިންމާދާރު އިދިކޮޅެއްގެ ގޮތުގައި ރައްޔިތުންގެ ހައްގުގައި މަސައްކަތް ކުރުމުގައި އެ ޕާޓީ ދެމިއޮންނާނެ ކަމަށް ވެސް އޭނާ ވިދާޅުވި އެވެ.
