މޯލްޑިވްސް އޮލިމްޕިކް ކޮމިޓީ (އެމްއޯސީ) އިން އެތުލީޓުންނަށް ހަމަޖައްސައިދިން ސްކޮލަޝިޕްތަކުގެ ފައިސާ އާއި އެސޯސިއޭޝަންތަކަށް މާލީ ގޮތުން ބަޖެޓް އެސިސްޓަންސް ފޯރުކޮށްދީފައިވާއިރު، އެ ފައިސާ ހަރަދުކުރި ގޮތުގެ ތަފްސީލް ހޯދުމުގެ މަސައްކަތް ފަށައިފި އެވެ.
އޮލިމްޕިކް ކޮމިޓީގެ އަހަރީ އާންމު ޖަލްސާ އަށް ފަހު، ބޭއްވި ނޫސްވެރިންގެ ބައްދަލުވުމުގައިި، އެ ކޮމިޓީގެ ސެކްރެޓަރީ ޖެނެރަލް، ތަމޫހު އަހުމަދު ސައީދު (ތަމޫ) ވިދާޅުވީ، މީގެ ދެ ހަފްތާއެއް ނޫނީ ތިން ހަފްތާއެއް ކުރިން، އޮލިމްޕިކް ކޮމިޓީން ވާނީ އެ ޖަމިއްޔާ އިން މާލީ އެހީތެރިކަން ފޯރުކޮށްދިން ހުރިހާ އެސޯސިއޭޝަނަކުން އެ ފައިސާ ހޭދަކުރި ގޮތުގެ ތަފްސީލް ފޮނުވައިދިނުމަށް އެދިފައި ކަމަށެވެ.
އޭގެ ތެރޭގައި، އޮލިމްޕިކް ކޮމިޓީގެ ފަރާތުން، އެތުލީޓުންނަށް ހަަމަޖައްސައިގެން ސްކޮލަޝިޕްގެ ފައިސާ ހަރަދުކުރި ގޮތް ހޯދުން ވެސް ހިމެނެ އެވެ.
އޮލިމްޕިކް ކޮމިޓީގެ ރައީސް، މުހައްމަދު އަބްދުލް ސައްތާރު (ޗަމްޕީ) ވިދާޅުވީ، އެތުލީޓުންނާއި އެސޯސިއޭޝަނަށް އޮލިމްޕިކް ކޮމިޓީން އަބަދުވެސް އެހީތެރިކަން ފޯރުކޮށްދޭނެ ކަމަށެވެ. އަދި އެހީތެރިކަން ދިނުމަށް ފަހު ކަންކަން ކުރިއަށް ދާ ގޮތް ބެލުމަކީ ވެސް ޒިންމާއެއްގެ ގޮތުގައި ސައްތާރު ދެކިލައްވަ އެވެ.
"ސްކޮލަޝިޕް ފަންޑަކީ އެތުލީޓަކަށް ލިބެންޖެހޭ އެއްޗެއް. މިހާރު ވެސް އަޅުގަނޑުމެން ހުރިހާ އެސޯސިއޭޝަން އަކަށް އަޅުގަނޑުމެން، 2023 ވަނަ އަަހަރު އަޅުގަނޑުމެން ސްކޮލަޝިޕެއް ދީފައި ވެއްޖިއްޔާ، އޭގެ ހަރަދު ކުރި ގޮތުގެ ޑީޓެއިލްސް ފޮނުވަން އަންގާފައިވަނީ. އެއީ ވެސް ތި ކަހަލަ އެއްވެސް އިޝޫ (ފަންޑް ބޭނުންކުރުމުގަިއ މައްސަލައެއް) އެއް އުޅޭތޯ ބަލަން. ހުރިހާ އެސޯސިއޭޝަނަކަށް އަންގާފައި އޮންނާނީ އަޅުގަނޑުމެން ފަންޑެއް ދީފައި އޮތީއްޔާ އެ ބޭނުންކުރި ގޮތެއް ހިއްސާކުރަން،" ސައްތާރު ވިދާޅުވި އެވެ.
ފްރާންސްގެ ޕެރިހުގައި މި އަހަރު ބާއްވާ އޮލިމްޕިކްސް އަށް ކޮލިފައިވުމަށް އެހީވުމުގެ ގޮތުން ކުރިއަށްގެންދާ އޮލިމްޕިކް ސްކޮލާޝިޕްގެ ފުރުސަތު، ޓޭބަލް ޓެނިހުން ފާތިމަތު ދީމާ އަލީ، ބެޑްމިންޓަނުން ނިބާލް އަހުމަދު، އެތުލެޓިކްސްގެ އައިޝަތު ހިމްނާ ހަސަން، ސާފިން އިން އިސްމާއިލް ރަޝީދު (ސްމައިލީ) އަދި ޝޫޓިން އިން ޒިޔާން ޞިޔާއު އަށް ވަނީ 2022 ވަަނަ އަހަރު ދީފަ އެވެ.
ރާއްޖޭން ބޭރުގެ މުބާރާތްތަކާއި ޓްރެއިނިންތަކަށް ދާއިރު، ޓޫރިސްޓް ވިސާގައި އެތުލީޓުން ދާތީވެ، އެ ކަމާ މެދު ސުވާލުކުރުމުން އޮލިމްޕިކް ކޮމީޓީން ބުނީ، ބައިނަލްއަގުވާމީ މުބާރާތް ނޫނީ ޓްރެއިނިން އަކަށްދާއިރު، މީގެ ކަންކަން ކުރަނީ އެސޯސިއޭޝަނަކާއި އެ އިވެންޓެއް ބާއްވާ ފަރާތެއްގެ މެދުގައި ހިނގާ މުއާމަލާތްތަކުން ކަމަށެވެ.
"ގޭމްސް އަކަށް ދާއިރު، އެ ގޭމްސްގެ އެކްރެޑިޓޭޝަން ފާހަކީ، އެއީ ވިސާއެއްގެ ގޮތުގައި ބަލަނީ. ޓްރެއިނިން ކޭމްްޕްތަކަށްދާއިރު އެކި ހާލަތްތަކުގައި އެބަހުރި އެކި ވިސާތަކުގައި އެތުލީޓުން މަސައްކަތް ކޮށްފައި، އެއީ ކިހިނެއްތޯ އަޅުގަނޑުމެން އެއާ ޓެކަލް ކުރާނީ، އެ ބަލަންޖެހެނީ،" ތަމޫހު ވިދާޅުވި އެވެ.
"އެ އެސޯސިއޭޝަނަކާ، މިސާލަކަށް ރާއްޖޭން ބޭރުން އެފިލިއޭޓްވެފައި އޮންނަ އެކެޑަމީއަކާ އޮންނަ ގާތްގުޅުމެއްގެ ސަބަބުން ކަމެއް ހިނގައިފާނެ، އަޅުގަނޑުމެން އެ ޑީޓެއިލްސް އަކަށް ނުދާނެ،"
"އަދަދު" އަށް އެނގިފައިވާ ގޮތުގައި، އެންމެ ފަހުން، އޮލިމްޕިކް ސްކޮލަޝިޕް ލިބުނު އެތުލީޓަކަށް ލިބޭ ބަޖެޓުން، އެސޯސިއޭޝަނުން އެންމެ ރަނގަޅަށް ހަރަދުގެ ކަންކަން ނުކުރާ ކަމަށް ބުނެ، އޮލިމްޕިކް ކޮމިޓީ އަށް ވަނީ ޝަކުވާ ހުށަހަޅައިފަ އެވެ.
