ކާޑިފް (މާޗު 14) - ފާއިތުވި ހަ މަސް ދުވަހުގެ ތެރޭގައި މަދު މެޗުތަކެއްގައި ކުޅުނު ނަމަވެސް، ވޭލްސްގެ ޔޫރޯގެ ޕްލޭއޮފް އަށް ނެގި ވޭލްސްގެ ސްކޮޑުގައި ތަޖުރިބާކާރު މިޑްފީލްޑަރު އޭރަން ރަމްސީ ހިމަނައިފި އެވެ.
ކުރިން އާސެނަލް އާއި ޔުވެންޓަސް އަށް ކުޅުނު ރަމްސީ ،33، މެޗެއްގެ ފުރަތަމަ 11ގައި ނުކުޅެތާ ހަ މަސް ދުވަސްވެއްޖެއެވެ.
ކާޑިފް ސިޓީ އަށް މިހާރު ކުޅެމުންދާ ރަމްސީގެ ކަކުލަށް މިދިޔަ ސެޕްޓެމްބަރު މަހު އަނިޔާވިއެވެ. މިދިޔަ އަހަރުގެ ސެޕްޓެމްބަރު މަހުގެ ފަހުން އޭނާ ކާޑިފްގެ ފުރަތަމަ 11 ގައި ނުކުޅެ އެވެ. ސެޕްޓެމްބަރު މަހުން ފެށިގެން މިއަދާ ހަމައަށް އޭނާ ޖުމްލަ ކުޅެފައިވަނީ 72 މިނިޓެވެ.
އެހެން ނަމަވެސް, ވޭލްސްގެ ކޯޗު ރޮބް ޕޭޖް ވަނީ ގައުމީ ޓީމުން ރަމްސީ އަށް ފުރުސަތު ދީފައެވެ.
ޔޫރޯ ކޮލިފައިންގެ ޕްލޭ އޮފްގައި ފިންލޭންޑާ ދެކޮޅަށް މި މަހުގެ 21 ވަނަ ދުވަހު ވޭލްސް ނުކުންނާނެ އެެވެ.
ޕޭޖް ބުނީ ވޭލްސްގެ ސްކޮޑުގައި ރަމްސީ ބޭނުންކުރުމުގެ ފުރުސަތު އޭނާ ދޫނުކުރާނެ ކަމަށެވެ. އަދި ރަމްސީއަކީ ވޭލްސްގެ ޓީމަށް މުހިންމު ކުޅުންތެރިއެއް ކަމަށެވެ.
"ރަމްސީ ކަހަލަ ތަޖުރިބާކާރު ކުޅުންތެރިން ޓީމުގައި ހުރުމުން އެހެން ކުޅުންތެރިންނަށް ވެސް ފައިދާކުރާނެ. ރަމްސީ އެ ދަނީ ފިޓުވުމަށް މަސައްކަތްކުރަމުން،" ޕޭޖް ބުންޏެވެ.
