ވޭލްސް (އޭޕްރީލް 23) - ގެވެށި އަނިޔާއެއްގެ މައްސަލައެއްގެ ތުހުމަތުގައި ފުލުހުން ތަހުގީގުކުރަމުން އަންނަ ވޭލްސްގެ ކޯޗު ރަޔާން ގިގްސްގެ މައްސަލައިގައި އޭނާގެ މައްޗަށް ދައުވާކުރަން މިއަދު ނިންމުމާ އެކު އަންނަ ޖޫން މަހު ފަށާ ޔޫރޯ ފުޓްބޯޅަ މުބާރާތުން އޭނާ އަށް ފުރުސަތު ގެއްލިއްޖެ އެވެ.
މިދިޔަ ނޮވެމްބަރު މަހު ގިގްސް ފުލުހުންގެ ބެލުމުގެ ދަށަށް ގެންދިޔައީ ގޭތެރޭގައި ހިނގި ކަމެއްގެ ތެރޭގައި އޭނާގެ ލޯބިވެރިޔާ އާއި އޭނާގެ އަންހެން ކޮއްކޮ އަށް ހަމަލާ ދިނުމުގެ ތުހުމަތުގަ އެވެ. މެންޗެސްޓާ ޔުނައިޓެޑްގެ ކުރީގެ މިޑްފީލްޑަރު ގިގްސް، 47، ފަހުން ވަނީ ކަފާލާތުގެ ދަށުން ދޫކޮށްލައިފަ އެވެ. ގިގްސް ވަނީ ތުހުމަތުތަކަށް އިންކާރުކޮށް ތަހުގީގަށް ފުރިހަމަ އެއްބާރުލުން ދޭނެ ކަމަށް ބުނެފަ އެވެ. ކަފާލާތުގެ ދަށުން ގިގްސް ދޫކޮށްލާފައި ހުރި މުއްދަތުގައި އޭނާ ގައުމީ ޓީމުގެ މަސައްކަތުގައި ޝާމިލުވެ ނޫޅޭގޮތަށް ވޭލްސް ފުޓްބޯލް އެސޯސިއޭޝަނުން ވަނީ އޭރު ނިންމައިފަ އެވެ.
މައްސަލައިގެ ތަހުގީގު ނިންމާލުމަށް ފަހު މިއަދު ގިގްސްގެ މައްޗަށް ވަނީ ތިން ދައުވާއެއް އުފުލައިފަ އެވެ. އޭގެ ތެރޭގައި މާރަމާރީ ހިންގުން ވެސް ހިމެނެ އެވެ. ގިގްސް އަށް ހުކުމްކުރުން އޮތީ މި މަހުގެ 28 ވަަނަ ދުވަހު ސެލްފޯޑް މެޖިސްޓްރޭޓް ކޯޓުގަ އެވެ.
ގިގްސް، ވޭލްސް ޓީމާ ދުރުގައި ހުރި މުއްދަތުގައި ޓީމުގެ ޒިންމާއާ ހަވާލުވެފައިވަނީ ވޭލްސްގެ ޒުވާން ޓީމުގެ ކޯޗަކަށް ހުރި ރޮބާޓް ޕޭޖް އެވެ. ވޭލްސްގެ ފުޓްބޯޅަ އެސޯސިއޭޝަނުން މިރޭ ނެރުނު ބަޔާނެއްގައި ބުނެފައިވަނީ ގިގްސްގެ މައްޗަށް ދައުވާކުރަން ނިންމުމާ އެކު ޔޫރޯގައި ވޭލްސްގެ ކޯޗެއްގެ ގޮތުގައި މަސައްކަތްކުރާނީ މިހާރު ވެސް އެ ޒިންމާ އަދާކުރަމުން އަންނަ ޕޭޖް ކަމަށެވެ.
ޔޫރޯގައި ވޭލްސް ހިމެނެނީ އިޓަލީ އާއި ތުރުކީ އަދި ސްވިޒަލެންޑާ އެކު ގްރޫޕް އޭގަ އެވެ.
މެންޗެސްޓާ ޔުނައިޓެޑްގެ ލެޖެންޑް ގިގްސް، ވޭލްސްގެ ކޯޗުކަމަށް ހަމަޖެއްސީ 2018 ވަނަ އަހަރު އެވެ. އިނގިރޭސި ގަދަ ބާރެއް ކަމަށްވާ ޔުނައިޓެޑަށް 700 އަށް ވުރެން ގިނަ މެޗު ކުޅެދީފައިވާ ގިގްސް ވަނީ އެ ޓީމާ އެކު 13 އިނގިރޭސި ޕްރިމިއާ ލީގާއި ދެ ޗެމްޕިއަންސް ލީގު ކާމިޔާބުކޮށްފަ އެވެ. ރިޓަޔާކުރުމަށް ފަހު ޔުނައިޓެޑްގެ އެސިސްޓަންޓް ކޯޗެއްގެ ގޮތުގައި މަސައްކަތްކުރުމުގެ އިތުރުން ވަގުތީ ކޯޗެއްގެ ގޮތުގައި ހެޑް ކޯޗެއްގެ ޒިންމާ ވެސް އުފުލި އެވެ.
