ދިވެހިރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި އަސްކަރީ ޑްރޯންތަކެއް ގަތުމަށް ތުރުކީގެ ކުންފުންޏަކާއެކު މި ސަރުކާރުން ވީ އެއްބަސްވުމުގެ ދަށުން ގެނައި ޑްރޯންތައް ގަތީ އަވަސް އަރުވާލައިގެން ކަމަށް ބުނެ، އެ މަޝްރޫއާ މެދު އިދިކޮޅު އެމްޑީޕީން މިރޭ ބޮޑެތި ތުހުމަތަކެއް ކޮށްފި އެވެ.
ވިހިވަނަ ރައްޔިތުންގެ މަޖިލީހަށް މެމްބަރުން ހޮވަން އަންނަ އޭޕްރިލްމަހު ބާއްވާ އިންތިހާބަށް އެމްޑީޕީން ކުރާ ކެމްޕެއިންގެ މައުލޫމާތު ދޭން އެ ކެމްޕޭނުގެ ތަރުޖަމާނު އަދި ރައްޔިތުުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުުމަދު އީސާ މިރޭ ބޭއްވި ނޫސްވެރިންގެ ބައްދަލުވުމުގައި ތުހުުމަތު ކުރެއްވީ ޑްރޯން ގަންނަން ކޮންޓިންޖެންސީ ބަޖެޓުން ހަރަދުކުރީ ކުރީގެ ސަރުކާރުން ފަށާފައިވާ ގިނަ މަޝްރޫއުތަކެއް ހުއްޓުވުމަށް ފަހުގައި ކަމަށެވެ. ސާވެއިލަންސް ޑްރޯންގެ ޓެކްނޮލޮޖީ ރާއްޖެއަށް ފޯރުކޮށްދޭން އެކުވެރި ގައުމަކުން އެމްޑީޕީގެ ސަރުކާރާ މަޝްވަރާކުރި ކަމަށް ވެސް އޭނާ ވިދާޅުވި އެވެ.
"އަޅުގަނޑުމެންނަށް ރަހުމަތްތެރި ގައުމަކުން ހިލޭ އެ ޓެކްނޮލޮޖީ މިގައުމަށް ފޯރުކޮށްދިނުމާ ގުޅޭ ގޮތުން ދެފަރާތުގެ އެކަމާ ގުޅުން ހުރި އިސްބޭފުޅުން މަޝްވަރާކުރަމުން ދަނިކޮށް ސަރުކާރު ބަދަލުވީ، ދެން އެހިސާބުން އަޅުގަނޑުމެންނަށް ސުވާލު އުފެދޭ، ވެރިކަމަށް ވަޑައިގެންނެވި ގޮތަށް އެންމެ ފުރަތަމަ ތެޅިފޮޅެމުން ވަޑައިގަތީ ތުރުކީއަށް ރައީސލް ޖުުުމްހޫރިއްޔާ،" އީސަ ވިދާޅުވި އެވެ.
އޭނާ ސިފަކުރެއްވި ގޮތުގައި ޑްރޯން ގަތުމަކީ ތުރުކީއަށް ކުރެއްވި ދަތުރުފުޅުގައި ރައީސް ޑރ.މުހައްމަދު މުއިއްޒު ކުއްލިއަކަށް ނިންމެވި ނިންމެވުމެކެވެ. އެއީ އެ މަޝްރޫއަކީ ދައުލަތުގެ މިއަހަރުގެ ބަޖެޓްގައި ވެސް ނުހިމެނޭ ކަމެއްކަން އޭނާ ފާހަގަކުރެއްވި އެވެ.
ޑްރޯންގަތުމަށް ޓަކައި 30 މިލިޔަން ޑޮލަރަށް ވުރެ ގިނަ ފައިސާ ސަރުކާރުން ހަރަދުކުރި އިރު އެއަށް ވުރެ އިސްކަން ދޭން ޖެހޭ އެތައް ކަމެއް އެބަހުރި ކަމަށް ވެސް އީސަ ވިދާޅުވި އެވެ.
"ރާއްޖޭގެ ރައްޔިތުންނަށް ދުޅަހެޔޮ ދިރިއުޅުމަކަށް ޓަކައި އެއަށް ވުރެ މާ މުހިއްމު ކަންކަން ސަރުކާރުުން ކުރައްވަން އެބަހުރި. ވެރިކަމަށް ވަޑައިގެން ތިކަން ކުރުމުގެ [ޑްރޯން ގަތުމުގެ ކުުރިން] ފުރަތަމަ ކުރެއްވި ކަމަކީ ކުރީ ސަރުކާރުން ފަށާފައި ހުރި 1،720 ޕްރޮޖެކްޓް ހުއްޓައިލެއްވީ،" އޭނާ ވިދާޅުވި އެވެ.
އެ ކަންބޮޑުވުންތަކާ އެކު އީސަ ވިދާޅުވީ ޑްރޯން ގަތުމަކީ މަޖިލިސް އިންތިހާބުގެ ކެމްޕެއިނަށް ފައިސާ ހޯދަން ކުރި ކަމެއް ކަމަށް ތުހުމަތުކުުރެވޭ ކަމަށެވެ.
"އަޅުގަނޑުމެންނަށް ވަރަށް ބޮޑަށް ތުހުމަތުކުރެވޭ މި ރައްޔިތުންގެ މަޖިލީހުގެ އިންތިހާބަށް ފައިސާ ހޯދުމަށް ޓަކައި، ނުުއަގުގައި، ބޮޑެތި އަގުތަކުގައި، އާއްމުކޮށް ބާޒާރުގައި ދުނިޔޭގެ ބާޒާރުގައި ތިޔަ ޓެކްނޮލޮޖީ ވިއްކަން ހުރި އަަގަށް ވުރެ މާބޮޑު އަހުުގައި އެކަން ކުރައްވާފައި އެއޮތީ،" އީސަ ވިދާޅުވި އެވެ.
އޭނާ ވިދާޅުވީ އެއަށް ވުރެ އަގުހެޔޮކޮށް ޑްރޯން ހޯދޭނެ ގޮތުގެ ތަފްސީލުތައް އެމްޑީޕީގައި އެބަހުރި ކަމަށެވެ.
