އެހެން ރޯދަމަސްތަކާ ހިލާފަށް މިފަހަރުގެ ރޯދަ މަހު ފުރަތަމަ ދުވަހު ދޮންކެޔޮ ލިބުން ދަތިވެ، މާލޭ ލޯކަލް މާރުކޭޓުން ދޮންކެޔޮ ވަރަށް މަދުވެއްޖެ އެވެ.
ބާޒާރު މަތިން "އަދަދު" އާ ވާހަކަ ދެއްކި ބައެއް މީހުން ބުނީ ދޮންކެޔޮ ބާޒާރުން މަދުވީ ރަށްރަށުން ނުލިބޭތީ ކަމަށާއި، ބާޒާރުގައި މިވަގުތު ހުރި ހުރިހާ ދޮންކޭލެއް ކަހަލަ ގޮތަކަށް ސަޕްލައި ކުރާ ފަރާތްތަކުން ގަނެފައިވާ ކަމަށެވެ.
ރަށްރަށުން ދޮންކެޔޮ ލިބުމުގެ ދަތިކަން ހުރުމާއެކު އިންޑިއާ އަދި އެހެނިހެން ގައުމުތަކުގެ ދޮންކޭލަށް ޑިމާންޑު ވެސް ބޮޑު ކަމަށާއި، ދޮންކެޔޮ ތިޔާގިވާން ދުވަސްކޮޅެއް ނަގާނެ ކަމަށް އޭނާ ބުންޏެވެ.
"ފުސްކެޔޮ ކިލޯއެއް ލިބެން ހުރީ 90ރ. އަށް. އާދައިގެ ދޮންކެޔޮ ކިލޯއެއް 40ރ. އަށް ލިބިދާނެ. ދޮންކެޔޮ ލިބުން ވަރަށް ދަތި. މިތާ ހުރި ގިނަ އެއްޗެހިވެސް ހުރީ ވިކިފައި،" ބާޒާރުން ވާހަކަ ދެއްކި މީހާ ބުނި އެވެ.
މިއަދު ބާޒާރުގައި އެންމެ ތިޔާގިކޮށް ފެނިގެންދިޔައީ ކަރާގެ އިތުރުން ބަނބުކޭލެވެ. ބަނބުކެޔޮ ކިލޯއެއް 50ރ. އާއި 80ރ. އާ ދެމެދު ހުރިއިރު ބައެއް ގޮޅިތަކުން ބަނބުކޭލެއް 30ރ. އާއި 40ރ. ލިބެން ހުއްޓެވެ.
ބާޒާރުމަތީގައި މީހަކު ވިޔަފާރިކުރަނީ -- ފޮޓޯ: އަދަދު
ކަރާގެ އަގަށް ބަލާއިރު ކިލޯއެއް 18ރ. އާއި 20ރ އާ ދެމެދު ލިބެން ހުއްޓެވެ. އަދި އަލަނާސި ކަރާ ލިބެން ހުރީ 25ރ. އާއި 30ރ އާ ދެމެދުގެ އަގެއްގަ އެވެ.
ކަނޑޫދޫ މިރުސް ކިލޯއެއް 700 އާއި 800ރ. އާ ދެމެދު ލިބެން ހުރިއިރު، 100 ގުރާމް ވިއްކަމުންދިޔައީ 75ރ. އާއި 85ރ. އާ ދެމެދުގެ އަގެއްގަ އެވެ.
ބާޒާރުގައި މިދިޔަ ހަފްތާގައި އަގު އަރައިގެންދިޔަ ލުނބޯ ކިލޯއެއް މިހާރު ލިބެން ހުރީ 70ރ. އަށެވެ. ލުނބޯގެ އަގު ވެއްޓުނީ އެސްޓީއޯއިން ޝިޕްމަންޓެއް ގެނެސް، އަގު ކޮންޓްރޯލް ކުރުމުންނެވެ.
ކޮޕީފަތް ބޮނޑިއެއް 10ރ. އާއި 15ރ. ދެމެދުގެ އަގެއްގައި ހުރިއިރު، ކުއްޅަވަށް ބޮނޑިއެއް ލިބެން ހުރީ 25ރ އަށެވެ. އަދި ލެޓިއުސް ކިލޯއެއް 80ރ. އަށް ލިބެން ހުރިއިރު، ކިއުކަމްބާ ކިލޯއެއް ލިބެންހުރީ 30ރ. އާއި 35ރ. ދެމެދުގެ އަގެއްގަ އެވެ.
ބާޒާރުގައި އަލަނާސި ކިލޯއެއް ހުރީ 45ރ އަށެވެ. އަދި އޮރެންޖެއް 7ރ. އާއި 8ރ. އަށް ލިބެން ހުރިއިރު، ކުރުނބާ ހުރީ 35ރ އިން 50ރ އާ ދެމެދުގެ އަގަކަށް ލިބޭށެވެ. އަދި ރާއްޖެ އަނބު ލިބެން ހުރީ 150ރ އަށް ކިލޯއެކެވެ.
