މެޑްރިޑް - (މާޗް 3) ފްރާންސްގެ ޕީއެސްޖީ އަށް ކުޅެމުން އަންނަ މޮރޮކޯގެ ފުލްބެކް އަޝްރަފް ހަކީމީ ހޯދަން ޔޫރަޕްގެ ބޮޑު ދެ ކުލަބުން މަސައްކަތް ފަށައިފި އެވެ.
ރިޕޯޓުތައް ބުނާ ގޮތުން ހަކީމީ މި ޓްރާންސްފާ މާކެޓުގައި ހޯދުމަށް މަސައްކަތް ކުރަމުން އަންނަނީ ސްޕެއިންގެ ރެއާލް މެޑްރިޑާއި, އިންގްލަންޑްގެ މެންޗެސްޓާ ސިޓީ އިންނެވެ.
ރެއާލުން ހަކީމީގެ ސޮއި ހޯދަން ބޭނުންވަނީ އެ ޓީމުގެ ޑިފެންޑަރުންނަށް ތަކުރާރުކޮށް އަނިޔާގެ މައްސަލަ ކުރިމަތިވާއިރު ސީޒަނެއްގައި ގިނަ މެޗުތަކެއްގައި އެއް ލެވަލެއްގައި ކުޅެވޭނެ ފިޓްނަސް ހިފެހެއްޓޭ ޑިފެންޑަރެއް ބޭނުންވާތީ އެވެ. އަދި އެކަން ފޫ ބައްދަން ފުލްބެކެއްގެ ގޮތުގައި ހަކީމީ ހޯދުމަކީ ރެއާލްގެ ވިސްނުމެވެ.
ހަކީމީ ވަނީ މީގެ ކުރިންވެސް ރެއާލަށް ކުޅެފަ އެވެ. ރެއާލާ އެކު ކާމިޔާބު ދުވަސްތަކެއް ހަކީމީ ހޭދަކޮށްފައިވާއިރު, ޕީއެސްޖީ ދޫކޮށް އެހެން ކުލަބަކަށް ހަކީމީ ދާނަމަ އޭނާ ދާން ބޭނުންވަނީ ރެއާލަށް ކަމަށް ރިޕޯޓްތައް ބުނެ އެވެ.
ޕީއެސްޖީއާ އެކު ހަކީމީ ހަދާފައިވާ ކޮންޓްރެކްޓް ހަމަވާނީ 2026 ގަ އެވެ.
އެކަމަކު، ޕީއެސްޖީ އިން އޮތީ 65 މިލިއަން ޑޮލަރަށް ވުރެ ކުޑަ ނޫން ބިޑެއް ލިބިއްޖެނަމަ ހަކީމީ ވިއްކާލަން ތައްޔާރަށެވެ.
ރިޕޯޓުތައް ބުނާ ގޮތުން ސިޓީ އިން ވެސް އޮތީ ހަކީމީ މި ވަރުގެ ފީއެއް ދީފައި ގަންނަން ތައްޔާރަށެވެ. އެހެންވެ، ކުރިއަށް އޮތް ދެތިން ހަފުތާއެއްހާ ދުވަސްތެރޭ ސިޓީ އިން ހަކީމީ ހޯދަން ބިޑް ކުރާނެ އެވެ.
ރެއާލުން ހަކީމީ އެ ޓީމަށް ގެންނަ ނަމަ ފުރަތަމަ ބިޑް ކުރާނީ 50 މިލިއަން ޑޮލަރު ކަމަށް ރިޕޯޓުތައް ބުނެ އެވެ. މި އަދަދާ މެދު ޕީއެސްޖީ އިން އެއްބަސް ނުވާނެ ކަމަށް ބެލެވެ އެވެ.
ރެއާލުން ހަކީމީ ހޯދަން މަސައްކަތް ކުރާއިރު, މި ސީޒަން ނިމުމާ އެކު ޕީއެސްޖީގެ ތަރި، ކީލިއަން އެމްބާޕޭ ބަދަލުވާން އުޅޭ ކަމުގެ އަޑު ވަނީ ގަދަވެފަ އެވެ. އަދި އެމްބާޕޭ ރެއާލަށް އަންނާނީ ޕީއެސްޖީގެ މުސާރަ އަށް ވުރެ ކުޑަ މުސާރައެއްގައި ކަމަށް ބެލެވެ އެވެ.
