ލަންޑަން (ފެބްރުއަރީ 25) - އިނގިރޭސި ޕްރިމިއާ ލީގު ގައި ބަލިނުވެ ހަ މެޗު ހަމަކޮށް 25 ގޯލު ޖަހާ އާސެނަލް ޓީމުގެ ކުޅުންތެރިން މިހާރު އުޅެނީ ހުވަފެނެއްގައި ކަމަށް އެ ޓީމުގެ ކެޕްޓަން މާޓިން އޮޑެގާޑް ބުނެފި އެވެ.
އާސެނަލުން 4-1 ގެ ނަތީޖާއަކުން ނިއުކާސަލް ބަލިކުރި މެޗަށް ފަހު ވާހަކަ ދައްކަމުން އޮޑެގާޑް ބުނީ މި ކާމިޔާބީ އަކީ ކުޅުންތެރިން ކޯޗިން ޓީމާއެކު ކުރި ބުރަ މަސައްކަތުގެ ނަތީޖާ ކަމަށެވެ.
"އަހަރެން މިހާރު މި އުޅޭނީ ހުވަފެނެއްގައި, އަހަރެމެން ވެސް ބޭނުން އެހެން ކުލަބުތައް ހެން ތައްޓަށް ވާދަކުރަން" އޮޑެގާޑް ބުންޏެވެ.
އޮޑެގާޑް ބުނީ އާސެނަލަށް މިދިޔަ އަހަރުގެ ލީގުގެ ފަހު ދުވަސްކޮޅު ނާކާމިޔާބުވުމުން އެކަމުން ކުޅުންތެރިން ފިލާވަޅު ދަސްކޮށްފައިވާ ކަމަށެވެ. އަދި މިއީ އެ ފިލާވަޅުގެ އެހީގައި މި އަހަރުގެ ލީގަށް ވާދަކުރަންވީ ވަގުތު ކަމަށް އޮޑެގާޑް ވަނީ ބުނެފަ އެވެ.
އާސެނަލުން ޕްރިމިއާ ލީގުގައި ބަލިނުވެ ހަ މެޗު ހަމަކުރި ނަމަވެސް މިދިޔަ ހަފުތާ އެ ޓީމުން ޕޯޓޯއާ ދެކޮޅަށް ކުޅުނު ޗެމްޕިއަންސް ލީގު މެޗުން ވަނީ ބަލިވެފަ އެވެ. އެކަމަކު، އޮޑެގާޑް ބުނީ ދެ ވަނަ ލެގުގައި ބަދަލު ހިފޭނެ ކަމުގެ ފުރިހަމަ ޔަގީންކަން އޮތް ކަމަށެވެ. އަދި މި ވަގުތު އާސެނަލް އޮތީ ވަރަށް ފޯމުގައި ކަމަށް އޮޑެގާޑް ބުންޏެވެ.
އާސެނަލުން ހޯދަމުންދާ ކާމިޔާބީތަކުގައި އެ ޓީމުގެ ފޯވާޑް ބުކާޔޯ ސަކާގެ ދައުރު ބޮޑުކަމަށް އޮޑެގާޑް ވަނީ އެއްބަސްވެފަ އެވެ.
"އެންމެނަށް ވެސް އެނގޭނެ އާސެނަލުން ހޯދަމުން އަންނަ ކާމިޔާބީގައި ސަކާގެ އޮތް ދައުރު, މުހިންމު ދަނޑިވަޅުތަކުގައި ޓީމަށް ކާމިޔާބީ ހޯދަދޭން ސަކާ ކުރާ މަސައްކަތް މެޗުތަކުގައި އެހުރީ ފެންނާން. ލަނޑު ޖަހާ ޓީމު މޮޅުކޮށްދޭ އެންމެ މުހިންމު އެކަކީ އެއީ" އޮޑެގާޑް ބުންޏެވެ.
އިނގިރޭސި ޕްރިމިއާ ލީގުގެ ތިން ވަނައިގައި އާސެނަލް އޮތީ ލީގު ތާވަލުގެ އެއް ވަނައިގައި އޮތް ލިވަޕޫލަށް ވުރެ ދެ ޕޮއިންޓް މަދުން ލިބިގެންނެވެ. ލިވަޕޫލުން ވަނީ 26 މެޗުން 60 ޕޮއިންޓް ހޯދައިފަ އެވެ. އާސެނަލަށް 26 މެޗުން ލިބުނީ 58 ޕޮއިންޓެވެ. އަދި ދެ ވަނައިގައި އޮތް ސިޓީ އަށް 26 މެޗުން 59 ޕޮއިންޓް ވަނީ ލިބިފަ އެވެ.
