ކެމްޕޭނެއްގައި އަތޮޅުތެރޭގައި އުޅޭތާ ދުވަސްކޮޅެއް ވެއްޖެ އެވެ. އަޅުގަނޑުމެންގެ ކެންޑިޑޭޓަށް ވެސް މީހުންގެ ތައުރީފާއި، ފުރައްސާރައާއި ހަނގާކުރުމާއި، އެއްބާރުލުން ދިނުމާއި މި ހުރިހާ ކަމެއް އެބަ ތަޖުރިބާ ކުރެވެ އެވެ. ކެމްޕޭނުގައި ދޮރުން ދޮރަށް ހިނގުމަށްފަހު ލިބޭ ހުސްވަގުތުކޮޅުގައި އަޅުގަނޑުމެން ސައިބޯން ވަންނަނީ މާމެންދޫގެ އެންމެ ގިނަ މީހުން ވަދެ އުޅޭ ހޮޓަލަށެވެ. ކިޔައިދޭން މިއުޅޭ ވާހަކައަކީ އެ ހޮޓަލުގެ ވެރިމީހާ އަޅުގަނޑަށް ކިޔައިދިން ވާހަކަ އެކެވެ.
އޭނާ ކިޔައިދެ އެވެ. ދަތުރުވަރިއެއްގައި އުތުރުގެ ރަށަކަށް ދެވިއްޖެ އެވެ. ރަށަށް ލެފުމުގެ ބޭނުމަކީ ބޯފެން ހޯދުމެވެ. ދަންނަ މީހަކު އުޅޭ ރަށަކަށް ނުވާތީ ފުރަތަމަ ޖެހުނީ މީހުން ދެނެގަންނާށެވެ. މިއީ 2010 ނުވަތަ 2011 ހިސާބުގެ ވާހަކަ އެކެވެ.
ފަރުވާތެރިކަމާއެކު މީހުންގެ މޫނަށް ބަލަން ހުރުމަށްފަހު، މޫނުމަތި އަލި، ހަރުފާޑު ޖަހާ މީހެއް ކައިރީގައި މި އައި ބޭނުމުގެ ވާހަކަ ބުނެފި އެވެ. މީހާ ވީ މިކަހަލަ ވާހަކައެއް ދައްކާން ހަމަ އެންމެ އެކަށީގެންވާ ކަހަލަ މީހަކަށެވެ. ރަށުގެ ކުރީގެ ކަތީބެކެވެ. މިހާރު ހުރީ މުސްކުޅި ކުރައްވާފަ އެވެ.
މީނާ ބުންޏޯލަ އެވެ. ތި ކުދިން ބޭނުންވެގެން ތިޔަ އުޅޭ ކަންތައް ކޮށްދޭނަމެވެ. އަދި އޭނާގެ މެހެމާންދާރީގައި އެގޭގައި ތިބުމަށް ދައުވަތުވެސް ދީފި އެވެ. މި ދައުވަތު ގަބޫލުކޮށް އެގެއަށް ގޮސް، ދިން އެއްޗެއް ކައި، ދުފައިގެން ދުން އަރުވަމުން ހާލުއަހުވާލާއި ރަށުގެ ހަބަރުން ވާހަކަ ފެށިއްޖެ އެވެ. އިރުކޮޅަކުން އެ ވާހަކައިގެ މިސްރާބު އެނބުރުނީ ސިޔާސީ މަސްރަހަށެވެ.
އޭރު ވެރިކަމުގައި ހުންނެވީ ރައީސް ނަޝީދެވެ. ހިނގަމުންދާ ވެރިކަމާމެދު ހިޔާލަކީ ކޮބައިތޯ އެހުމުންވެސް ކަތީބު މޫނުމަތިން ފާޅުވީ ރުޅިވެރިކަމެވެ. ބުންޏޯލަ އެވެ. މިވަރުގެ ނުބައި ނުލަފާ ވެރިޔަކު ތިމަންނާ އަދި ނުދެކެމެވެ. ނުލާހިކު އަމާން އޮމާންކޮށް އޮތް ދިވެހިރާއްޖޭގެ މުޅި މަންޒަރު ހަރާބުކޮށްލައިފި އެވެ. ރާއްޖޭގެ ހުރިހާ ކަމެއް މިދަނީ ބޮއްސުންލަމުންނެވެ. ތަކެތީގެ އަގުބޮޑުވަނީ އެވެ. ސަރުކާރުގެ މުވައްޒަފުން ވަޒީފާއިން ވަކިކުރަނީ އެވެ. މިރާގުން އެދުވަސްވަރު ސަރުކާރާ ނުރުހި ތިބި އެންމެންވެސް ދައްކާ ކަހަލަ ވާހަކަތައް އެއް ނޭވައިން ދައްކައި ނިންމާލައިފި އެވެ.
ރުޅިވެރި ރާގެއްގައި ދެއްކި މި ވާހަކަތަކަށްފަހު ފުން ނޭވައެއް ދޫކޮށްލާފައި ބުންޏޯލަ އެވެ. އެހެނެއްކަމަކު މަވެސް ވޯޓު ދިނީ ނަޝީދަށެވެ. އަޑުއަހަން ތިބި މީހުން ހައިރާންވެ ސުވާލުކުރި އެވެ. ބަލަ ތިޔަވީ ކިހިނެއް ހެއްޔެވެ؟
ކަތީބު ކިޔައިދެ އެވެ. ރާއްޖޭގައި މި ސިޔާސީ ޕާޓީތަކެއް ހަދައިގެން މި ހައިޖާނަކަށް ފެށުނީއްސުރެ ނަޝީދު ދެކެ މަ އަންނަނީކީ އަމަށަކު ރުޅިއެއް ނޫނެވެ. މި ނަޝީދެއްގެ ސަބަބުން ރާއްޖޭގެ ރައްޔިތުންގެ އަހުލާގު ގެއްލި ވެރިންނަށް ކިޔަމަންވުން ދޫކޮށްލައިފި އެވެ. މިހެން އޭނާ ދެކެ އާދެވޭ ރުޅިއަކުން އޭނާގެ ނަން އަޑުއިވުނަސް ދަތްކުނޑިވިކި މުޅި މީހާ އެކީ ރޫރޫ އަޅަ އެވެ. ރިޔާސީ އިންތިހާބުގެ ވޯޓުލުން އޮތް ދުވަހަކީ މި ކަތީބުގެ ހަޔާތުގައިވެސް ދޭ މިފަދަ މިނިވަން ދެވަނަ ވޯޓެވެ. ފުރަތަމަ ވޯޓަކީ ނިޒާމީ ވޯޓެވެ.
ރިޔާސީ އިންތިހާބުގެ ދެވަނަ ބުރުގައި ވޯޓުލާ މަރުކަޒަށް ވަނީވެސް ބޭރުގައި ތިބި މީހުން ކައިރީގައި ރައީސް މައުމޫނަށް ވޯޓުދޭން އެދި ކެމްޕޭނުކޮށްފަ އެވެ. ގާނޫނާ ގަވާއިދާ ހިލާފު ވިޔަސް ކަމުގެ މުހިންމުކަން ބޮޑުކަމުން އެކަންވެސް ކޮށްލީ އެވެ. ވޯޓުލާ މަރުކަޒަށް ވަނުމުން މަރުކަޒުގައި ތިބި އިލެކްޝަންސްގެ މުވައްޒަފުން މީނާގެ ދިވެހިރައްޔިތެއްކަން އަންގައިދޭ ކާޑު ބަލައި، ސުމާރުން މީނާގެ ނަން ކަނޑައި އިނގިލީގައި ފާހަގަޖަހައި ވޯޓު ކަރުދާސްކޮޅު އަތަށް ދީފި އެވެ. މަޑުމަޑުން ހިނގާލާފައި ގޮސް ވޯޓުލާ ބޫތަށް ވަދެ ވޯޓު ކަރުދާސް މޭޒުމަތީގައި ބާއްވައި ގަލަން ނަގަމުން ކަރުދާހަށް ބަލާލި އެވެ.
ކަތީބު ބުންޏޯލަ އެވެ. ފުރަތަމަވެސް ނަޒަރު ހުއްޓުނީ ނަޝީދުގެ ނަމަށެވެ. ހަމަ އެނަން ފެނުމާއެކު ލަހެއްފަހެއް ނެތި ހަށިގަނޑަށް އެއްކަލަ ގޮތްގަނޑު ވާން ފަށައިފި އެވެ. ދެދަތްޕިލަޖެހި ހަށިގަނޑަށް އެރި ބާރުގަނޑާއެކު ތުރުތުރުއަޅާ ހާލު ހިންގާލި ގަލަމުން ނަޝީދުގެ ނަމާ ދިމާލުގައި ހެޔޮފާހަގަ ޖެހިއްޖެ އެވެ. ދެން ވީ ގޮތަކީ މުޅި މީހާ ގަނޑުވީ އެވެ. މި ހެދުނު ކޮހަކާމެދު ވިސްނާން، ބޫތު ތެރޭގައި ހުއްޓި ހުރެވުނީ މީހަކު އެތަނުގެ ތެރޭގައި ހުރެދާނޭ ވަގުތަށް ވުރެ މާ ގިނަ ވަގުތު ވާންދެނެވެ. ކިޔޫގައި ތިބި މީހުންނަށް ލަސްވާތީ އިލެކްޝަންގެ މުވައްޒަފުން އިޝާރާތެއް ކޮށްލުމުން، ސަންދޯކެއް ފަހަތުން ހިނގާފައިދާ މީހެއްހެން، އެއްކަލަ މުވައްޒަފުގެ ފަހަތުން އޭނާ ދެއްކި މަގުން ހިގަމުން ވޯޓު ކަރުދާސް ފަށްޖަހަމުން ގޮސް ފޮށްޓަށް ވައްޓާލާފައި އެތަނުން ނުކުމެގެން ދިޔައީ އެވެ. ކަތީބު ބުންޏޯލަ އެވެ. މި ހެދުނު ގޯހުގެ މައްޗަށް ހިތާމަކުރުމުގައި އަދިވެސް އެބަހުރީމެވެ. ކަތީބުގެ މޫނުމަތިން ފާޅުވި މޮޅިވެރިކަން ފެނި އެވަގުތު މަޑުން ތިބިނަމަވެސް މިވާހަކަ އަޅުގަނޑަށް ކިޔައިދިން މީހާ މިވާހަކަ ކިޔައިދޭ ކޮންމެ މަޖިލީހަކުން ހުނުމުގެ އަޑު ނޫނީ ނީވޭނެ އެވެ.
ވާހަކަ ކިޔައިދީފައި އޭނާ ބުނެ އެވެ. ތަގުދީރުގައި އޮތީ ކޮންކަހަލަ މޮޅު ރޭވުމެއްކަން މީހަކަށް ނޭނގޭނެ އެވެ. މަގުތައް ކޮށެވި އާރަސްތުވެގެން އަންނަ ގޮތް ވީމާ އެއްވެސް އަތަކުން ތަގުދީރުގައި ނުހިފެހެއްޓޭނެ އެވެ. ނުހުއްޓި މަސައްކަތް ކުރާށެވެ. ކާމިޔާބީއަކީ މަސައްކަތް ކުރާ މީހުންގެ ހައްގެކެވެ.
