މެޑްރިޑް (19 ފެބްރުއަރީ) - ސްޕެނިޝް ލީގުގައި ރޭ ރެއާލް މެޑްރިޑް އާއި ރަޔޯ ވަޔެކާނޯ ބައްދަލުކުރި މެޗު 1-1 އިން އެއްވަރުވެއްޖެ އެެވެ.
މި މެޗު އެއްވަރުވިޔަސް، ތާވަލްގެ އެއް ވަނައިގައި އޮތް ރެއާލް އިން ވަނީ އެ ޓީމުގެ ލީޑު ހަ ޕޮއިންޓަށް ފުޅާކޮށްފަ އެވެ. ވަޔެކާނޯގެ ދަނޑުގައި ރޭ ކުޅުނު މެޗުގެ ތިން ވަނަ މިނިޓުގައި ރެއާލް އިން ލީޑު ނެގީ ހޮސޭލޫ ޖެހި ލަނޑުންނެވެ.
އެކަމަކު، ވަޔެކާނޯ އަށް ލިބުނު ޕެނަލްޓީއަކުން މެޗުގެ 27 ވަނަ މިނިޓުގައި އެ ޓީމުގެ ރައޫލް ޑެ ތޯމަސް ވަނީ ލަނޑެއް ޖަހައި މެޗުގެ ނަތީޖާ ހަމަހަމަކޮށްފަ އެވެ.
މެޗުގެ އިތުރު ވަގުތުގައި ރެއާލްގެ ޑެނީ ކަރްވަހާލް އަށް ރަތްކާޑު ދެއްކުމުން، އެ ޓީމު މެޗު ނިންމާލީ 10 ކުޅުންތެރިންނާއެކު އެވެ.
މެޗަށް ފަހު ވާހަކަދައްކަމުން ރެއާލްގެ ކޯޗު ކާލޯ އެންޗެލޮޓީ ބުނީ މި މެޗުން އެއްވަރުވުމަކީ މައްސަލައެއް ނޫން ކަމަށެވެ.
"އަހަރަމެން ޖެހޭ ހުރިހާ މެޗަކުންވެސް މޮޅުވާން. އެކަމަކު ލީގެއް ހޯދަން މަސައްކަތްކުރާއިރު، މޮޅުނުވެވޭ މެޗުތަކުގައިވެސް ބަލަންޖެހޭނީ ބަލިނުވާން،" އެންޗަލޮޓީ ބުންޏެެވެ.
"ބައެއް ފަހަރު އެއްވަރުވުމަކީވެސް ގެއްލުމެއް. އެކަމަކު މިއީ ލީގު ހޯދުމަށް އަހަރަމެންނަށް އެޅުނު މުހިންމު ފިޔަވަޅަކަށްވެސް ވެދާނެ."
ރެއާލް ތާވަލްގެ އެއް ވަނައިގައި އޮތީ 62 ޕޮއިންޓާއެކު އެވެ. ދެ ވަނައިގައި 56 ޕޮއިންޓާ އެކު އޮތީ ޖިރޯނާ އެވެ. އެންމެ ފަހުގެ ޗެމްޕިއަން ބާސެލޯނާ ތާވަލްގެ ތިން ވަނައިގައި އޮތީ 54 ޕޮއިންޓް ހޯދައިގެންނެވެ.
ސްޕެނިޝް ލީގުގައި މިރޭ އެތުލެޓިކޯ ބިލްބާއޯއާ ދެކޮޅަށް ކުޅޭ މެޗުން މޮޅުވެއްޖަނަމަ، ޖިރޯނާ އަށް ރެއާލްގެ ލީޑު ކުޑަކުރެވޭނެ އެވެ. -- އޭއެފްޕީ
