ޖަލަށް ލާފައި ހުރި ރަޝިއާގެ އިދިކޮޅު ލީޑަރު އެލެކްސީ ނަވަލްނީގެ މަރުގެ ޒިންމާ ރައީސް ލެޑިމިއަ ޕުޓިން ނަގަން ޖެހޭނެ ކަމަށް އެމެރިކާގެ ރައީސް ޖޯ ބައިޑެން އިއްޔެ ވިދާޅުވެއްޖެ އެވެ.
އުމުރުން 47 އަހަރުގެ ނަވަލްނީ މަރުވެފައިވާކަން ރަޝިއާގެ ޕްރިޒަންސް ސާވިސް އިން ބުނި ނަމަވެސް، މަރުވެފައި ވަނީ ކިހިނެއް ކަމެއް މިހާތަނަށް ހާމަކޮށްފައެއް ނުވެ އެވެ.
ޖޯ ބައިޑެން ވިދާޅުވީ ރަޝިއާގެ އެފަދަ އަމަލުތަކަކީ ހައިރާންވާންޖެހޭ ކަމެއް ނޫން ކަމަށެވެ. އަދި އެ މައްސަލަ ތަހުގީގުކުރުމަށް އެމެރިކާއިން ވަނީ ގޮވާލައިފަ އެވެ.
ނަވަލްނީ މަރުވެއްޖެ ނަމަ ފިޔަވަޅު އަޅާނެ ކަމުގެ އިންޒާރު އެމެރިކާއިން ކުރިން ދީފައިވެ އެވެ.
ނަވަލްނީ ހައްޔަރުކުރީ 2021 ވަނަ އަހަރު އަހަރު އެވެ. އެ އަހަރު އޭނާ އަށް ވިހަ ލި އެވެ. އެކަމާ ގުޅިގެން ކުރިމަތިވި ސިއްހީ މައްސަލަތަކަށް ފަރުވާ ހޯދީ ޖަރުމަނު ވިލާތުންނެވެ. އޭނާ ހައްޔަރުކުރީ ފަރުވާ އަށް ފަހު އެނބުރު އައުމާއެކު އެެވެ.
އެއަށް ފަހު ހަރުކަށި ފިކުރާ ގުޅޭ ދައުވާތަކެއްކޮށް 19 އަހަރުގެ ޖަލު ހުކުމެއް އިއްވީ މިދިޔަ އޯގަސްޓް މަހު އެވެ. އެ ހުކުމް އިއްވިއިރު ވެސް ކޮރަޕްޝަންގެ މައްސަލައިގައި ކަމަށް ބުނެ އޭނާ ހުރީ ނުވަ އަހަރުގެ ޖަލު ހުކުމެއްގަ އެވެ.
ނަވަލްނީގެ މަރާ ގުޅިގެން ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ޖެނީވާގައި ހުންނަ އދ.ގެ ހިއުމަން ރައިޓްސް އޮފީހުން ގޮވައިލީ ނަވަލްނީގެ މަރުގެ މައްސަލަ މިނިވަން އިދާރާއަކުން ބަލަން ޖެހޭ ކަމަށެވެ.
