ލަންޑަން (ފެބްރުއަރީ 14) - ޗެލްސީގެ އެންމެ އަގުބޮޑު ކުޅުންތެރިޔާ، އެންޒޯ ފެނާންޑޭޒް ދެކޭގޮތުގައި މި ސީޒަނުގައި އެ ޓީމަށް ދެ ތަށި ހޯދޭނެ ކަމަށް ބުނެފި އެވެ.
އާޖެންޓީނާއާ އެކު، 2022 ވަނަ އަހަރު ގަތަަރުގައި ބޭއްވި ފީފާ ވޯލްޑް ކަޕް ކާމިޔާބުކުރި ޓީމުގައި މޮޅު ކުޅުމެއް ދެއްކި، އެންޒޯ، ޗެލްސީ އަށް ބަދަލުވީ، މީގެ އެއް އަހަރު ކުރިންނެވެ. އެންޒޯ، ޗެލްސީ އަށް ސޮއިކުރީ، 130 މިލިއަން ޑޮލަރުގެ ޓްރާންސްފާއެއްގަ އެވެ. އެއީ، ނުވަ އަހަރުގެ ކޮންޓްރެކްޓެއްގަ އެވެ.
ޗެލްސީ، މި ވަގުތު، އިނގިރޭސި ޕްރިމިއާ ލީގުގެ 10 ވަނައިގައި އޮތްއިރު، އެ ޓީމަށް ގަދަ ހަތަރެއްގައި ނިންމާލައި، އަންނަ ސީޒަނުގައި ޗެމްޕިއަންސް ލީގު ކުޅުމުގެ ފުރުސަތެއް އޮތީ ލީގުގައި ވަރަށް ބޮޑަށް މަސައްކަތްކޮށްގެންނެވެ.
ޗެމްޕިއަންސް ލީގަށް ޗެލްސީ ކޮލިފައިނުވެއްޖެނަމަ، އެންޒޯ އެ ޓީމު ދޫކޮށްލާނެ ކަމަށް މީޑިއާގައި އަޑުފެތުރިފައިވީ ނަމަވެސް އެންޒޯ ވަނީ އެ ވާހަކަތައް ދޮގުކޮށްފަ އެވެ.
އެންޒޯ ބުނީ، ޗެލްސީއާ އެކު އޭނާ މުސްތަގުބަލަކަށް މަސައްކަތް ކުރަމުން އަންނަ ކަމަށެވެ. އަދި މި ސީޒަނުގައި ވެސް ޗެލްސީ އަށް ދެ ތަށި ހޯދޭނެ ކަމުގެ އުންމީދު އެބައޮތް ކަމަށް އެންޒޯ ވަނީ ބުނެފަ އެވެ.
"ކާމިޔާބު ހޯދޭނެ ވަރަށް މި ޓީމު މަސައްކަތް އެބަކުރޭ، އަހަރެމެންގެ ފޯމު ވެސް އަންނަނީ ރަނގަޅުވަމުން، މިއީ ދިގު ސީޒަނެއް، ދެ ތަށި އަހަރެމެންނަށް ހޯދިދާނެ،" އެންޒޯ ބުންޏެވެ.
މި މަހުގެ 25 ވަނަ ދުވަހު ޗެލްސީން އިނގިރޭސި ލީގު ކަޕް ފައިނަލުގައި ލިވަޕޫލާ ބައްދަލުކުރާނެ އެވެ. އަދި ޗެލްސީ ވަނީ އެފްއޭ ކަޕްގެ ގަދަ 16 އިން ވެސް ފުރުސަތު ހޯދައިފަ އެވެ. އެންޒޯ، އެ ފާހަގަކުރި ދެ ތަށްޓަކީ މި ދެ މުބާރާތެވެ.
އެންޒޯ ވަނީ މި ސީޒަނުގައި މެންޗެސްޓާ ސިޓީ ދޫކޮށް، ޗެލްސީ އަށް ބަދަލުވެ، އެ ޓީމުގައި މޮޅު ކުޅުމެއް ދައްކަމުން އަންނަ، ކޯލް ޕާމާ އަކީ މުސްތަގުބަލުގައި ތަފާތު މޮޅު ކުޅުންތެރިއަކަށް ވާނެ ކަމަށް ބުނެފަ އެވެ.
