މާލޭގައި ހުރި މުހިންމު ތާރީހީ އާސާރުތައް މަރާމާތު ކުރުމާއި، އާބާތުރަ ފިލުވުމާއި އެ ތަންތަން ޒީނަތްތެރިކޮށް ބެލެހެއްޓުގެ މަސައްކަތް، ކަލްޗާ މިނިސްޓްރީން ސްޓެލްކޯއާ ހަވާލުކޮށްފި އެވެ.
ސްޓެލްކޯއާ ހަވާލުކޮށްފައި މި ވަނީ، މާލެ ހުކުރު މިސްކިތާއި މިސްކިތުގެ ގޯތިތެރެއާއި މުންނާރުގެ އިތުރުން، މާލެ މެދު ޒިޔާރަތާއި، ކަޅު ވަކަރު މިސްކިތާއި އެ މިސްކިތުގެ ގޯތިތެރެ ބެލެހެއްޓުމެވެ.
ސްޓެލްކޯގައި ބޭއްވި ރަސްމިއްޔާތެއްގައި، މީގެ ފަހުމުނާމާގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ އާއި، ކަލްޗާ މިނިސްޓަރު އާދަމް ނަސީރެވެ.
ކަލްޗާ މިނިސްޓްރީއާއި ސްޓެލްކޯ ގުޅިގެން މި މަސައްކަތް ކުރުމަށް އެއްބަސްވެ ސޮއިކުރީ، ފަސް އަހަރު ދުވަހުގެ މުއްދަތަކަށެވެ.
އާބާތުރަފިލުވުމާއި މަރާމާތާއި، ޒީނަތްތެރިކޮށް ބެލެހެއްޓުމުގެ މަސައްކަތުގެ އިތުރަށް އެ ތަންތަނުގައި ކުރަން ހުރި ކަރަންޓުގެ އެކި މަސައްކަތްތައް ވެސް އެ ފަހުމުނާމާގެ ދަށުން ކުރުމަށް ހަމަޖެހިފައިވެ އެވެ.
ސްޓެލްކޯގައި އެ ކަމަށް ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން، ކުންފުނީގެ މެނޭޖިން ޑިރެކްޓަރު ފަހުމީ ވިދާޅުވީ، މީގެ ކުރިން މޫސުން ތަން ނުދީގެން އެ މަސައްކަތް ލަސްވި ނަމަވެސް ދެން އެ މަސައްކަތް ކުރިއަށް ދިޔުމުގައި ލަސްތަކެއް ނުވާނެ ކަމަށެވެ.
"ހަގީގަތުގައި އަޅުގަނޑުމެންނަށް މޫސުން ތަން ނުދިނީމަ، އެހެން ނޫން ނަމަ މި މަސައްކަތް، އަޅުގަނޑުމެންނަށް ވާނީ މީގެ ކުރިންވެސް ފެށިފައި،" އޭނާ ވިދާޅުވި އެވެ.
ކަލްޗާ މިނިސްޓަރު އާދަމް ނަސީރު ވިދާޅުވި ގޮތުގައި، ސްޓެލްކޯއާ އެ މަސައްކަތް ހަވާލުކުރި ސަބަބަކީ އެ ތަޖުރިބާ އެ ކުންފުނީގައި ހުރެ، މި ދާއިރާއިން މުހިންމު މަސައްކަތްތަކެއް ކުރަމުންދާ ކުންފުންޏަކަށް ވުމެވެ.
"ތަރިކަ ރައްކާތެރިކުރާ މަރުކަޒަށް މީގެ ކުރިން ވެސް ސްޓެލްކޯއަކީ ވަރަށް މުހިއްމު ބައިވެރިއެއް، ވަރަށް ގިނަ އެހީތެރިކަން ދެއްވި، އަޅުގަނޑުމެން މި ވުޒާރާގެ މަސައްކަތާ ހަވާލުވި ފަހުން މިހާތަނަށް ކުރެވުނު މަސައްކަތްތަކުގަ ވެސް ސްޓެލްކޯގެ އެހީތެރިކަން ވަރަށް ބޮޑަށް ލިބުން،" މިނިސްޓަރު ވިދާޅުވި އެވެ.
މާލެއާއި އަތޮޅުތަކުގެ ބައެއް ރަށްތަކަށް ކަރަންޓުގެ ހިދުމަތް ފޯރުކޮށްދެމުން ގެންދާ ކުންފުނި، ސްޓެލްކޯއިން މީގެ ކުރިން ވެސް މާލެ ހުކުރު މިސްކިތާއި ހިރިގާ ވަޅުތަކާއި، މުންނާރާއި، މެދު ޒިޔާރަތުގެ އާބާތުރަފިލުވައި ޒީނަތް ކުރުމުގެ މަސައްކަތްތަކެއް ގެންގޮސްފައިވެ އެވެ.
