މޯލްޑިވްސް ކޮލިފިކޭޝަން އޮތޯރިޓީގެ ވަގު ތައްގަނޑެއް ޖަހައިގެން ތައުލީމީ ސެޓްފިކެޓުތަކެއް ބޭނުން ކުރަމުންދާ ކަމަށް އެ އޮތޯރިޓީން މިއަދު ބުނެފި އެވެ.
އެމްކިޔުއޭއިން ނެރުނު ބަޔާނެއްގައި ބުނެފައި ވަނީ އެ އޮތޯރިޓީގެ ވަގު ރިކޮގްނިޝަން ތައްގަނޑެއް ބޭނުންކޮށް، އެ އޮތޯރިޓީގެ މުވައްޒަފެއްގެ ސޮއި ކޮށްފައިވާ ސަނަދުތަކެއް ދައުރުވަމުންދާކަން ސަމާލުކަމަށް އައިސްފައިވާ ކަމަށެވެ. އެހެންކަމުން، މަތީ ތައުލީމު ފޯރުކޮށްދޭ އިދާރާތަކުންނާއި ވަޒީފާ ދޭ ފަރާތްތަކުން އެކަމަށް ސަމާލުވުމަށް އޮތޯރިޓީ އިން އިލްތިމާސްކޮށްފައިވެ އެވެ.
"އޮތޯރިޓީގެ ފޭކު ތައްގަނޑު ބޭނުންކޮށް، މުވައްޒަފެއްގެ ސޮއި ކުރުން ފަދަ ކަންކަމަކީ މި އޮތޯރިޓީގެ މުވައްޒަފުންގެ ހައްގަށް ލިބޭ އުނިކަމެއް، އަދި މި އޮތޯރިޓީ އިން މަތީ ތައުލީމާއި ތަމްރީނުގެ ފެންވަރު ކަށަވަރު ކުރުމަށްޓަކައި ކުރަމުންދާ މަސައްކަތާ މެދު އާންމުންގެ މެދުގައި ސުވާލު އުފެދުމަށް މެދުވެރިވާ ކަމެއް،" އެމްކިޔުއޭގެ ބަޔާނުގައިވެ އެވެ.
އެ މައްސަލަ ކަމާ ބެހޭ އިދާރާތަކަށް ހުށަހަޅަން މަސައްކަތް ކުރަމުންދާ ކަމަށް އެ އޮތޯރިޓީން ބުނެ އެވެ. އަދި އެ މައްސަލައިގައި ކަމާ ގުޅުން ހުރި އިދާރާތަކާ މަޝްވަރާ ކުރަމުން އަންނަ ކަމަށް ބުނެފައިވެ އެވެ.
މީގެ އިތުރުން، މިފަދަ ކަންކަމަށް މަތީ ތައުލީމް ފޯރުކޮށްދޭ އިދާރާތަކުންނާއި ވަޒީފާ ދޭ ފަރާތްތަކުން ސަމާލުވުމަށް އެމްކިއުއޭއިން އަންގާފައިވެ އެވެ.
