ދުނިޔޭގެ މައި ފުޓްބޯޅަ އިދާރާ، ފީފާ އާއި އޭޝިއާގެ ފުޓްބޯޅަ ހިންގުމުގެ އިސް ފަރާތް، އޭއެފްސީން ރާއްޖޭގެ ފުޓްބޯޅަ އެސޯސިއޭޝަން، އެފްއޭއެމްގެ އިންތިހާބުގެ ކަންކަން އަލުން ފައްޓަން އަންގާފައިވާއިރު، އެފްއޭއެމް އިން އެކްސްޓްރާ އޯޑިނަރީ ކޮންގްރެސް އެއް ބާއްވަން ނިންމައިފި އެވެ.
މި މަހު 31 ވަނަ ދުވަހު ބާއްވަން އެފްއޭއެމް އިން މަސައްކަތް ކުރި އިންތިހާބު ކެންސަލްކުރަން ފީފާ އާއި އޭއެފްސީން އަންގާފައިވަނީ، އެފްއޭއެމްގެ އިލެކްޓޯރަލް ކޯޑުގައި ބަޔާންކޮށްފައިވާ ގޮތަށް، އިލެކްޓޯރަލް ކޮމިޓީ އަކާއި އިލެކްޓޯރަލް އެޕީލް ކޮމިޓީއެއް އެކުލަވާލާފައިނުވާތީ އެވެ. އެކަން ހާމަވެގެން ދިޔައީ، އެފްއޭއެމްގެ އިލެކްޓޯރަލް ކޮމިޓީން އެފްއޭއެމްގެ އިންތިހާބުގައި ވާދަކުރަން ހުށަހެޅި، އެފްއޭއެމްގެ ކުރީގެ ރައީސް، އަހުމަދު ތޯރިގު (ޓޮމް)ގެ ކެންޑިޑެސީ ބާތިލްކުރަން ނިންމުމުން، އޭނާ އެޕީލަށް ހުށަހެޅި ހިސާބުންނެވެ.
ތޯރިގުގެ އިތުރުން އެފްއޭއެމް އިންތިހާބަށް ވާދަކުރަން ކެންޑިޑެސީ ހުށަހަޅާފައިވަނީ ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ. އެފްއޭއެމްގެ މިހާރުގެ ރައީސް، ބައްސާމް އަދީލް ޖަލީލް އިތުރު ދައުރަކަށް ކުރިމަތިނުލާން ނިންމަވާފައިވާއިރު، އެ އެސޯސިއޭޝަނުން އަވަސް އިންތިހާބަކަށް ގޮވާލީ، ބައްސާމް އިސްކޮށް ހިމެނޭ ގޮތަށް އޭނާގެ ލީޑަޝިޕާ މެދު ޖިނާއީ ތަހުގީގެއް ހިނގަމުން ދަނިކޮށެވެ. އެއީ، އެފްއޭއެމަށް ލިބޭ ފައިސާ އަށް ހިޔާނަތްތެރިވެފައިވާ މައްސަލައިގަ އެވެ.
ބައްސާމްގެ އެކްސްކޯގައި ހިމެނޭ ގިނަ މެމްބަރުންތަކެއް އިސްތިއުފާ ދިނުމާ އެކު، އެފްއޭއެމްގެ ރައީސްގެ މަގާމުން އޭނާ އަށް ގެއްލުނު ހާލަތެއް ވެސް ކުރިމަތިވި އެވެ. އެކަމަކު، އެފްއޭއެމް އިން ބުނީ، އެފްއޭއެމް އަސާސީ ގަވާއިދުގައި ބުނާ ސައްހަ އަދަދު ހަމަވާތީ، ރައީސަކަށް ބައްސާމަށް ހުރެވޭނެ ކަމަށެވެ.
މާޒިޔާ ސްޕޯޓްސް އެންޑް ރެކްރިއޭޝަނުން އިސްނަގައި، 10 ކްލަބްގެ ތާއީދާ އެކު އެފްއޭއެމްގެ އެކްސްޓްރާ އޯޑިނަރީ ކޮންގްރެސް ބާއްވަން ވެސް އޮތީ ހުށަހަޅައިފަ އެވެ.
އެފްއޭއެމް އިން ރޭ ނެރުނު ބަޔާނުގައި ބުނެފައިވަނީ އިއްޔެ ބޭއްވި ހިންގާ ކޮމިޓީގެ ބައްދަލުވުމުގައި ނިންމާފައިވަނީ އެކްސްޓްރާ އޯޑިނަރީ ކޮންގްރެސް އެއް ބާއްވަން ނިންމާފައިވާ ކަމަށެވެ. އަދި އޮންނަ ގަވާއިދުގެ ތެރެއިން ކޮންގްރެސް ބާއްވާނެ ތާރީހާއި އެހެނިހެން މައުލޫމާތު ހިއްސާކުރާނެ ކަމަށެވެ.
ބަޔާނުގައި ދެން ބުނެފައިވަނީ އެސޯސިއޭޝަންގެ އެއްވެސް މެމްބަރެއްގެ ހައްގަށް އުނިކަމެއް އަންނަ ވަރުގެ ކަމެއް ނުކުރާނެ ކަމަށާއި މެމްބަރުންގެ ހައްގުތައް ކަށަވަރުކުރަން ކުރެވުނު ހުރިހާ ކަމެއް ކުރާނެ ކަމަށެވެ. އަދި ކޮންމެ ކަމެއް ނިންމި ކަމުގައި ވިޔަސް އިސްކުރާނީ ފުޓްބޯޅައިގެ މަސްލަހަތު ކަމަށް އެފްއޭއެމުން ވަނީ ބުނެފަ އެވެ.
އިއްޔެގެ އެކްސްކޯ ބައްދަލުވުމުގައި އެކަށީގެންވާ ކޯރަމް ހަމަވި ކަމަށް އެފްއޭއެމުން ވަނީ ބުނެފަ އެވެ. އެކަމަކު، ބައިވެރިވި މެމްބަރުންގެ މައުލޫމާތެއް އެފްއޭއެމް އިން ހާމައެއްނުކުރެ އެވެ.
ފީފާ އާއި އޭއެފްސީން އެފްއޭއެމްގެ އިންތިހާބުގެ ކަންކަން ކެންސަލްކުރިއިރު، އެފްއޭއެމް ހިނގަނީ ގަވާއިދާ އެއްގޮތަށް ނޫންކަން ފާހަގަކޮށް، މީގެ ކުރިން، ރާއްޖޭގެ ކޮމިޝަނާ އޮފް ސްޕޯޓްސް، މުހައްމަދު ތޮލާލް ވަނީ އެފްއޭއެމުން ބާއްވަން އުޅުނު އިންތިހާބުގެ ކަންކަން މަޑުޖައްސާލަން އަންގައިފަ އެވެ.
