ގައުމީ ބާސްކެޓްބޯޅަ ލީގުގެ އަންހެން ޑިވިޝަނުގައި ކުއީންސް ބާސްކެޓްބޯލް ކްލަބުން ކުޅުނު ތިން ވަނަ މެޗުން ވެސް މޮޅުވެ، ލީގުގެ ފުރަތަމަ. ބުރުގެ ރޭންކިން އެއް ވަނައިގައި ހަމަޖެހިލައިފި އެވެ.
ފުރަތަމަ މެޗުން ކުއީންސް ވަނީ އެލީޓްސް ސްޕޯޓްސް ކްލަބް ބަލިކޮށްފަ އެވެ. އޭގެ ފަހުން، ދެ ވަނަ މެޗުގައި ކުރީގެ ޗެމްޕިއަން، ސައިކްލޯން ބާސްކެޓްބޯލް ކްލަބް އަތުން ކުރިހޯދީ ފަރަގު ބޮޑު ނަތީޖާ އަކުންނެވެ. ރޭ ކުޅުނު މެޗުން ކުއީންސް ވަނީ ލަޔަނެސް އަތުން 84-37 އިން މޮޅުވެފަ އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު މެޗުގެ ފުރަތަމަ ކުއާޓަރު ނިމުނުއިރު ވެސް ކުއީންސް އިން ވަނީ ލަޔަނެސް އަށް ފުރުސަތެއް ނުލިބޭ ވަރުގެ ބޮޑު ލީޑެއް ނަގައިފަ އެވެ. ކުއީންސް އިން ފުރަތަމަ ކުއާޓަރު ނިންމާލީ 32-04 އިން ކުރީގައި އޮވެގެންނެވެ. އެ ފޯމުގައި ކުއީންސް އިން ދެ ވަނަ ކުއާޓަރު ކުޅެލައި، މި ކުއާޓަރުގައި ނިންމާލީ ލަޔަނެސް އަށް ޕޮއިންޓެއް ވެސް އެއްކުރަން ފުރުސަތެއް ނުދީ އެވެ.
އެކަމަކު، ތިން ވަނަ ކުއާޓަރުގައި ކުއީންސް އިން ކޮންމެ ވެސް ވަރަކަށް ހަމަޖެހިލައި، ގޭމް މެނޭޖްކުރަން މަސައްކަތް ކުރި އެވެ. އޭގެ ބޭނުންހިފައި، ލަޔަނެސް އިން ވަނީ ޕޮއިންޓްތަކެއް އެއްކޮށްފަ އެވެ. ފަހު ކުއާޓަރުގައި ކުއީންސް އިން ފުރަތަމަ ދެ ކުއާޓަރުގައި ދެއްކި ރޫހުގައި ކުޅެ، މެޗުން މޮޅުވީ އެވެ.
މި މެޗުގައި ކުއީންސްގެ އެންމެ ބޮޑު ތަފާތަކީ އެ ޓީމުގައި ހިމެނޭ އެންމެ ތަޖުރިބާކާރު ދެ ކުޅުންތެރިން ކަމަށްވާ ފާތިމަތު ރިޝްމާ އާއި އައިމިނަތު ޝިއުރާ އެވެ. ރިޝްމާ ވަނީ 18 ޕޮއިންޓް އެއްކޮށްފަ އެވެ. ޝިއުރާ ވަނީ 14 ޕޮއިންޓް ސްކޯކޮށްފަ އެވެ.
ރެޑްވިންގްސް އާއި ރޯޔަލްސް ކުޅުނު މެޗުގެ ތެރެއިން.--- ފޮޓޯ: ސިޑިބަރި/ބާސްކެޓު
ގައުމީ ބާސްކެޓްބޯޅަ ލީގުގެ ފިރިހެން ޑިވިޝަނުގައި ރޭ ރެޑްވިންގްސް ބާސްކެޓްބޯލް ކްލަބުން ވަނީ 107-54 އިން ރޯޔަލްސް ބާސްކެޓްބޯލް ކްލަބް ބަލިކޮށްފަ އެވެ.
ހުރިހާ ކުއާޓަރެއްގައި ވެސް ރެޑްވިންގްސް އިން ވަނީ މި މެޗު ޑޮމިނޭޓްކޮށްގެން މޮޅަށް ކުޅެފަ އެވެ. ރެޑްވިންގްސް އަށް އެންމެ ގިނަ ޕޮއިންޓް ހޯދައިދިނީ، 19 ޕޮއިންޓް އެއްކުރި މުހައްމަދު ރިޝްވާން އެވެ. އެ ޓީމުގެ މުހައްމަދު ޒީދާން ނައީމް ވަނީ 17 ޕޮއިންޓް ސްކޯކޮށްފަ އެވެ.
ދެން އެންމެ ރަނގަޅު ކުޅުމެއް ދެއްކި، އާދަމް ޔާފިއު އިބްރާހިމް އާއި ހަސަން ނަދީމް ކޮންމެ ކުޅުންތެރިއަކު ވަނީ 13 ޕޮއިންޓް ސްކޯކޮށްފަ އެވެ.
ލީގުގައި މިރޭ ފުރަަތަމަ އޮތީ އަންހެން ޑިވިޝަނުގައި އެލީޓް ސްޕޯޓްސް ކްލަބާއި ސައިކްލޯން ކުޅޭ މެޗެވެ. ދެން އޮތީ، ފިރިހެން ޑިވިޝަނުގެ އެއް ވަަނައިގައި އޮތް ޓީރެކްސް ބާސްކެޓްބޯލް ކްލަބާއި ރެޕްޓާސް ބާސްކެޓްބޯލް ކްލަބް ކުޅޭ މެޗެވެ.
