މިހާރު ކުރިއަށްދާ ގައުމީ ބާސްކެޓްބޯޅަ ލީގުގެ ފިރިހެން ޑިވިޝަނުގެ ދެ ވަނަ ބުރުގައި ކުޅުނު ފުރަތަމަ މެޗުތަކުން ޓީރެކްސް ބާސްކެޓްބޯލް ކްލަބާއި ކިންގްސް ބާސްކެޓްބޯލް ކްލަބް މޮޅުވެއްޖެ އެވެ.
ލީގު ބުރުގެ ފުރަތަމަ ބުރުގައި ޓީރެކްސް އިން ވަނީ ކުޅުނު ފަސް މެޗުން ވެސް މޮޅުވެފަ އެވެ. އަނެއްކޮޅުން، ކިންގްސް ހަމައެކަނި ބަލިވި މެޗަކީ ޓީރެކްސްއާ ދެކޮޅަށް ކުޅުނު މެެޗެެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ފުރަތަމަ މެޗުގައި ޓީރެކްސް އިން ނުކުތީ، ސްޓިންގާސް ބާސްކެޓްބޯލް ކްލަބާ ދެކޮޅަށެވެ. މި މެޗުން ޓީރެކްސް މޮޅުވީ، 88-48 އިންނެވެ. މެޗުގެ ފުރަތަމަ ކުއާޓަރުން ފެށިގެން ޓީރެކްސް އިން ކޮންޓްރޯލް ކުރި މި މެޗުގައި އެ ޓީމުން ވަނީ ފުރަތަމަ ތިން ކުއާޓަރުގައި އެވްރެޖްކޮށް، 20 ޕޮއިންޓް ސްކޯ ކޮށްފަ އެވެ. ފަހު ކުއާޓަރުގައި އެ ވަރަށް ސްކޯ ނުުރެވުނު ކަމުގައި ވިޔަސް، ހަމަޖެހިލައިގެން ރަނގަޅު ލީޑެއްގައި އޮވެ މެޗު ނިންމާލި އެވެ.
މި މެޗުގެ މޮޅު ކުޅުންތެރިއަކަށް ހޮވުނު ޓީރެކްސްގެ ކެޕްޓަން، އިސްމާއިލް ވިލްދާން ވަނީ 16 ޕޮއިންޓް އެއްކޮށްފަ އެވެ.
ރޭ ކުޅުނު ދެ ވަނަ މެޗުގައި ކިންގްސް އިން ރެޑްވިންގްސް ބާސްކެޓްބޯލް ކްލަބް އަތުން މޮޅުވީ، 112-80 އިންނެވެ. ކިންގްސް އިން ފުރަތަމަ ކުއާޓަރުގައި ލީޑެއް ނެގިއިރު، ދެން ކުޅުނު ދެ ކުއާޓަރުގައި ރެޑްވިންގްސް އިން ކުޅުން ރަނގަޅުކޮށް ފަރަގު ކުޑަކުރި އެވެ. އެކަމަކު، މުޅި މެޗަށް ބަލާއިރު، ކިންގްސް އިން ހިފަހައްޓަމުންދިޔަ ޕާފޯމަންސް ލެވަލް ދަމަހައްޓައި، އެ ޓީމުން މެޗު ކާމިޔާބުކުރީ އެވެ.
މެޗުގެ މޮޅު ކުޅުންތެރިއަކަށް ހޮވުނު، ކިންގްސްގެ އަބްދުﷲ އަމްޒަރު ވަނީ 17 ޕޮއިންޓް ހޯދައިފަ އެވެ. އެ ޓީމުގެ އިބްރާހިމް ނަސީމް ވަނީ 19 ޕޮއިންޠް ސްކޯކޮށްފަ އެވެ.
