މިހާރު ކުރިއަށްދާ ގައުމީ ބާސްކެޓްބޯޅަ ލީގުގެ ފުރަތަމަ ބުރުގައި ޓީރެކްސް ބާސްކެޓްބޯލް ކްލަބުން ކުޅުނު ފަހު މެޗުން ވެސް މޮޅުވެ، ފުރިހަމަ ރެކޯޑަކާ އެކު މި ބުރު ނިންމާލާފައިވާއިރު، ދެ ވަނައިގައި އޮތް ކިންގްސް ބާސްކެޓްބޯލް ކްލަބުން ވެސް މޮޅަކާ އެކު މި ބުރު ނިންމާލައިފި އެވެ.
ޓީރެކްސް އިން ފަހު މެޗުގައި ރެޑްވިންގްސް ބާސްކެޓްބޯލް ކްލަބާ ދެކޮޅަށް ކުޅެ މޮޅުވީ، 86-66 އިންނެވެ. ކިންގްސް އިން ރޭ ސްޓިންގާސް ބާސްކެޓްބޯލް ކްލަބާ ކުޅެ މޮޅުވީ 134-23 އިންނެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު މެޗުގެ ފުރަތަމަ ކުއާޓަރުގައި ލީޑުނެގީ، ރެޑްވިންގްސް އިންނެވެ. އެ ޓީމުން މި ކުއާޓަރު ނިންމާލިއިރު، އޮތީ 16-17 އިން ކުރީގަ އެވެ. އެކަމަކު، ދެ ވަނަ ކުއާޓަރު ނިމެންވާއިރަށް ޓީރެކްސް އިން ނަތީޖާ އަނބުރާލައި، މެޗުގެ ކޮންޓްރޯލް ހޯދި އެވެ. ދެން، ކުޅުނު ދެ ކުއާޓަރުގައި ވެސް އެ ރޫހު ދައްކައި، ޓީރެކްސް އިން މި މެޗުން މޮޅުވީ އެވެ.
މެޗުގައި ޓީރެކްސް އަށް އެންމެ ރަނގަޅު ކުޅުމެއް ދައްކައިދިނީ، 27 ޕޮއިންޓް އެއްކުރި އަހުމަދު ފިރާޝް އެވެ. އެ ޓީމުގެ ކެޕްޓަން، އިސްމާއިލް ވިލްދާން ވަނީ 18 ޕޮއިންޓް ސްކޯކޮށްފަ އެވެ. މި މެޗުގައި ރެޑްވިންގްސްގެ މުހައްމަދު ރިޝްވާން ވަނީ 19 ޕޮއިންޓް އެއްކޮށްފަ އެވެ.
ކިންގްސް އިން ރޭ ކުޅުނު މެޗުގެ ފުރަތަމަ ކުއާޓަރުން ފެށިގެން އެ ޓީމުން ވަނީ ކޮންޓްރޯލް ނަގައިފަ އެވެ. ކިންގްސް އަށް ރޭގެ މެޗުގައި އެންމެ ރަނގަޅު ކުޅުމެއް ދައްކައިިދިނީ، 25 ޕޮއިންޓް ސްކޯކުރި ޓީމުގެ ކެޕްޓަން، އަބްދުﷲ އަމްޒަރު މުހައްމަދު އާއި 20 ޕޮއިންޓް އެއްކުރި، އިބްރާހިމް ނަސީމް އެވެ.
ލީގުގެ ފުރަތަމަ ބުރު ނިމުނުއިރު، ޓީރެކްސް އެއް ވަނައިގައި އޮތްއިރު ކިންގްސް އޮތީ ދެ ވަނައިގަ އެވެ. މިހާރު މި އޮތް ގޮތުން، ލީގު ޗެމްޕިއަން ކަނޑައެޅިގެންދާނީ ދެ ވަނަ ބުރުގައި ކިންގްސް އާއި ޓީރެކްސްގެ ކުރިމަތިލުމުންނެވެ.
