ފަހު މެޗުގައި ކިންގްސް ބާސްކެޓްބޯލް ކްލަބް އަތުން ބަލިވި ނަމަވެސް ޓީރެކްސް އިން ގައުމީ ބާސްކެޓްބޯޅަ ލީގުގެ ޗެމްޕިއަންކަން ހޯދައިފި އެވެ.
އެންމެ ފަހުން ދެ ފަހަރުގެ ގައުމީ ލީގުގެ ޗެމްޕިއަން ކިންގްސް އިން ރޭގެ މެޗުން ޓީރެކްސް ކައިރިން ކުރިހޯދީ 47-48 އިންނެވެ. މި މެޗާ ހަމައަށް އައިއިރު، ޓީރެކްސް ވަނީ ކުޅުނު ހުރިހާ މެޗަކުން މޮޅުވެފަ އެވެ. ކިންގްސް އަތުން ފުރަތަމަ ބުރުގައި ޓީރެކްސް މޮޅުވި އެވެ. އެކަމަކު، ފަހު މެޗުގައި ކިންގްސް އަތުން ބަލިވި ނަމަވެސް ލީގުގެ ޖުމްލަ ރޭންކިން އަށް ބަލާއިރު، ޓީރެކްސް އަށް ކުރި ލިބުނީ އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ލީގުގެ ފަހު މެޗުގައި، ފުރަތަމަ ކުއާޓަރު ނިމުނުއިރު، ކިންްގސް އޮތީ ފަހަތުގަ އެވެ. ޓީރެކްސް ލީޑުގައި އޮތީ، 17-14 އިންނެވެ.
އެކަމަކު، ދެ ވަނަ ކުއާޓަރުގައި ކިންގްސް އިން ކުޅުން ރަނގަޅުކޮށް ލީޑެއް ނެގި އެވެ. މިއީ، މެޗުގެ ނަތީޖާ ކިންގްސް ކޮޅަށް އެނބުގައި މުހިންމު ވި ކުއާޓަރެކެވެ. އެއީ، ދެން ކުޅުނު ކުއާޓަރުގައި ވެސް ޓީރެކްސް އަށް ނަތީޖާ އަނބުރާލެވޭ ގޮތެއްނުވި އެވެ. އަދި ހަތަރު ވަނަ ކުއާޓަރުގައި ދެ ޓީމަށް ވެސް ޕޮއިންޓް ސްކޯ ކުރެވުނީ އެއްވަރަށެވެ.
ކިންގްސް އަށް މި މެޗު ކާމިޔާބު ކޮށްދިނުމުގައި، އެންމެ މުހިންމު ދައުރެއް އަދާކުރި ކުޅުންތެރިންނަށް ބަލާއިރު، ކެޕްޓަން، އަބްދުﷲ އަމްޒަރު، އިބްރާހިމް ނަސީމް، އަހުމަދު އަލީ މުސްތަފާ (ބޮމްބެ) އަދި އަލްދާން އައިކް ރަމީޒް ހިމެނެ އެވެ. ނަސީމް އާއި އަލްދާން ކޮންމެ ކުޅުންތެރިއަކު ނުވަ ޕޮއިންޓް ސްކޯކުރިއިރު، ބޮމްބެ އާއި އަމްޒަރު، ކޮންމެ ކުޅުންތެރިއަކު އަށް ޕޮއިންޓް އެއްކުރި އެވެ.
ޓީރެކްސް އަށް މި މެޗުގައި އެންމެ ރަނގަޅު ކުޅުމެއް ދައްކައިިދިނީ، 10 ޕޮއިންޓް އެއްކުރި، ތަޖުރިބާކާރު ކުޅުންތެރިޔާ، މުހައްމަދު ހުވައިލިދު އަލީ (ހުވޭ) އެވެ.
ގައުމީ ލީގަށް ފަހު ދެން އޮންނާނީ ގައުމީ ބާސްކެޓްބޯޅަ މުބާރާތެވެ. އެ މުބާރާތުގައި ވާދަކުރާނީ ކޮންމެ ޑިވިޝަނަކުން (އަންހެން އަދި ފިރިހެން ޑިވިޝަނުން) ވެސް ގަދަ ހަތަރެކެވެ.
އެންމެ ފަހުގެ ގައުމީ ޗެމްޕިއަނުންނަކީ އަންހެން ޑިވިޝަނުގައި ސައިކްލޯން ބާސްކެޓްބޯލް ކްލަބް އެވެ. އަދި ފިރިހެން ޑިވިޝަން ކާމިޔާބުކުރީ ކިންގްސް އިންނެވެ. އެންމެ ފަހުން، ބޭއްވި ތިން ފަހަރު ވެސް ގައުމީ ތަށި ހޯދީ ކިންގްސް އިންނެވެ.
