ގައުމީ ބާސްކެޓްބޯޅަ ލީގުގެ ފިރިހެން ޑިވިޝަނުގައި ރޭ ކުޅުނު މެޗުން މޮޅުވެ، ކިންގްސް ބާސްކެޓްބޯލް ކްލަބުން ދެ ވަނަ މޮޅު ހޯދިއިރު، ރެޑްވިންގްސް ބާސްކެޓްބޯލް ކްލަބުން ސްޓިންގާސް ބާސްކެޓްބޯލް ކްލަބް ބަލިކޮށް އުންމީދެއް ހޯދައިފި އެވެ.
ކިންގްސް އިން ވަނީ މުބާރާތުގައި ކުޅުނު ފުރަތަމަ މެޗުގައި، ރޯޔަލްސް ބާސްކެޓްބޯލް ކްލަބް، 125-42 އިން ބަލިކޮށްފަ އެވެ. ރޭ ކިންގްސް އިން ރެޕްޓާސް ބާސްކެޓްބޯލް ކްލަބް އަތުން މޮޅުވީ، 83-62 އިންނެވެ. ފުރަތަމަ މެޗުގައި ރެޕްޓާސް އަތުން ބަލިވި ރެޑްވިންގްސް އިން ރޭ ވަނީ ސްޓިންގާސް އަތުން 111-50 އިން މޮޅުވެފަ އެވެ.
ކުޅުނު ދެ މެޗުން ވެސް މޮޅުވެފައި އޮތް ދެ ޓީމަކީ، ކިންގްސް އާއި ޓީރެކްސް ބާސްކެޓްބޯލް ކްލަބް އެވެ. ޓީރެކްސް ދެ މެޗުން ވެސް މޮޅުވީ 100 އަށް ވުރެ މަތިން ސްކޯކޮށްގެންނެވެ. ޓީރެކްސް ފުރަތަމަ މެޗުން، ސްޓިންގާސް އަތުން މޮޅުވީ 137-46 އިންނެވެ. އަދި ދެ ވަނަ މެޗުން، 105-34 އިން ރޯޔަލްސް އަތުން ވަނީ މޮޅުވެފަ އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ފުރަަތަމަ މެޗުގައި، ކިންގްސް އިން ފުރަތަމަ ކުއާޓަރު ނިންމާލީ، 30-20 އިން، ކުރީގައި އޮވެ، 10 ޕޮއިންޓްގެ ލީޑަކާ އެކު އެވެ. މި މެޗުގައި އެންމެ ވާދަވެރިކޮށް ފެނުނީ ތިން ވަނަ ކުއާޓަރު އެވެ. މި ކުއާޓަރުގައި ކޮންމެ ޓީމަކަށް ވެސް ސްކޯ ކުރެވުނީ 12 ޕޮއިންޓެވެ. އެކަމަކު، ފަހު ކުއާޓަރުގައި ކިންގްސް އިން ތަފާތު ދައްކައި މެޗުން މޮޅުވީ އެވެ.
މެޗުގައި ކިންގްސް އަށް އެންމެ ރަނގަޅު ކުުޅުމެއް ދައްކައިދިނީ، 18 ޕޮއިންޓް ހޯދި އަބްދުﷲ އަމްޒަރު އެވެ. މީގެ ތެރެއިން، 11 ޕޮއިންޓް ސްކޯ ކުރީ ރީބައުންޑް އިންނެވެ. ކިންގްސްގެ މުހައްމަދު ސަބީހު ތައުފީގު ވަނީ 16 ޕޮއިންޓް އެއްކޮށްފަ އެވެ.
ގައުމީ ބާސްކެޓްބޯޅަ ލީގުގައި ރޭ ރެޑްވިންގްސްގެ ލައިލް ޝިފާން ޕޮއިންޓެއް ސްކޯކުރަން މަސައްކަތްކުރަނީ.--- ފޮޓޯ: ސިޑިބަރި/ބާސްކެޓު
ސްޓިންގާސްއާ ކުޅުނު މެޗުގައި ރެޑްވިންގްސް އިން ވަނީ ފުރަތަމަ ކުއާޓަރުގެ ފަހުކޮޅުން ފެށިގެން މެޗުގެ ކޮންޓްރޯލް ނަގައިފަ އެވެ. އެ ގޮތުން، ރެޑްވިންގްސް އިން ފުރަތަމަ ކުއާޓަރު ނިމުނުއިރު ކުރީގައި އޮތީ 19-16 އިންނެވެ. އެކަމަކު، މި ފަރަގު ދެން ކުޅުނު ކުއާޓަރުތަކުގައި ބޮޑުކޮށް، ރެޑްވިންގްސް އިން ބޮޑު ލީޑެއްގައި އޮވެ މެޗުން މޮޅުވީ އެވެ.
މި މެޗުގައި ރެޑްވިންގްސް އަށް އެންމެ ގިނަ ޕޮއިންޓް ސްކޯކޮށްދިނީ، 21 ޕޮއިންޓް އެއްކުރި ޒައިދާން އާތިފް ޝުކޫރު އެވެ. އެ ޓީމުގެ މުހައްމަދު ރިޝްވާން އާއި މުހައްމަދު ޒީދާން ނައީމް ވަނީ ކޮންމެ ކުޅުންތެރިއަކު، 16 ޕޮއިންޓް ސްކޯކޮށްފަ އެވެ.
ގައުމީ ބާސްކެޓްބޯޅަ ލީގުގައި، މިރޭ 19:00 ކުޅޭ މެޗަކީ އަންހެން ޑިވިޝަނުގައި ސައިކްލޯން ބާސްކެޓްބޯލް ކްލަބާއި ކުއީންސް ބާސްކެޓްބޯލް ކްލަބް ކުޅޭ މެޗެވެ. މި ދެ ޓީމުން ވެސް ވަނީ ފުރަތަމަ މެޗުން މޮޅުވެފަ އެވެ. މި މެޗަށް ފަހު، 21:00 ގައި ފަށާނީ އަންހެން ޑިވިޝަނުގައި ލަޔަނެސް އާއި އެލީޓް ސްޕޯޓްސް ކްލަބް އެވެ.
