އެފްއޭއެމްގެ އިންތިހާބުގެ ކަންކަން މަޑުޖައްސާލަން، ކޮމިޝަނާ އޮފް ސްޕޯޓްސް، މުހައްމަދު ތޮލާލް އަންގަވާފައިވަނިކޮށް، އެކަން އަދިވެސް އެފްއޭއެމް އިން ކުރިއަށްގެންދަމުން އަންނައިރު، މި ވަގުތު ފުޓްބޯޅައިގެ ހާލަތު މި އޮތްގޮތަށް ބަލާއިރު، އެންމެން މަސައްކަތް ކުރަންވީ، ފީފާގެ ސަސްޕެންޝަނެއް ނައިސް މީގެ އަށް ހައްލެއް ހޯދުމަށް ކަމަށް ތޮލާލް ވިދާޅުވެއްޖެ އެވެ.
އެފްއޭއެމް އިންތިހާބާ ގުޅޭ މައުލޫމާތު ސާފުކުރަން ތޮލާލް، އެފްއޭއެމް އަށް ފޮނުވި ސިޓީ އަށް އެ ކަނޑައަޅާފައިވާ މުއްދަތުގެ ތެރޭގައި ޖަވާބު ދީފައިނުވެ އެވެ. އެހެންވެ، ތޮލާލް ވަނީ ސްޕޯޓްސް މިނިސްޓްރީން ނެރުނު ބަޔާނެއް މެދުވެރިކޮށް، އެފްއޭއެމްގައި ގަވާއިދާ ހިލާފަށް ގިނަ ކަންތައްތަކެއް ކުރަމުން އަންނާތީ، އިންތިހާބުގެ ކަންކަން މަޑުޖައްސާލަން އަންގައިފަ އެވެ.
އެކަމަކު، ކޮމިޝަނަރުގެ އެ އެންގުމަށް ބެލުމެއް ނެތި އެފްއޭއެމް އިން އަންނަނީ އިލެކްޓޯރަލް ކޮމިޓީ މެދުވެރިކޮށް، މި މަހު 31 ވަނަ ދުވަހު، އެފްއޭއެމްގެ އިންތިހާބު ބާއްވަން ކުރަން ޖެހޭ ކަންކަން ކުރަމުންނެވެ.
އެ ގޮތުން، އިލެކްޓޯރަލް ކޮމިޓީން ވަނީ އެފްއޭއެމް އިންތިހާބުގައި ވާދަކުރާ ދެ ކެންޑިޑޭޓުން (މުފާވިޒް ހާޝިމް - މުފާ އާއި އަހުމަދު ތޯރިގު - ޓޮމް) ވެލެންސިއާ އިން ތާއީދު ސިޓީ ދީފައިވާ މައްސަލައިގައި އޭއެފްސީ އާއި ފީފާގެ ލަފަޔަކަށް އަހައިފަ އެވެ.
މާދަމާގެ ނިޔަލަށް އެކަމަށް އޭއެފްސީން ލަފަޔެއް ދޭން އިލެކްޓޯރަލް ކޮމިޓީން ވަނީ އެދިފަ އެވެ.
ސަރުކާރުތަކުގެ ސިޔާސަތާއި ގައުމުތަކުގެ ގާނޫނުތަކާއި ކުޅިވަރު އެސޯސިއޭޝަންގެ އަސާސީ ގަވާއިދާ، މި ކަންކަމުގައި ހުންނަ ފުށުއެރުންތަކެއްގެ ސަބަބުން ތިން ވަނަ ފަރާތެއްގެ ނުފޫޒުތަކެއް ފޯރާ ކަމަށް ބުނެ، ފީފާ އިން ވަނީ މިދިޔަ ހަތަރު ވަރަކަށް އަހަރެއް ތެރޭ، ސާކް ސަރަހަައްދުގެ ތިން ގައުމެއް ސަސްޕެންޑް ކޮށްފަ އެވެ. އެއީ، އިންޑިއާ، ސްރީ ލަންކާ އަދި ޕާކިސްތާން އެވެ. އިންޑިއާ ސަސްޕެންޝަނުގައި އޮތީ ހަފްތާ އެކެވެ. ސްރީ ލަންކާ ހަތް މަސް ދުވަސް ސަސްޕެންޝަނުގައި ހޭދަކުރި އެވެ. ޕާކިސްތާން އަށް މިދިޔަ ފަސް އަހަރު ތެރޭ ގިނަ ފަހަރުތަކެއް މަތިން ސަސްޕެންޝަން އަ އެވެ.
ސްޕޯޓްސް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި، "އަދަދު" އިން ކުރި ސުވާލަކަށް ދެއްވި ޖަވާބުގައި ތޮލާލް ވިދާޅުވީ، އެފްއޭއެމްގެ ކޮންމެ އިންތިހާބަކާ ދިމާކޮށް ވެސް ފީފާގެ ސަސްޕެންޝަނުގެ ވާހަކަ އަންނަ ކަމަށެވެ.
"އެހެންވީމަ މި ފަހަރުގައި ވެސް ސަސްޕެންޝަންގެ ވާހަކަ ނާންނާނެއެކޭ އަޅުގަނޑެއް ނުދަންނަވާނަން. ސަސްޕެންޑްނުވެ، އަޅުގަނޑުމެންނަށް ކުރިއަށްދެވޭނެތޯ އެއީ އަޅުގަނޑުމެން ކުރަން ޖެހޭނެކަމެއް. އެ ގޮތަށް ކުރުމަށްޓަކައި، މަޝްވަރާ ކުރަން ޖެހޭ ފަރާތްތަކާ ކުރަމުން ގެންދާނަން،" ތޮލާލް ވިދާޅުވި އެވެ.
އޭނާ ވިދާޅުވީ، ސަސްޕެންޝަނަކަށް ގޮސްފިއްޔާ ދެން ކަންތައްތައް ކުރަން ވިސްނަން އެންމެ ރަނގަޅީ އެ ފަދަ ހިސާބަކަށް ގޮސްފިނަމަ ކަމަށެވެ.
"ސަސްޕެންޝަނަަކާ ހަމައަށް ގެންދަން އެސޯސިއޭޝަނުން މަސައްކަތް ކުރާ ކަމަށްވާނަމަ އެ އެސޯސިއޭޝަނަކަށް އެ ދޭން ޖެހޭ އެއްބާރުލުމަކަށް ހުއްޓުމެއް އަންނާނެހެން ހީވަނީ. ހަމަ ޔަގީނުން ވެސް ކޮމިޝަނާ އޮފް ސްޕޯޓްސްގެ ފަރާތުން އެ ލިބެން ޖެހޭ އެއްބާރުލުމަށް ކޮންމެވެސް ވަރެއްގެ ހުއްޓުންތަކެއް އައިސްފާނެހެން ހީވަނީ،" އެތުލެޓިކްސް އެސޯސިއޭޝަންގެ ރައީސްކަން ގިނަ އަހަރުތަކެއް ވަންދެން ކުރައްވާފައިވާ ތޮލާލް ވިދާޅުވި އެވެ.
"އެސޯސިއޭޝަނުން ވެސް މަސައްކަތް ކުރަންވީ ސަސްޕެންޝަނާ ހަމައަށް ދިޔަ ނުދީ މިކަން ހައްލުވެގެން ހުރިހާ އެންމެންނަށް ބައިވެރިވެގެން އެންމެންގެ ކުޅިވަރެއްގެ ގޮތުގައި ކުރިއަށްދެވޭނެ ގޮތަކަށް ކަންކަން ކުރުމަށް. އެހެންވެއްޖިއްޔާ، އިންތިހާބު ވެސް ކުރިއަށްދާނެ، ދެން ހުރި ކަންތައް ވެސް ކުރިއަށްގެންދެވޭނެ،"
ތޮލާލް ވިދާޅުވީ، އެފްއޭއެމްގައި މިހާރު ހުރި މައްސަލަތަކަކީ، 2020 ވަަނަ އަހަރު ބޭއްވި އެ އެސޯސިއޭޝަންގެ އިންތިހާބަށް ފަހު އަންނަ ކަންތައްތަކެއް ކަމަށެވެ. މީގެ މިހާރު އޮތް ހާލަތުން އެންމެ މުހިންމު ކަމަކީ، ކްލަބްތަކުގެ މައްސަލަ ހައްލުކޮށް، އަދި އެފްއޭއެމަށް ވެސް ދެމެހެއްޓެނިވި ބަދަލުތަކެއް ގެންނަން ޖެހޭނަމަ އެކަމެއް ކުރުން ކަމަށް ތޮލާލް ވިދާޅުވި އެވެ.
"ކްލަބްތަކުގެ މައްސަލަ ހައްލުވެގެން އެފްއޭގެ މައްސަލަ ހައްލުކުރެވޭނީ. އެފްއޭގެ ދައުރު ހަމަވާން ހައެއްކަ މަސް އެބައޮތް އެހެންވެ، އަަވަސް އަރުވާލައިގެން އިންތިހާބު ބާއްވަން ހިފަންޖެހޭ ހެން ހިއެއްނުވޭ. މައްސަލަތައް ހައްލުކޮށްގެން މަޑުމަޑުން ވީހާވެސް ބޮޑަށް އެންމެ އިންސާފުވެރިކޮށް މަސްލަހަތު ފުށޫނާރާނެ ގޮތަކަށް މި އިންތިހާބުގެ މަސައްކަތް ކުރުން އެއީ އަޅުގަނޑުމެން މި ކުރާ މަސައްކަތަކީ،" ތޮލާލް ވިދާޅުވި އެވެ.
ރާއްޖޭގައި އުފެދިފައިވާ އެސޯސިއޭޝަނެއް ކަމަށް ވާނަމަ، އެ ބަޔަކު އަމަލުކުރަން ލާޒިމްކުރާ ގާނޫނުތަކާއި ގަވާއިދުތަކާ، ހިންގާ ގަވާއިދާ، މި ހުރިހާ ކަމެއް ގެންދަން ޖެހޭނީ އޮންނަ އުސޫލުގެ ތެރެއިން ކަމަށް ތޮލާލް ވިދާޅުވި އެވެ.
"ފުޓްބޯޅަ އަކީ ރާއްޖޭގައި އެންމެ ގިނަ ބަޔަކު ތާއީދުކުރާ އެންމެ ގިނަ ބަޔަކު ލޯބިކުރާ އަދި އެންމެ ގިނަ ބަޔަކު ކުޅޭ ކުޅިވަރު، އެ ކުޅިވަރު އަޅުގަނޑުމެން އެބަޖެހޭ މަރުވިޔަނުދީ ދިރުވައިގެން ގެންގުޅެން. އެހެންވީމަ އެކަން އިރާދަކުރެއްވިއްޔާ ކުރާނަން،" މިނިސްޓަރެއްގެ ފެންވަރުގައި، ސްޕޯޓްސް ކޮމިޝަނަރުގެ މަގާމު ފުރުއްވަމުން އަންނަ ތޮލާލް ވިދާޅުވި އެވެ.
"ރައީސުލް ޖުމްހޫރިއްޔާގެ ވައުދުފުޅެއް އެއީ ފުޓްބޯޅަ އަލުން ކޮޅަށް ޖެހުން، އެކަން އަޅުގަނޑުމެން ކުރާނަން،"
މި ވަގުތު އެފްއޭއެމް އާއި ވޮލީބޯލް އެސޯސިއޭޝަން އޮފް މޯލްޑިވްސް ނޫން އެހެން އެސޯސިއޭޝަންތަކުގެ ކަންކަން ވެސް ސްޕޯޓްސް ކޮމިޝަނުން ބަލަމުން އަންނަ ކަމަށް ތޮލާލް ވަނީ ވިދާޅުވެފަ އެވެ.
