މަލިކު ހިމެނޭ، އިންޑިއާގެ ލަކްޝަދީފް ގައި ސާޅީހަކަށް ރަށް އޮންނައިރު، އޭގެ ތެރެއިން މީހުން ދިރިއުޅޭ 10 ރަށުގެ ޖުމްލަ އާބާދީއަކީ ހަތް ދިހަ ވަރަކަށް ހާހެވެ. ދީނާއި ސަގާފަތުގެ ގޮތުނާއި އަދި ކުރިން އާއިލީ ގޮތުން ވެސް ދިވެހިންނާ ގުޅިފައިވާ، މަލިކުގައި ދިވެހި ބަހުން ވާހަކަ ދެއްކާއިރު، އަނެއް ނުވަ ރަށުގައި ވެސް ދިރިއުޅެނީ މުސްލިމުންނެވެ.
އިންޑިއާގެ ބޮޑު ވަޒީރު ނަރެންދުރަ މޯދީ ފާއިތުވެދިޔަ ހަފުތާގައި ދެ ދުވަހުގެ ދަތުރެއްގައި ލަކްޝަދީފް އަށް ވަޑައިގަތީ، އެ މަނިކުފާނު އެ ސަހަރައްދުގެ ރައްޔިތުންނަށް ވައުދުވެވަޑައި ގެންފައިވާ ގިނަ ކަންތައްތަކެއް ފައްޓަވައި ދެއްވުމަށައި ބައެއް ވަދުތައް ހާސިލުވިކަން ފާހަގަ ކުރެއްވުމަށެވެ.
ޖެނުއަރީ 2، އަދި ޖެނުއަރީ 3، ވަނަ ދުވަހު، ކުރެއްވި އެ ދަތުރުފުޅުގައި 1،156 ކްރޯޑް ނުވަތަ 139 މިލިއަން ޑޮލަރުގެ އަގުހުރި ޕްރޮޖެކްޓުތަކެއް ލަކްޝަދީފްގެ ކަރަވައްތީގައި ފައްޓަވައި ދެއްވި އެވެ. އެއީ 11،000 އަށްވުރެ ބޮޑު އާބާދީއެއް ދިރިއުޅޭ، 4.2 އަކަކިލޯ މީޓަރުގެ ރަށެވެ. ލަކްޝަދީފްގެ ރަށްތަކުގެ ތެރެއިން އެންމެ އާބާދީ ބޮޑު ރަށެވެ.
ކަރަވައްތީގައި މޯދީ ފައްޓަވައި ދެއްވީ ޓެކްނިލޮޖީ އާއި ފެނާއި ހަކަތަ އާއި ބޭސްފަރުވާ އަދި ތައުލީމާ ގުޅޭ ކަންކަން ތައްގީ ކުރެއްވުމަށް ހިންގޭ ޕްރޮޖެކްޓް ތަކެކެވެ.
މީގެ ތިން އަހަރު ކުރިން 2020 ވަނަ އަހަރު، މޯދީ އޮތީ 1،000 ދުވަހުގެ ތެރޭގައި ލަކްޝަދީފް އަށް ފާސްޓް އިންޓަނެޓް ފޯރުކޮށްދޭން ވައުދުވެ ވަޑައިގެންފަ އެވެ. އެހެންކަމުން ކެރެލާގެ ވެރިރަށް ކޮޗީ އާއި ލަކްޝަދީފްގެ ރަށްތަކާ ދެމެދު ފައިބާ އޮޕްޓިކް ސަބްމެރީން ކޭބަލްގެ ހިދުމަތް މޯދީގެ ދަތުރުފުޅުގައި ފައްޓަވައި ދެއްވި އެވެ.
މޯދީގެ ދަތުރުގައި، ލަކްޝަދީފްގެ މީހުނަށް ހައްޖާއި އުމްރާ އަށް ދިއުމަށް ފަސޭހަ ގޮތްތަކެއް ހަމަޖައްސައި ދެއްވިކަން ވެސް އެ މަނިކުފާނު ފާހަގަ ކުރެއްވި އެވެ. މިގޮތުން ވިސާގެ ކަންކަން ފަސޭހަ ކުރުމާއި އޮންލައިންކޮށް ވިސާ ލިބޭނެ ގޮތް ހަމަޖެހުމާއި މަހުރަމަކާއި ނުލައި އަންހެނުންނަށް ހައްޖަށް ދެވޭނެ ގޮތް ހަމަޖައްސައި ދެވުނު ކަމަށް މޯދީ ވިދާޅުވި އެވެ.
"މި ކަންކަމުގެ ސަބަބުން އިންޑިއާ އިން އުމްރާ އަށް ދާ މީހުންގެ އަދަދު ފާހަގަ ކުރެވޭ ވަރަށް ވަނީ އިތުރުވެފައި،" މޯދީ ވިދާޅުވި އެވެ.
ލަކްޝަދީފް ދަތުރުގައި ކުރެއްވި ބައެއް އިތުރު ކަންތައްތައް
- - ސްލޫކް ކުދިންނަށް ލެޕްޓޮޕައި ބާސްކަލް ހަދިޔާ ކުރެއްވުން
- - މަސްވެރިންނާއި ދަނޑުވެރިނަށް ކްރެޑިޓް ކާޑު ދޫކުރެއްވުން
- - ލޮޖިސްޓިކް ހަބަކަށް ލަކްޝަދީފް ހެދުމުގެ ވަހާކަ ދެއްކެވި
- - ގޭގެ އަށް ސާފު ބޯފެން ދިނުމުގެ ޕްރޮޖެކްޓް ބާރަށް ކުރިއަށް ގެންދާ ކަމަށް ވިދާޅުވި
- - ލަކްޝަދީފްގެ މަސް އެކްޕޯޓްކުރުން ފުޅާކުމުގެ މުހިންމުކަން ފާހަގަ ކުރެއްވި
- - ދަޅުގައި މަސް ބަންދުކުރަން ފެށުމުގެ މުހިންމުކަން ފާހަގަ ކުރެވި
- - މޫދުވިނަ އާލާ ކުރުމުގެ ފުރުސަތުތައް ބެލުމަށް ނިންމެވި
މުޅި ދުނިޔެ އަށް މޯދީ ލަކްޝަދީފް ދައްކާލެއްވުން
"ލަކްޝަދީފް ގެ ރީތިކަން ދެކޭ ހިސާބުން، ދުނިޔޭގެ އެހެން މަންޒިލުތައް ފަނޑުވާނެ،" މޯދީ ވިދާޅުވި އެވެ.
ލަކްޝްދީފް ގެ ރަށެއްގެ އަތިރި މަތީގައި އިންޑިއާގެ ބޮޑު ވަޒީދު ނަހެންދުރަ މޯދީ ސޯފާ އެއްގައި އިށިނގދެ ވަޑަިގެން -- -- ފޮޓޯ/ މޯދީގެ އެކްސް
އެ ގައުމެއްގެ ރީތިކަން ދުނިޔެ އަށް ދައްކާލުމަކީ ކޮންމެ ވެރިއަކު ވެސް ބޭނުންފުޅު ވާނެ ކަމެވެ. ލަކްޝަދީފް ގެ ހިތްގައިމު ދޮންވެލި ގޮނޑުދޮށްތަކުގެ ފޮޓޯ މޯދީ ބުދަ ދުވަހު އެކްސްގައި ހިއްސާ ކުރެއްވުމުން، ނުވަ ވަނަ އަށް އިންޑިއާ އިން ގޫގުލްގައި ސާޗު ކުރި ބަހަކަށް ލަކްޝަދީފް ވި އެވެ.
މިހާރު ވެސް ޓޫރިސްޓުންނަށް ހިދުމަތް ދެމުން އަންނަ ލަކްޝަދީފް އަށް ބޭރު ގައުމުގެ 4،000 މީހުން 2022 ވަނަ އަހަރު ޒިޔާރަތް ކުރިއިރު، އެ އަދަދު މިދިޔަ އަހަރު އެއް ލައްކަ އަށް އެރި އެވެ.
ޓޫރިޒަމްގައި ހަރަކާތްރިވާ އިންޑިއާގެ އެންމެ ބޮޑު ކުންފުނި، އިންޑިއަން ހޮޓެލްސް ކޮމްޕެނީ އިން، ލަކްޝަދީފްގެ ދެ ރަށެއްގައި ތާޖު ބްރޭންޑުގެ ދެ ރިސޯޓް ތަރައްގީ ކުރުމުގެ މަސައްކަތް މިދިޔަ އަހަރުގެ ޖެނުއަރީ މަހު ވަނީ ފަށައިފަ އެވެ. ރާއްޖޭގެ ރިސޯޓުތަކާއި އެއްގޮތަށް ވޯޓާ ވިލާ ހިމެނޭ މި ދެ ރިސޯޓް ހުޅުވަން ހަމަޖައްސާފައިި ވަނީ 2026 އަހަރު އެވެ.
މޯދީ ވިދާޅުވީ ލަކްޝަދީފްގައި ބޭއްވި ޖީ20 ގެ ބައްދަލުވުމުގެ ސަބަބުން، މުޅި ދުނިޔެއަށް އެތަން ފާހަގަ ކުރެވިއްޖެ ކަމަށާއި، ލަކްޝަދީފް އަށް ހާއްސަ ޓޫރިޒަމް މާސްޓަ ޕްލޭނެއް މިހާރު ހަދަމުން ގެންދާ ކަމަށެވެ.
"ކްރޫސް ލައިނާ ތަކަށް މުހިންމު މަންޒިލަކަށް ލަކްޝަދީފް ވެގެންދާނެ،" މޯދީ ވިދާޅުވި އެވެ.
މޯދީ އެދިވަޑައިގަތީ އިންޑިއާގެ ރައްޔިތުން ގައުމުން ބޭރަށް ޗުއްޓީ ހޭދަކުރަން ދިޔުމުގެ ކުރިން އިންޑިއާގެ 15 މަންޒިލަކަށް ފުރަތަމަ ޒިޔާރަތް ކުރުމަށެވެ.
ޗަރުކޭސް ބޮޑު ކުރީ އިންޑިއާ މީޑިޔާ އިން
ކުރީގެ ރައީސް އަބަދުﷲ ޔާމިން އިސްނަންގަވައި، ރައީސް ޑރ. މުހައްމަދު މުއިއްޒު ވެރިކަން ހޯއްދެވުމަށް ހިންގެވި އިންޑިއާ އައުޓް ކެމްޕޭނާއި ގުޅިގެން، މުއިއްޒަކީ ޗައިނާގެ ޕަޕެޓެއްގެ ގޮތުގައި އިންޑިއާގެ މީޑިޔާތަކުން ސިފަކުރަމުން ގެންދިޔަ އެވެ. އިންޑިއާ ނޫސް ތަކުގައި މުއިއްޒު އާއި ގުޅޭ ގޮތުން ހުންނަ ލިޔުންތަކަށް، ރާއްޖެ ބޮއިކޮޓް ކުރުމަށް ގޮވާލާ، އިންޑިއާ މީހުން ކޮމެންޓް ފާޅުކުރަމުން ގެންދާތާ ގިނަ ދުވަސްތަކެއް ވެއްޖެ އެވެ.
މިދިޔަ އަހަރު ނިމުނުއިރު، ރާއްޖެ އަށް އެއް ގައުމަކުން އެންމެ ގިނައިން ޓޫރިސްޓުން އަންނަ ގައުމަށް އިންޑިއާ ވި އެވެ. މޯދީގެ ލަކްޝަދީފް ފޮޓޯ ވެގެން ދިޔައީ، ކޮމެންޓް ފާލުކުރަމުން ދިޔަ ފަރާތްތަކުން ބޭނުންވާ ގޮތަށް، ރާއްޖޭގެ ޓޫރިޒަމް ބޮއިކޮޓް ކުރުމުގެ ކެމެޕޭނެއް ހިންގާލުމަށް، ލިބުނު ރަނުގެ ފުރުސަތަކަށެވެ. ރާއްޖޭގެ ޓޫރިޒަމް ބޮޑު ނުރައްކަލަކަށް މިކަން މިވީ، އިންޑިއާ އައުޓް ކެމްޕޭނު ހިންގުމުގައި ބައިވެރިވާ ސަރުކާރުގެ ބައެއް އިސްވެރިން، ވަދެވެނީ ކިހާވަރެއްގެ ކަމެއްގެ ތެރެއަށް ކަން ނޭނގި ދުންއަރަމުން ދިޔަ މޯލްޑިވްސް ބައިކޮޓް ކެމްޕޭނުގައި ހުޅު ޖެހުމުން ކަމަށް ބައެއް މީހުން ބުނެ އެވެ.
