އެއްވެ އުޅުމާއި މުޒާހަރާ ކުރުމާ ދެކޮޅަށް މިއަދު ވެރިކަންކުރާ ޕީއެންސީގެ މެންބަރުން ވާހަކަ ދެއްކިޔަސް އެ ޕާޓީން ވެރިކަމަށް އައީ އިންޑިއާ އައުޓް އަދި ހަރާމް ހުކުމޭ ކިޔައިގެން މުޒާހަރާ ކޮށްގެން ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެ އެވެ.
ކުރިއާލައި ހުއްދަ ނަގައިގެން ނޫނީ ވަކި ސަރަހައްދުތަކަކަށް އެއްވެ އުޅުން މަނާކުރާ ގާނޫނު އުވާލަން ހުށަހަޅާފައިވާ ބިލަށް ބަހުސް ކުރައްވަމުން ޕީއެންސީގެ ގިނަ މެންބަރުން ވަނީ އެ ގާނޫނު އޮންނަން ޖެހޭ ކަމަށާއި މުޒާހަރާ ކުރުމުގެ ހައްގު ހަނިކުރަން ޖެހޭ ކަމަށް ވިދާޅުވަމުންނެވެ.
އެ ކަމަށް ރައްދު ދެއްވާ ޒިޔާދު ވިދާޅުވީ ރައީސް މުހައްމަދު މުއިއްޒު ވެރިކަމަށް އައުމުގެ އެންމެ ބޮޑު އެއް ސަބަބަކީ އެމްޑީޕީ ސަރުކާރުގެ ދުވަސްވަރު އޭރުގެ އިދިކޮޅުން ކުރި ބޮޑެތި މުޒާހަރާތައް ކަމަށެވެ. އޭރު މުޒާހަރާ ކުރި މީހުންނަށް ދައުވާ ނުކުރާ ކަމަށް ވެސް ޒިޔާދު ވިދާޅުވި އެވެ.
"އެ ދުވަހު ކުރި ބޮޑެތި މުޒާހަރާތަކުގެ ނަތީޖާ އަކީ އިއްޒަތްތެރި ރައީސް ތި ގޮނޑީގައި އިންނެވުން. އެ އިންޑިއާ އައުޓް އާއި އެ ހަރާމް ހުކުމުގެ ބޮޑު މުޒާހަރާގެ ސަބަބުން ތި ހިސާބަށް އާދެވުނީ، ނަމަވެސް މިއަދު މި އިއްޒަތްތެރި މެންބަރުން އެ ދުވަސް ހަދާނެއް ނެތް،" މަޖިލީހުގެ ރައީސް އަބްދުއްރަހީމް އަބްދުﷲ އަށް އިޝާރާތް ކުރައްވާ ވާހަކަ ދެއްކެވި އެވެ.
ކުރީގެ ރައީސް އަބްދުﷲ ޔާމީނަށް ކުރީ ހަރާމް ހުކުމެއް ކަމަށް މީގެ ކުރިން ވިދާޅުވި ޕީއެންސީގެ މެންބަރުންނަށް މިއަދު އެ ހުކުމް ހަލާލު ވެއްޖެ ކަމަށް ވިދާޅުވެ ޒިޔާދު ވަނީ ބާރު ލިބޭ ދުވަހު ޕީއެންސީ ފިކުރަށް އަބަދު ވެސް މާޒީ ހަނދާން ނެތޭ ކަން ފާހަގަކުރައްވާފަ އެވެ.
މިއަދު އެމްޑީޕީން މަސައްކަތް ކުރަނީ ވެރިކަމުގައި ތިބެ މި ގާނޫނު އުވާނުލައި ހެދުނު ގޯސް ރަނގަޅު ކުުމަށް ކަމަށް ޒިޔާދު ވެސް ވަނީ ވަނީ ވިދާޅުވެފަ އެވެ. މި ބިލު މަޖިލީހަށް ހުށަހެޅުއްވީ އެމްޑީޕީއަށް ނިސްބަތްވާ މެންބަރު މީކާއިލް ނަސީމެވެ.
"ވަރަށް ފަހުން އެޓާނީ ޖެނެރަލް ވަޑައިގެން ވިދާޅުވިހެން. ބަންޑާރަނައިބު ވިދާޅުވިހެން މީގަ މައްސަލަތަކެއް އެބަހުއްޓޭ. ރައީސުލްޖުމްހުރިއްޔާ ވެސް ވިދާޅުވަނީ [އެއްވެ އުޅުމުގެ ހައްގު] އަދިވެސް ފުޅާކުރާނަމޭ. ދެން މިކަން ނުކުރަންވި ސަބަބެއް އޮތް ކަމަކަށް އަޅުގަނޑު ނުދެކެން،" ޒިޔާދު ވިދާޅުވި އެވެ.
މި ބިލު ހުށަހެޅުއްވި މީކާއިލް މިއަދު ވަނީ އެމްޑީޕީގެ ސުޕަ މެޖޯރިޓީ އޮތްއިރު އެ ގާނޫނު އުވާލަން ކާށިދޫ ދާއިރާގެ ކުރީގެ މެންބަރު އަބްދުﷲ ޖާބިރު ހުށަހެޅުއްވި ބިލު ޕާކު ކޮށްފައި ބޭއްވުމަކީ ގޯހެއްކަން ގަބޫލުކުރައްވާ ކަމަށެވެ.
ހޯމް މިނިސްޓްރީއިން އަންގާ ސަރަހައްދެއް ފިޔަވައި އެހެން އެއްވެސް ތަނަކަށް ކުރިން ހުއްދަ ހޯދުމަކާ ނުލައި އެއްވެ އުޅުން މަނާކޮށް، ގާނޫނު ފާސްކުރީ އޯގަސްޓް 17، 2016 ގައި ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ. ހޯމް މިނިސްޓްރީން އޭރު ކަނޑައަޅާފައި އޮތީ ހުއްދަ ހޯދުމަކާ ނުލައި އެއްވެވޭނީ ހަމައެކަނި މާލޭގެ ކަނިވާ ސަރަހައްދަށް ކަމަށެވެ.
އޭރު އިދިކޮޅުގައި ތިބި އެމްޑީޕީގެ ޕާލަމެންޓްރީ ގްރޫޕުގެ ލީޑަރު، އިބްރާހިމް މުހައްމަދު ސޯލިހު ވިދާޅުވީ އެއީ އަމަލު ކުރަންޖެހޭ ގާނޫނެއް ނޫން ކަމަށެވެ. އެއްވެ އުޅުމުގެ ހައްގު ހިފެހެއްޓުމަށް ފާސްކުރި އެ ގާނޫނު އުވައިލުމަކީ 2018 ގައި ވެރިކަމަށް އައި އެމްޑީޕީގެ ރިޔާސީ ވައުދެއް ވެސްމެ އެވެ. އެހެންނަމަވެސް ވެރިކަން ނިމުމާ ހަމައަށް ވެސް އެ ގާނޫނު އުވާލައިފައެއް ނުވެ.
އެމްޑީޕީގެ ވެރިކަމުގައި އެ ގާނޫނަށް އަމަލު ކުރާތީ، އެކަމަށް ވަރަށް ބޮޑަށް މިހާރުގެ ސަރުކާރު ހިންގާ ޕާޓީގެ ބޭފުޅުން، ފާޑުވިދާޅުވަމުން ގެންދެވި އެވެ. އަދި ޕީޕީއެމް/ޕީއެންސީގެ ވެރިކަމެއްގައި އެ ގާނޫނު އުވައިލާނެ ކަމަށް މިހާރުގެ ބަންޑާރަނައިބު، އަހުމަދު އުސާމް ވެސް އޭރު ވިދާޅުވި އެވެ.
