އިންޑިއާގެ ސަރުކާރާ އެއްވެސް މައްސަލައެއް ނުޖެހޭ ކަމަށާއި ދެ ގައުމުގެ ގުޅުން ކުރިއެކޭ އެއް ގޮތަށް ބަދަހިކޮށް އެބަ އޮތް ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
އިންޑިއާގެ ފިލްމީ ތަރިން ހިމެނޭ ގޮތަށް ރާއްޖޭގެ ޓޫރިޒަމާ ދެކޮޅަށް އަންނަނީ ކެމްޕެއިނެއް ކުރަމުންނެވެ. އެ މައްސަލަގަނޑު އުފެދުނީ ލަކްޝަދީޕް ޕްރޮމޯޓުކޮށް މޯދީ އެކްސްގައި ޕޯސްޓެއް ކުރުމުން އެކަމާ ދެކޮޅަށް، މި ސަރުކާރުގެ ބައެއް އިސް ބޭފުޅުން ޓްވީޓް ކުރައްވައި، އިންޑިއާއަށް މަލާމާތްކޮށް ފުރައްސާރަ ކުރުމުންނެވެ.
މި މައްސަލާގައި ޔޫތު މިނިސްޓްރީގެ ތިން ޑެޕިއުޓީ މިނިސްޓަރަކު ވެސް ވަނީ ސަސްޕެންޑްކޮށްފަ އެވެ. އެއީ މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދެވެ.
މިއަދުގެ ކެބިނެޓު ބައްދަލު ވުމަށް ފަހު، ރައީސް އޮފީހު ބޭރުގައި "އަދަދު" ނޫހަށް ވާހަކަ ދައްކަވަމުން ޒަމީރު ވިދާޅުވީ ސަރުކާރުގެ ސްޓޭންޑު ސާފުކޮށް މިއަދު އެ މިނިސްޓްރީން ނެރުނު ބަޔާނުގައި ހާމަކޮށްފައިވާނެ ކަމަށެވެ.
"ސަރުކާރުން މިހާރު ދަނީ، އަޅުގަނޑުމެން ތެރެއިން އެ ގޮތަށް ހިޔާލު ފާޅުކުރި އޮފިޝަލުންނަށް ފިޔަވަޅު ވެސް އަޅަމުން،" ޒަމީރު ވިދާޅުވި އެވެ.
ޒަމީރު ވިދާޅުވީ، އިންޑިއާގެ ސަރުކާރުން އެފަދަ އެއްވެސް ކަންބޮޑުވުމެއް ވެސް ފާހަގަކޮށްފައި ނުވާ ކަމަށާއި އިންޑިއާގެ ސަރުކާރާ އެކު ގުޅުން ވަރަށް ބަދަހިކޮށް އެބަ އޮތް ކަމަށެވެ.
"އަޅުގަނޑުމެން ދެ ގައުމު ހަމަ ވަރަށް އެކުވެރިކޮށް ގުޅުން ބަދަހިކޮށް، ދެ ގައުމުން އެއް ގައުމުން އަނެއް ގައުމުން ބޭނުންވާ އެހީތެރިކަމާއި އެއްބާރުލުންތަކާ ގުޅޭ ގޮތުން ހަމަ ވާހަކަ ދެކެވެމުން އަދިވެސް އެބަ ދޭ،" ޒަމީރު ވިދާޅުވި އެވެ.
ރައީސް ޑރ. މުހައްމަދު މުއިއްޒު މިއަދު، އިންޑިއާއާ އެންމެ ވާދަވެރި ޗައިނާއަށް ރަސްމީ ދަތުރުފުޅެއްގައި މިރޭ ފުރާވަޑައިގަންނަވާއިރު އިންޑިއާއަށް ވެސް ރައީސް ވަޑައިގަންނަވާނެ ކަމަށް ޒަމީރު މިއަދު ވިދާޅުވި އެވެ.
މީގެ ކުރިން ރާއްޖޭގެ ރައީސުން ވެރިކަމަށް ވަޑައިގެން އާންމުކޮށް ފުރަތަމަ ރަސްމީ ދަތުރުފުޅު އޮންނަނީ އަވައްޓެރި އިންޑިއާއަށެވެ. ރައީސް ޑރ. މުއިއްޒުގެ ފުރަތަމަ ރަސްމީ ދަތުރުފުޅު މި ކުރައްވަނީ ޗައިނާއަށެވެ.
ރާއްޖެއަށް އައުމުގެ ބަދަލުގައި ލަކްޝަދީޕު ހިޔާރު ކުރުމަށް ގޮވާލައި އިންޑިއާގެ މަޝްހޫރު ފިލްމީ ތަރިން ކަމަށްވާ އަކްޝޭ ކުމާރާއި ސަލްމާން ހާން އާއި ޝްރަދާ ކަޕޫރާއި ޖޯން އަބްރަހަމާއި ޓައިގާ ޝްރޮފް އެކްސްގައި ޕޯސްޓު ކުރި އެވެ. އަދި މުޅި ދުނިޔެއަށް ވެސް މަޝްހޫރު ކްރިކެޓު ތަރި ސަޗިން ޓެންޑުލްކާ ވެސް ވަނީ އެފަދަ ޕޯސްޓެއް ކޮށްފަ އެވެ.
އިންޑިއާ އަދި އެ ގައުމުގެ ބޮޑުވަޒީރަށް ފުރައްސާރަ އާއި މަލާމާތް ކުރުމުން ކުރިމަތިވަމުންދާ ޕްރެޝަރުތަކާ ހެދި ފަތުރުވެރިކަމުގެ އިންޑަސްޓްރީން ވެސް ވަނީ ކަންބޮޑުވުން ފާޅުކޮށްފަ އެވެ. އޭގެ ތެރޭގައި ޓްރެވަލް އެޖެންޓުގެ ޖަމިއްޔާ މަޓާޓޯ ވެސް ހިމެނެ އެވެ. މޯދީއަށް މަލާމާތް ކުރުން ރާއްޖޭގެ ފޮރިން މިނިސްޓްރީން ވެސް ވަނީ އެކަން ކުށްވެރިކޮށްފަ އެވެ.
މޯދީއަށް މަލާމާތް ކުރުމުން ރާއްޖޭގެ ސިޔާސީ ބޭފުޅުން ވެސް ވަނީ އެކަން ކުށްވެރިކޮށްފަ އެވެ. އޭގެ ތެރޭގައި އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއިލް އާއި ކުރީގެ ރައީސް މުހައްމަދު ނަޝީދާއި އެމްއާރްއެމްގެ ލީޑަރު ފާރިސް މައުމޫން ހިމެނިވަޑައިގަންނަވަ އެވެ.
މިހާރު ވެރިކަންކުރާ ޕީއެންސީ/ޕީޕީއެމްއަކީ އިދިކޮޅުގައި އޮތް އިރު ރާއްޖޭގައި ގާއިމުވެ ތިބި އިންޑިއާ ސިފައިން ބޭރު ކުރުމަށް ގޮވާލައި "އިންޑިއާ އައުޓް" ގެ ނަމުގައި ކެމްޕެއިނެއް ވެސް ހިންގި ބަޔެކެވެ. އިންޑިއާ ސިފައިން ފޮނުވާލުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އަދި އެ ކަމަށް، އިންޑިއާ ސަރުކާރުގައި މިހާރު އެދިފައިވާނެ ކަމަށް ވެސް ސަރުކާރުން ބުނެފައިވެ އެވެ.
