ސްޕޯޓްސް ކޮމިޝަނަރު، މުހައްމަދު ތޮލާލް، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިހާބުގެ ކަންކަން މަޑުޖައްސާލަން އަންގާފައިވަނިކޮށް، އެފްއޭއެމް އިން އަދިވެސް އިންތިހާބުގެ މަސައްކަތް ކުރަމުން އަންނަ ކަމަށް އެ އެސޯސިއޭޝަނުން ބުނެފި އެވެ.
މިދިޔަ މަހު 28 ވަނަ ދުވަހު، ކޮމިޝަނާ އޮފް ސްޕޯޓްސް ތޮލާލް ވަނީ އެފްއޭއެމް އިން ގަވާއިދާ ހިލާފަށް ކަންތައްތަކެއް ކުރަމުން އަންނާތީވެ، އެ ކަންކަން ބެލުމުގެ ގޮތުން، މި މަހު 31 ވަަނަ ދުވަހު ބާއްވަން ތާވަލުކޮށްފައިވާ އެފްއޭއެމްގެ އިންތިހާބުގެ ކަންކަން މަޑުޖައްސާލަން އަންގައިފަ އެވެ.
އެއީ، އެފްއޭއެމްގެ އިންތިހާބުގެ ކަންކަން އޮޅުންފިލުވަން، ކޮމިޝަނާ އޮފް ސްޕޯޓްސް އިން ފޮނުވި ސިޓީ އަށް ދިން ވަގުތުގެ ތެރޭގައި ޖަވާބުދާރީވެފައިނުވާތީ އައި އެންގުމެކެވެ.
އެފްއޭއެމްގެ އިންތިހާބުގެ ކަންކަން މަޑުޖައްސާލަން ކޮމިޝަނަރު އެންގި އެންގުމުގެ ބަޔާން ނެރުނު ފަހުން، އެފްއޭއެމް އިން ވަނީ ކޮމިޝަނަރު ކުރިން ފޮނުވި ސިޓީ އަށް ޖަވާބުދީފަ އެވެ.
"އަދަދު" އަށް ދީފައިވާ އިންޓަވިއުއެއްގައި ކޮމިޝަނާ އޮފް ސްޕޯޓްސް، ތޮލާލް ވިދާޅުވީ، އެފްއޭއެމަށް ވެސް ގާނޫނަށް ވުރެ މަތިން ކަންކަމެއް ނުނިންމޭނެ ކަމަށެވެ.
އެ ގޮތުން، އެފްއޭއެމްގައި މި ވަގުތު ހިނގަމުން އަންނަ ކަންކަމާ ގުޅޭގޮތުން، ފީފާ އާއި އޭއެފްސީ އަދި ރާއްޖޭގެ އޮލިމްޕިކް ކޮމިޓީއާ މަޝްވަރާ ކުރުމަށް ފަހު، ގޮތެއް ނިންމަންދެން އެފްއޭއެމް އިންތިހާބުގެ ކަންކަން މަޑުޖައްސާލަން ވަނީ ތޮލާލް އަންގައިފަ އެވެ.
އެފްއޭއެމް އިންތިހާބުގެ ކަންކަން، މަޑުޖައްސާލާފައިވޭތޯ، މިއަދު، "އަދަދު" އިން ކުރި ސުވާލަކަށް އެފްއޭއެމްގެ އެކްޓިން ޖެނެރަލް ސެކްރެޓަރީ، ޖައުޝަން ޝަރީފް (ޖައު) ވިދާޅުވީ، އިންތިހާބުގެ ކަންކަން އަދިވެސް ކުރިއަށްދާ ކަމަށެވެ.
މިދިޔަ މަހުގެ 27 އަށް ހަމަވާ ގޮތަށް އޮތް، އެފްއޭއެމްގެ އިންތިހާބަށް ކުރިމަތިލާން ހުޅުވާލި ފުރުސަތުގެ، އެ މުއްދަތުގެ ތެރޭގައި އިންތިހާބަށް ކުރިމަތިލީ، އެފްއޭއެމްގެ ކުރީގެ ރައީސް، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) އާއި ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ.
އެފްއޭއެމްގެ ރައީސް ކަމަށް ކުރިމަތިލާ ކޮންމެ ކެންޑިޑޭޓަކު އަތުގައި ވެސް މަދުވެގެން، ފުރަތަމަ ޑިވިޝަނުގެ އަށް ކްލަބްގެ ތެރެއިން ތިން ކްލަބެއްގެ ތާއީދު އޮންނަން ޖެހެ އެވެ. މުފާ އާއި ތޯރިގު އަތުގައި ވެސް ކްލަބް ވެެލެންސިއާގެ ތާއީދު ސިޓީ އެބައޮތެވެ.
ވެލެންސިއާ އިން ރަސްމީކޮށް، އެފްއޭއެމް އިލެކްޓޯރަލް ކޮމިޓީ އަށް ފޮނުވާފައިވާ ސިޓީގައި ބުނެފައިވަނީ އެ ކްލަބްގެ ތާއީދު އޮތީ ތޯރިގަަށް ކަމަށެވެ. އަދި ދެން އޮތް ސިޓީ (މުފާ އަތުގައި އޮތް ސިޓީ)ގެ މައްސަލަ ފުލުހުންނާއި ކޮމިޝަނާ އޮފް ސްޕޯޓްސް އަށް ހުށަހަޅާފައިވާ ކަމަށެވެ.
މިކަމާ ގުޅޭގޮތުން، ތޯރިގު ވިދާޅުވީ، މުފާގެ ޓީމުން، ވެލެންސިއާގެ ސިޓީ ހޯދީ ފޯޖު ކޮށްގެން ކަމަށެވެ.
އެ ތުހުމަތަށް އިންކާރުކުރައްވައި، މުފާ ވިދާޅުވީ، ވެލެންސިއާ ނުލައި ވެސް އޭނާ އަށް ފުރަތަމަ ޑިވިޝަނުގެ ފަސް ކްލަބެއްގެ ތާއީދު އެބައޮތް ކަމަށެވެ.
މުފާ އަތުގައި ވެލެންސިއާ ނުލައި ވެސް، ފުރަތަމަ ޑިވިޝަނުގެ ފަސް ކްލަބެއްގެ ތާއީދު އޮތްނަމަ، ތޯރިގު އަތުގައި އޮންނާނީ ވެލެންސިއާ ހިމަނައިގެން ތިން ކްލަބެއްގެ ތާއީދެވެ. އެހެންކަމުން، ވެލެންސިއާގެ ތާއީދު އޮންނަ ފަރާތެއް ކަނޑައެޅުން އެއީ، އެފްއޭއެމްގެ އިލެކްޓޯރަލް ކޮމިޓީން ނިންމަން ޖެހޭ މުހިންމު ނިންމުމެކެވެ.
އެފްއޭއެމް އިލެކްޓޯރަލް ކޮމިޓީ ވަނީ ސިއްރުކޮށްފައި ކަމަށް މީޑިއާގައި ވަނީ ރިޕޯޓްކޮށްފަ އެވެ.
އެކަމާ ގުޅޭގޮތުން، ސުވާލުކުރުމުން، ޖައުޝަން ވިދާޅުވީ، އެއްވެސް އިރެއްގައި އެފްއޭއެމްގެ އިލެކްޓޯރަލް ކޮމިޓީ ސިއްރު ނުކުރާ ކަމަށެވެ. އެ ގޮތުން، ކުރިން ވެސް އިލެކްޓޯރަލް ކޮމިޓީގެ މެމްބަރުންގެ ނަންތަކަކީ، އެފްއޭއެމްގެ ކޮންގްރެސް އަކުން ފާސްކޮށްފައި އޮތް، އާންމުންނަށް ލިބިފައި އޮތް މައުލޫމާތެއް ކަމަށް އޭނާ ވިދާޅުވި އެވެ.
"ސިއްރު ކުރަން ޖެހޭ މައުލޫމާތެއް ނޫން މިއީ. މިއީ އެފްއޭއެމް ކޮންގްރެސް އަކުން ނިމިފައި އޮތް ޕަބްލިކް އަށް ލިބޭ ހިސާބުގައި އޮތް މައުލޫމާތެއް،" ޖައުޝަން ވިދާޅުވި އެވެ.
އެފްއޭއެމް އިލެކްޓޯރަލް ކޮމިޓީގައި ހިމެނެނީ، ޗެއާމަނަކަށް ހުންނެވި އުސްތާޒް އަބްދުﷲ އަލީގެ އިތުރުން ދެ މެމްބަރުންގެ ގޮތުގައި އަހްމީމް އަބްދުލް ރައްޒާގު އާއި އަބްދުﷲ އަލީ އެވެ.
އެފްއޭއެމް އިންތިހާބުގެ ކަންކަން ކުރިއަށް ގެންދާނީ މި ކޮމިޓީގެ ބެލުމުގެ ދަށުންނެވެ.
